Bum aihka saura nani yus muni war aiklabanka ba | ¿Baibil dîa wisa?

Tasba gabamintka nani ba bum aihka saura nani bri ba, bara kau paski ba mita tasba aiska ra war aiklabanka kum tâ krikaia baku talia sa. Baha mita upla nani ba uba wari takisa, kan bum aihka saura nani bâra ba mita, sip sa war aiklabanka kum tâ krikaia. Bara manis ba ai sringka sa kuntri kum kum naha sât bum aihka saura sirpi kabia kra sin yus munbia kaka tasba aiska ra sauhki tikanka tara kum daukbia. Boletín de científicos atómicos ra aisi ba baku, “tasba aiska ra war aiklabanka kum bum aihka saura nani wal tâ krikbia sringka brisa”.

¿Bum aihka saura nani wal sip sa ki war aiklabanka kum tâ krikaia? ¿Tasba ba sauhki tikan kabia ki? ¿Bum aihka saura nani wal war aiklabanka kum tâ krikbia ba dukiara wan sringka brisa kaka, yawan dîa daukaia sip sa ki? ¿Baibil ba dîa wisa?

Naha ulbanka ra naha makabi walanka nani ra ansa munbia:

¿Bum aihka saura nani wal war aiklabanka kum tâ krikbia ba dukiara Baibil aisisa ki?

Baibil ba naha sât war aiklabanka nani dukiara aisaras. Ban sakuna, prapit aisanka kum kum ra wisa upla lukanka bara daukanka saura tâka mita war aiklabanka nani tâ krikaia sip sa bara naha tilara sa bum aihka saura wal war aiklabanka kum.

Naiwa piua ra tasba aiska ra dîa taki ba naha Baibil smalkanka nani wal praki kaiks:

Baibil tikska: Jisas bahara iwi kan ba ra, ai disaipilka nani bal, pusbi win: “Naha na ahkia kabia sapa yang nani ra ai wis. ¿Man balaia sma ba bara tasba tnata sainka ba sin ani kabia ki?” Bara Jisas witin nani ra win: “Kan kuntri kumi mita wala mapara aiklabia, tasba kum mita wala mapara war aiklabia” (Matiu 24:3, 7).

Tasba aiska ra dîa taki ba: Kuntri manis ba, baha tilara bum aihka saura paskaia karnika bri nani ba, naiwa piua ra war aiklabisa.

“Naha las manka nani ra tasba aiska ra rau munan lâka kau ailal bâra sa bara war aiklabanka nani sin” (Proyecto de Datos de Localización y Eventos de Conflictos Armados).

Baibil tikska: “Ban sakuna, piua ba balbia ba ra, muna tani kingka ba yahbra tani kingka mapara aiklabia” (Daniel 11:40).

Tasba aiska ra dîa taki ba: Baibil aisan baku kuntri kum kum ba kuntri wala nani mapara aiklabisa bara marikaia want sa ya kau karnika tara brisa. Karnika kau tara bri kuntrika nani ba dairik war aiklabanka nani bukras talia sa, ban sakuna war aiklabaia dukiara bum aihka saura nani paski auya sa.

“Naha las 10 manka nani bilara kaiki aula sa nahki kuntri nani ba pana pana aiklabisa, bara baha tilara karnika tara bri kuntrika nani ba war aiklabi kuntrika nani ra tâ baikisa” (Programa de Datos sobre Conflictos de la Universidad de Uppsala).

Baibil tikska: “Baku sin man nani tânka bri kaia sma, tnata yua nani ra piua karna nani balbia. Upla nani ba [...] klauna ai dukiara baman luki kabia, upla nina aisasara nani kabia, ai wîna brinka nani sip alki takaskras kabia, kupias nani [...] kabia” (2 Timoti 3:1-3).

Tasba aiska ra dîa taki ba: Naiwa piua ra upla manis ra taki ba baku, tasba aiska gabamintka tâ brabrira nani ra karna munisa asla lâka ra lukanka kumi briaia. Witin nani ba ai trabilka nani ba kupia kumi lâka ra wapni mangkaia watlika ra, ai karnika ba yus munisa wala nani ra taibi munaia dukiara. Naha sât daukanka tâka mita bum aihka saura nani wal war aiklabanka kum tâ krikaia sip sa.

“Yawan wan trabilka nani ba kupia kumi lâka ra wapni ra mangkaia trai munras sa kaka, trabil nani bara war aiklabanka nani ba sauhki tikanka kau tara nani daukbia” (Samir Saran bara Jane Harman, Foro Económico Mundial).

¿Bum aihka saura nani wal war aiklabanka kum tâ krikbia Gâd ba swibia ki?

