War aiklabanka bara tasba sauhkanka nani ba piu bani tasba aiska ra plun tiwan trabilka ba kau tara daukisa | ¿Baibil dîa wisa?

Ucrania war aiklabanka bara tasba sauhkanka nani tâka, tasba aiska ra plun tiwanka trabilka tara takisa. Naha ba kau pali kuntri umpira nani ra ambuk munisa, kan naha sât kuntrika nani ra plun aitani briaia ba karna pali munisa.

• “War aiklabanka nani, tasba sauhkanka nani, bara gias mana uba uli ba mita, insla nani bara plun yui kampanika tara nani ba, upla sut dukiara plun aitani sakaia karna munisa” (António Guterres, Kuntri nani Asla Takanka wihtika, julio kati yua 17, 2023).

• “Tânka pliki kakaira nani wisa Rusia kuntrika ba plun mâ nani kuntri kum wina kuntri wala ra blikaia lâka ba danh kulkras ba mita, tasba aiska ra plun tiwanka ba kau saura takaia sip sa, bara naha tâka kuntri umpira nani ra plun ba kau mana kabia, kau pali Africa yahbra tani bara Oriente Medio kuntrika nani ra” (Atalayar.com, julio kati yua 23, 2023).

Plun tiwanka trabilka bara naika piua ra dîa takbia ba dukiara Baibil dîa wi ba kaiks.

Baibil ba plun tiwanka dukiara prapit dahra aisan

• Jisas ba naku win: “Kuntri kum mita wala mapara aiklabia, tasba kum mita wala mapara war aiklabia; plun tiwan sin […] plis aiail ra kabia” (Matiu 24:7).

• Param Marikan bukka ra aras âiulra 4 dukiara aisisa, kumi bani ba tânka kum marikisa. Witin nani tila wina kum ba war aiklabanka tânka marikisa, bara witin ningkara aula ba, plun tiwanka tânka marikisa. Naha prapit aisanka ba piua kum dukiara aisisa, naha piua ra upla nani ba plun wiria baman atkaia sip kabia, kan praiska ba uba mana kabia. “Yang kaikri, bara baha ra aras siksa kum kan, baha purara uli kan ba ai mihta ra paun kum bri kan. Bara [...] bîla baikra kum naku aisi kan walri: ‘Plawar kwart kumi mana ba silin kumi [de kum wark takan mana praiska], bara barli mâ kwart yumhpa ba silin kumi’” (Param Marikan 6:5, 6).

Plun tiwan dukiara naha prapit aisanka nani ba naiwa piua ra aimakisa, bara Baibil ba naha yua nani dukiara “tnata yua nani“ nina mâkisa (2 Timoti 3:1). “Tnata yua nani” bara aras âiulra nani 4 marikanka dukiara kau nu takaia want sma kaka, Tasba ba mani 1914 wina sât wala takan lilkika ba kaiks, baku sin, “¿Qué representan los jinetes del Apocalipsis?” ulbanka ba aisi kaiks.

¿Baibil ba nahki hilp wan munisa?

• Plun mana uli ba, bara plun wahwanka nani baku, trabil sât sât mapara bapi buaia dukiara Baibil ba smalkanka painkira nani wankisa. “Cómo vivir con menos” ulbanka ra baha hilpka kum kum kaikaia sip sma.

• Baibil ba bîla kaikanka sin wankisa. Wan marikisa trabilka nani ba wapnika mangkbia. Pramis munisa, yu kum naha tasba ra “plawar mâ ailal bâra kabia”, bara upla kumi sin plun wahbia apia (Lawana Nani 72:16). Wan kaina piua ba nahki kabia, bara dîa muni naha bîla kaikanka ra kasak lukaia sip sa sapa, kau nu takaia want sma kaka, “La esperanza real de un mañana mejor” ulbanka ba aisi kaiks.