Tasba aiska na sauhki tikanka ra auya sa | ¿Baibil dîa wisa?

“Nanara naha Tasba na kau isti sauhki tikanka ra auya sa. Tawan tara nani ra lisamra nani takisa. Luan piua ra kaikras kan pitka kat bitni saura takisa. Prari tara aihka saura nani takisa. Plis ailal ra lî trabilka nani takisa. Inma bara daiwan sâtka milian nani ba tiwan ra auya sa. Yang dîa aisisna ba kisi sturka kum apia sa. Tânka pliki kakaira nani bila, lî, gias bara lait baku, wan kaina kir ra dîa bâra ba tnatka pain ra yus munras ba tâka mita, naha sauhkanka nani ba takisa” (2022 abril kati 4 yua ra, naha Tasba nahki sauhki tiki auya ba dukiara Kuntri nani Asla Takanka wihtka António Guterres aisanka ba).

“Tânka pliki kakaira nani wisa, uba lapta takisa apia kaka uba lî auhi ba mita, mani nani aula bilkara, Stechi kuntrika ra il nani main kaiki bri pliska nani 423 ra kasak ambuk munbia. Kau pali baha sât pliska nani ba lapta karna taki ba mita sauhki tikaia sip sa. Baibil ra dîa aisi ba baku takaia sip sa: dus nani ami tiwaia, lisamra tara nani takaia, lî klaswanka tara nani slilwi tiwaia, kabu laya nani uli tasba tikaia, bara lapta karna prukaia” (2022 junio kati 15 yua The New York Times wauhkataya “Yellowstone pliska ra trabil nani takbia ba” ulbanka ba wina).

¿Baha sât trabilka nani ba nahki wapnika mangkaia sip kabia ki? Bara wapnika mangkaia sip sa kaka, ¿ya mita daukbia ki? Rait pali Baibil dîa wi ba kaiks.

Baibil prapit aisan, upla nani mita Tasba na sauhkbia

Baibil wisa Gâd bui “naha tasba sauhki uplika nani ra, sauhki [tikbia]” (Param Marikan 11:18). Naha tikska ba tânka yumhpa wan smalkisa:

1. 1. Upla nani ba Tasba sauhkbia.

2. 2. Tasba sauhki trabilka nani ba danh takbia.

3. 3. Naha trabilka nani ba Gâd bui wapnika mangkbia, upla nani mita lika apia.

Tasba dukiara bîla kaikanka painkira kum bâra sa

Baibil pramis munisa “tasba ba, aihka takras ban bâra [kabia]” (Smasmalkra 1:4). Tasba ra upla ban iwi kabia.

• “Kasakkira nani ba lika tasbaya ba bri iwbia, ban kaia ra sin baha tasbaya ra iwi kabia” (Lawana Nani 37:29).

Naha Tasba ba aiska pali painkira takbia.

• “Upla iwras tasbaya ba, lilia taks, tasba lâwan nani yakan swin kan ba lilia takbia, lapta tasbaya ba sin lilia bribia, tangni baku tangnika baiwbia” (Aiseya 35:1).