Baibil ba baha dukiara aisaras. Ban sakuna, Luk 21:11 ra wisa “sain aihka nani” yawan piua ra kaikbia. Baha sain aihka nani tilara sa, Sekan war aiklabanka kau tara ra bum aihka saura nani lulkan piua ra. Baibil ba tânka marikisa dîa muni Gâd ba war aiklabanka nani takbia swin sa. Naha tânka dukiara kau nu takaia want sma kaka ¿Dîa muni Gâd swin pât wahwanka ba naiwa piua kat takisa? lilkika ba kaiks.

¿Tasba ba sauhki tikan kabia ki?

Apia. Bum aihka saura nani yus munbia kra sin, Gâd ba swibia apia tasba na sauhki tikan kabia. Baibil ba wisa naha tasba ba sauhki tikan kabia apia bara upla nani ba ban kaia ra iwbia.

“Tasba ba, aihka takras ban bâra sa” (Smasmalkra 1:4).

“Kasbrika pura Papaskra ba, witin sika Gâd bara Dawan ba, tasba ba dauki bara paskan ba, [...] witin baha paskan ba, bilara diara âpu kaia dukiara paskras kan, sakuna upla nani bâra iwi kaia” (Aiseya 45:18).

Upla kum kum lukisa, naika piua ra, bum aihka saura nani wal war aiklaban tâka mita tasba sauhkan kabia bara baha sauhkanka tilara upla wiria baman iwi kabia. Kuna Baibil ba smalkisa, tasba ra war aiklabanka tâka sauhkanka tara bâra kabia kra sin tasba ba pas tâura kan ba baku ban kabia.

“Upla iwras tasbaya ba, lilia taks, tasba lâwan nani yakan swin kan ba lilia takbia, lapta tasbaya ba sin lilia bribia, tangni baku tangnika baiwbia” (Aiseya 35:1).

Paradais ra upla nani ba liliakira wark taki banhwisa. — Gâd ba want sa yawan sut liliakira paradais ra iwbia

Wan Papaskra ba naha tasba paskan taim, kli raya takaia karnika wal daukan. Gâd ba ai karnika yus munbia naha tasba kli raya daukaia dukiara bara yawan nu sa wan tasbaya ba Gâd paskan sa upla nani iwi kabia dukiara (Lawana Nani 37:11, 29; Param Marikan 21:5).

Bum aihka saura nani wal war aiklabanka kum tâ krikbia ba dukiara wan sringka brisa kaka, ¿yawan dîa daukaia sip sa ki?

Upla kum kum ba war aiklabanka nani bum aihka saura wal takbia dukiara uba sibrin lukisa, wibia sa kaka, witin nani uba lukisa nahki naha war aiklabanka nani ba sauhki tikanka tara nani daukbia ba dukiara. ¿Baibil pramiska bara smalkanka nani ba nahki hilp wan munisa naha sibrinka lâka mapara bapi buaia bara âuyapah lâka briaia ba dukiara?

Baibil ba naha tasba bara upla nani dukiara bîla kaikanka painkira kum dukiara aisisa. Naha bîla kaikanka dukiara lan takaia ba grapin kum baku kaia sip sa, kan hilp wan munisa sibrin lâka ba pura luaia dukiara (Hibru Nani 6:19). Baku sin hilp wan munbia naika piua ra dîa takbia ba dukiara uba lukaia apia. Jisas aisan baku, “Bamna yauhka yua ba dukiara trabil taki lukpara, kan yauhka ba piua bâra kabia trabil taki lukaia. Kan yua bani ba silp ai trabilka nani brisa” (Matiu 6:34).

Raitka pali ba yawan kumi bani wan sinska ra dîa luki ba bara nahki wan dara wali ba aman kaikaia sa. Tânka kum baku, sibrin wan dauki aisanka nani ba walaia bara kaikaia apia sa, bum aihka saura war aiklabanka nani dukiara upla nani dîa aisi ba, dîa luki ba apia kaka tilivisan ra sturka nani taki ba sin. Naha tânka apia sa tasba aiska ra dîa taki ba sut kunin baku kulkaia sa. Kau ni, yawan karna trai munaia sa naha tasba ra dîa taki ba dukiara uba lukaia apia, kan las kat dîa luki ba ban kra takbia apia.

“Kupia wirha lâka mita upla spiritka ba batakisa, sakuna bîla yamni kumi, baha ba lilia sakisa” (Sins Lâka 12:25).

Sturi saura nani wan tnaya ra swi si rayakam ra dîa dîa yamni brisma ba dukiara luks.

“Bamna Gâd bui man nani ra bîla kaikaia lâka maiki ba, lilia bara kupia kumi lâka ni mai banhkbia” (Roman 15:13).

