¡BAN AIHWAKI KAIKI BAS!

Rilidian nani Ucrania war aiklabanka nahki tâ baiki ba | ¿Baibil dîa wisa?

Bisi taim rilidian tâ uplika nani Ucrania war aiklabanka dukiara dîa aisan ba kaiks:

“Tâ uplika Kirill, Rusia ortodoxa priaska watla tâ bri ba, Rusia war aiklabi ba mapara kau diara aisaras sa […]. Aima manis naha priaska watla Ucrania mapara saura aisan ba Putin mita yus munisa naha war aiklabanka tâ baikaia dukiara” (EUobserver, 2022 marzo kati 7).
“Tâ uplika Kirill aisan […] Ucrania mapara war aiklabanka ba saurka lâka mapara aiklabanka kum sa. Ucrania mapara war aiklabanka tâ baikaia dukiara naha maisa pakanka ba klir pali sa” (AP News, 2022 marzo kati 8).
“Kiev tawanka ra tâ uplika Epifanio I, Ucrania ortodoxa priaska watla tâ bri ba, naha mundi ra ai uplika nani ra blisin munan, bara Rusia kuntrika mapara aiklabuya kupia bukan. Baku sin win Rusia suldiarka nani ra ikaia ba saura apia sa” (The Jerusalem Post, 2022 marzo kati 16).
“Ucrania suldiarka nani bara naha war aiklabanka ra hilp wan muni uplika nani ra yawan tâ baikisa. Witin nani Ucrania kaina kahbaia sakripaiska nani dauki ba blisin muni banhwisna, bara witin nani dukiara puri suni banhwisna” (UCCRO maisa pakanka,a 2022 febrero kati 24).

¿Man dîa lukisma? ¿Rilidian nani Jisas nina blikisa wi ba ai uplika nani war aiklabanka ra wabia kupia bukaia pain sa ki? ¿Baha dukiara Baibil dîa wisa ki?

Piua luan sturka ra rilidian bara war nani

Piua luan sturka ba wan marikisa, rilidian manis ba kupia kumi lâka plikisa wisa, kuna war aiklabanka nani ra tâ baikisa bara mapara aisaras. Jehova witniska nani mani ailal ra rilidian nani mawan wâl bri ba param aisisa. Wan ulbi sakanka nani ra dîa aisan ba kum kum kaiks:

“Las cruzadas: ‘trágica ilusión’” ulbanka ra tânka marikisa, Gâd bara Kraist nina ra upla manis ra iki tikan ba roman katolik priaska watla tâ baikan.
“La Iglesia Católica y África” ulbanka ra marikisa, rilidian nani ba war aiklabanka nani bara upla manis ra iki tikan ba sip alki takaskras kan.
“¿Tiene la culpa la religión?”, “El papel de la religión en las guerras” bara “La religión toma partido” ulbanka nani ra param marikisa, katolik, ortodoxos priaska watla nani bara protestantes tâ uplika nani ba war aiklabanka nani manis ra tani wâlsut ra tâ baiki kan.

¿Kristian rilidianka nani ba war aiklabanka nani tâ baikaia sa ki?

Jisas dîa smalkan ba: “Uplikam ra latwan kaiks, man wînam ra latwan kaikisma ba baku” (Matiu 22:39). “Waihlam nani ra latwan kaiki bas” (Matiu 5:44-47).

Naha luki kaiks: Rilidian kum upla wala ra latwan kaikaia Jisas adar munan ba bîla walisa wisa kaka, ¿ai uplika nani war aiklabuya kupia bukaia ba pain sa ki? Naha tânka ba kau nu takaia dukiara, “Los cristianos verdaderos y la guerra” bara “¿Es posible amar a un enemigo?” ulbanka ba aisi kaiks.

