Tasba aiska ra pistal ni upla ra sabi iki ba mita sirang iwisa | ¿Baibil dîa wisa?

2022 julio kati bilkara, plis ailal ra pistal ni upla ra sabi ikan ba mita, tasba aiska ra sirang iwan:

• “Japan pulitik uplika kau kakaira kum [kuntri tâ uplika kata, nina Shinzo Abe] ra ikan ba tâka mita, tasba aiska ra upla manis tâ iwan. Kan Japan kuntrika ra baha sât rau munanka uya kaikras, bara pistal briaia dukiara lâka ba uba karna mangkisa” (2022 julio kati 10, The Japan Times).

• “Copenhague tawanka markit tara kum ra waitna kum mita upla yumhpa ra pistal ni sabi ikan. Baha tâka Dinamarca kuntrika uplika nani ba sirang iwan” (2022 julio kati 4, Reuters).

• “Sudáfrica: Soweto tawanka rum diaia pliska kum ra upla 15 ra pistal ni sabi ikan” (2022 julio kati 10, The Guardian).

• “Stechi kuntrika ra julio kati 4 ra liliaka kulki kan, bara naha yua nani ra upla 220 kau purara pistal ni sabi ikan sa” (2022 julio kati 5, CBS News).

¿Baha sât rau munanka nani ba yu kum danh takbia ki? ¿Baibil ba dîa wisa?

Rau munan lâka ba danh takbia

Baibil ba wisa wan piua ba “tnata yua nani” sa, bara upla nani ba saurakira, prautkira bara kupias kabia (2 Timoti 3:1, 3). Baha sât rau munan lâka ba upla ra sirang ikisa (Luk 21:11). Sakuna, Baibil pramis munisa rau munanka ba yu kum danh takbia, bara upla nani ba “kupia kumi pliska ra iwbia, kli pât munras watla nani ra iwbia, ris bri lilia kabia” (Aiseya 32:18). ¿Nahki tnatka ra rau munan lâka ba danh takbia?

Gâd ba upla saura nani âpu daukbia bara aiklabaia dukia nani sut ra sauhki tikbia.

• “Upla watawikira nani […] ba, tasba wina daikan kabia bara kangbi sin sakan kabia” (Sins Lâka 2:22).

• “[Gâd] war nani âpu daukan, tasba aiska ra; witin pantamangka nani kata sut krikan, langsa nani kata ba kriki, yuya man daukan; ¡war waginka nani kata ba angki âpu daukan!” (Lawana Nani 46:9).

Gâd bui upla nani ra kupia kumi lâka ra iwaia smalkbia, bara baku rau munanka buki trabilka nani âpu daukbia.

• • “Yang ilki holikira aiska ra saura munbia apia, sauhki sin tikbia apia, tasba ba Dawan tânka kaikaia lâka ni banhwan kabia, kabu pura aiska lî nani praki brin ba baku” (Aiseya 11:9).

• Naiwa piua ra sin, Gâd ba tasba aiska ra upla nani ra smalkisa rau munan lâka wina sait ra kaia, aiklabaia dukia nani yus munaia apia, bara “aiklabaia sordka nani bri ba, baha ni witin nani tasba tukbaika nani paskbia, ai langsika nani ba ni sin ispara nani paskbia” (Miqueas 4:3).

Tasba ra sibrin lâka âpu kabia Baibil pramiska ba kau lan takaia want sma kaka, “¿Es posible librarse del miedo?” ulbanka ba aisi kaiks.

Rau munan lâka nahki ban kaia ra âpu daukbia ba nu takaia want sma kaka, “¡Por fin paz en la Tierra!” ulbanka ba aisi kaiks.