Lilka nani: Waitna kum naika piua dukiara kasak lukan lâka wal kaikisa. 1. Ai nina ra war aiklabanka nani lilkika kum kum takisa: war aiklabaia plenka kum, war aiklabaia bum aihka saura nani bara bum aihka saura kum baiwan kiasmika kaikisa. 2. Ai mawanra kaikisa tasbaya klin kum, daiwan nani, il nani, giadin painkira nani bara awala kum. — Yawan kasak lukaia sip sa naika piua dukiara Baibil dîa pramis muni ba kasak sa

Gâd pramiska nani dukiara kau lan takma kaka, lilia lâka, âuyapah lâka bara bîla kaikanka painkira kum maikbia.

¿Baibil ra aisisa Armagedan war aiklabanka ra bum aihka saura nani yus munan kabia ki?

Upla kum kum lukisa Armagedan warka ba, bum aihka saura wal war aiklabanka kum sa. Witin nani ba baha warka nahki sauhki tikanka tara swibia ba dukiara lukisa.

Kuna Baibil ra, “Armagedan” bîla ba tânka sa “tasba aiska kingka nani” war aiklabanka kum, wibia sa kaka, tasba gabamintka nani Gâd mapara war aiklabiaa (Param Marikan 16:14, 16). Baha mita, naha war aiklabanka ba tânka apia sa bum aihka saura nani wal war aiklabia. Armagedan war aiklabanka ra Gâd ba upla saura nani wihki upla pain nani aikuki sauhki tikan kabia apia. Kau ni, upla saura nani ra baman. Bara baku tasba ra âuyapah lâka bara kupia kumi lâka ra iwaia sip kabia (Lawana Nani 37:9, 10; Aiseya 32:17, 18; Matiu 6:10).

Baibil smalki ba baku ¿war aiklabanka nani ba nahki tnata mangkan kabia?

“Witin war nani âpu daukan, tasba aiska ra; witin pantamangka nani kata sut krikan, langsa nani kata ba kriki, yuya man daukan; ¡war waginka nani kata ba angki âpu daukan!” (Lawana Nani 46:9).

Jehovab ai karnika ba nisan nani sut ra marikan kabia witin ba trabil nani bara war aiklabanka nani sut tnata mangkan kabia. Naha ba ai Kingka lâka bâk daukbia, ai gabamintka ba heven ra sa bara tasba aiska tâ bribia (Daniel 2:44).

Gâd Kingka lâka ba upla nani ra smalkbia nahki kupia kumi lâka bara asla lâka ra iwaia. Tasba aiska ra gabamint kumi baman bâra kabia ba mita, kuntri nani ba pana pana aiklabia apia. Bara upla nani ba “war aiklabaia laka nani sin kli smalkbia apia” (Miqueas 4:1-3). Baku sa kaka, ¿dîa takbia? “Upla nani sut ai wainka nasla nani ra, kwah damni dusa nani distika ra sin, ban ai kupia kumi iwi kabia, sibrin sin daukbia apia” (Miqueas 4:4).

a “¿Qué es el Armagedón?” ulbanka ba aisi kaiks

b Gâd nina ba sika Jehova (Lawana Nani 83:18, SLN). “¿Quién es Jehová?” ulbanka ba aisi kaiks

¿Param Marikan bukka ra war aiklabanka kum bum aihka saura nani wal dukiara aisisa ki?

Upla kum kum lukisa Param Marikan bukka ba aisisa tasba aiska ba war aiklabanka ra bum aihka saura kum wal sauhki tikan kabia (Param Marikan 6:14; 8:7-12; 16:1-21). Tânka kum baku, borska kum ra wisa “kasbrika purara ba wina tasba ra pauta klauhan yan kauhisa” (Param Marikan 13:11-13). Ban sakuna, yang nani Jehova witniska nani ba wan tânka brisa naha tikska ba Sekan war aiklabanka kau tara ra bum aihka saura lulkan ba dukiara aisisa, tasba ra sauhkanka tara kum dukiara lika apia.

Param Marikan bukka ba war aiklabanka nani ra bum aihka saura yus munbia ba dukiara tânka marikisa, ban sakuna nahki sauhki tikanka tara swibia ba dukiara sitnika kat aisaras. Param Marikan bukka ba aisi kaikma taim, kupiam krauks:

Naha bukka ra diara aihka kaikan ba dukiara aisisa, kuna yawan nu kaia sa naha nani ba maprika lilkika nani sa (Param Marikan 1:1).
Upla nani ra sibrin ra dingkaia dukiara ulbras kan. Kau ni, ya ai tânka bribia bara ai smalkanka alki daukbia nani ra lilia lâka yabaia dukiara ulban (Param Marikan 1:3).

Naha tânka dukiara kau lan takaia dukiara “¿Cuál es el mensaje del libro de Apocalipsis?” ulbanka ba aisi kaiks