Jisas dîa smalkan ba: “Yang kingki lâka ba naha tasba wina apia sa. Naha tasba wina kan kata, yang nini blablikra nani ba aiklabaia kan, bara baku mika Ju nani mihta ra ai mangkan kaia apia kan” (Jan 18:36). “Kan ani uplika nani sordka ni aiklabi ba, sim sordka wal prubia” (Matiu 26:47-52).

Naha luki kaiks: Jisas tâwan ai nina blablikra nani aiklabaia apia kan kaka, ¿diara wala tâwan aiklabaia ba pain sa ki? Pas kristianka nani nahki Jisas smalkanka nani alki dauki kasak banhwi kan ba nu takaia dukiara, “El cristianismo y la guerra: ¿son compatibles?” ulbanka ba aisi kaiks.

¿War aiklabanka tâ baiki rilidianka nani ra dîa takbia ki?

Baibil marikisa, Gâd ba saura kaikisa ani rilidianka Jisas smalkanka alki daukisa wisa, kuna rait pali alki daukras ba (Matiu 7:21-23; Taitus 1:16).

Param Marikan bukka ba wan marikisa, “naha tasba ra ikan nani tâlia ba” tâka Gâd bui naha rilidian nani ra pâtkira kulkisa (Param Marikan 18:21, 24). Dîa muni baku sa tânka ba nu takaia want sma kaka, “¿Qué es Babilonia la Grande?” ulbanka ba aisi kaiks.
Jisas win, dus kum mâ saura nani saki ba “klaki dakbi pauta ra angki” ba baku, Gâd mita saura kaiki rilidianka nani sut ra sauhki tikbia (Matiu 7:15-20). Baha nahki takbia nu takaia want sma kaka, “¡Se acerca el fin de la religión falsa!” ulbanka ba aisi kaiks.

Jehova witniska nani ba sât wala sa

Kuntri wala nani ra taki ba baku, Rusia bara Ucrania Jehova witniska nani ba Jisas smalkan baku pulitik bisniska tilara dimras, bara war aiklabanka nani ra sin waras sa. Baha mita naha war aiklabanka ra, bara war aiklabanka wala nani ra sin yawan dimras, bara tâ baikras sa. Bara, Baibil smalkanka nani yawan kasak luki ba swiaia want apia ba mita, Jehova witniska kum kum nani ra nina bliki rau sauhkisa (Jan 15:19, 20; 2 Timoti 3:12). Tânka kum baku, Rusia gabamintka ba Jehova witniska manis ra priski alkan sa, bara kum kum ra rau munan sa. Baku sin asla aidrubaia pliska nani mihta dakban. Tânka nani kau sitnika kat nu takaia want sma kaka, Internet pliska www.jw-russia.org ra dimi kaiks.

Jehova witniska nani Baibil smalkanka nani alki bri ba mita nahki nina bliki rau muni ba kau nu takai want sma kaka, 4 minit lilka Los testigos de Jehová de Irkutsk se mantienen fieles a pesar de las violentas redadas ba kaiks.
Jehova witniska nani ba pat piua wihka pulitik bisniska nani tilara dimras sa. Tânka kum baku, Alemania nazi bara Unión Soviética kuntrika nani ra nina bliki rau sauhki kan, kuna ban pulitik ra dimras takaskan. Kau nu takaia want sma kaka, Mapara buanka piua ra dutki banhwisa lilkika ba kaiks.

¿Baibil ba kaina piua ra war nani danh âpu kabia pramis muni ba nu kapram ki? (Aiseya 2:4; Jirimaya 29:11). Naha pramiska apia kaka yawan dîa kasak luki ba dukiara kau nu takaia want sma kaka, naha sim Internet pliska ra tânka nani pliki kaiks, apia kaka yawan wal aisas.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Naha asla takanka ba prias watla 15 tâ baikisa: ortodoxa priaska watla, católica romana priaska watla, católica griega priaska watla, bara rilidian wala nani sin, baha nani ba protestantes, evangélicas, ju daknika nani bara musulmanes.