¿Pulitik daknika nani ba sip karna bapi buras ba Baibil prapit aisanka kum ba wal aimakisa ki?

Naiwa piua ra, upla nani ba pulitik bisniska nani tâka mita tar baiwan lâka ra iwisa. Witin nani ba yu bani naha tasba lâka nani dukiara lukanka sât sât brisa bara dîa luki ba ai kupia baiwan lâka ra aisi banhwisa. Gabamint bilara lâ nani mangki uplika apia kaka wark wala bri nani ba asla lâka ra wark takras bara ai lukanka chens munaia wilin apia sa. Naha trabilka nani tâka mita pulitik daknika nani ba sip karna bapi buras sa bara gabamint ba ai warkka ba sip pain daukras sa.

Kuna naha trabilka ba Stech kuntrika bara Reino Unido kuntrika ra kau ailal bâra sa. ¿Kuna dîa muni yawan baku aisisa? Kan Baibil ba prapit aisan naha kuntrika nani ba baha sât trabilka nani bri kabia piua ra, Gâd Kingka lâka ba baha trabilka ba tasba aiska ra chens munbia.

Pulitik daknika nani sip karna bapi buras ba wal “naika dîa takaia ba”

Daniel bukka ba prapit aisanka aihka painkira kum brisa. Baha prapit aisanka ra Gâd param marikan “naika dîa takaia ba”. Naha bîla nani ulban taim, kaina piua dukiara aisi kan, upla nani mapara tânka tara bri dukia kum takai kan ba dukiara (Daniel 2:28).

Gâd ba Babilon kingka ra yaprisauhkanka kum bâk naha prapit aisanka ba marikan. Baha yaprisauhkanka ra, king ba upla lilka tarka tara kum kaikan ayan sât sât ni paskan kan ba. Baha ningkara, prapit Daniel ba tânka marikan baha pîska sât sât nani ba tasba aiska kingka karnika tara bri nani ba tânka marikisa. Baha nani ba piu kum ai kingka lâka karnika tara bribia bara ningkara sauhki tikan kabia.a Piu kum lubia ningkara, walpa tara kum baha upla lilka tarka tara mina ra pruki sauhki tikbia. Bara baha walpaya ba tânka sa king lâka kum, apia kaka gabamint kum, Gâd mita bapi mangkan ba (Daniel 2:36-45).

Prapit aisanka marikisa, Gâd Kingka lâka ba tasba gabamintka nani sut ra pura lui king aimakbia. Baha sim Kingka lâka ba Jisas ai nina blablikra nani ra Gâd ra makabia smalkan. Witin ba naku smalki win: “Man king aimakaia ba yarka balbia” (Matiu 6:10).

Kuna ¿naha prapit aisanka ra ani pîska ra marikisa naiwa piua gabamintka nani ba sip karna bapi buras kabia? Baha upla lilka tarka tara mina nani ra luki kaiks. Baha nani ba “ayan ni bara slaubla ni sin paskan kan” (Daniel 2:33). Naha pîska ba sât wala kan upla lilka tarka tara pîska wala nani ba wal, kan baha pîska wala nani ba diara karna nani wal paskan kan. Baku bamna, king lâka kum sât wala kabia wala nani ba wal. ¿Dîa tânka ra? Naha ba Daniel prapit aisanka ra naku tânka marikisa:

Naha prapit aisanka ba marikisa, upla lilka tarka tara mina nani tânka sa kingka lâka ba sip karna bapi buras kabia. Kan ai uplika pali nani ba ai karnika bri ba mâyara ikbia.

Daniel prapit aisanka ba nahki aimakisa

Upla lilka tarka tara mina nani ba tânka marikisa Stech bara Reino Unido kuntrika nani aslika lâka ba. ¿Naiwa piua ra dîa taki ba wal nahki naha tânka ra tâ baikisa?

Yawan pat aisan baku upla lilka tarka tara mina nani ba “ayan bara slaubla ni sin daukan” kan, naha abalkanka ba swapni pali sa (Daniel 2:42). Naiwa piua ra Stech bara Reino Unido kuntrika nani karnika ba mâyara iwan sa, ai uplika nani tar baiwan lâka ra iwi ba mita. Tânka kum baku, naha kuntrika nani wâl ra upla nani ba pana pana unsabisa. Baku sin, upla nani ba ai raitka yabia makabisa rau munan lâka wal. Aima aihkika ra witin nani ra tâ bribia dukiara silp wahbi sakan uplika nani ba asla lâka ra wark takras. Baku tar baiwan lâka ra iwi ba mita, gabamint ba diara manis daukaia want sa, kuna sip apia munisa.

Kaisa Daniel prapit aisanka ba sitnika kat laki kaikaia, dîa tânka sa bara nahki naiwa piua ra aimaki ba.

Prapit aisanka ba: “King lâka kum, sakuna baiki sakan kabia, âu, karnika lika wiria bri kabia, kan ayan ni paskan bamna” (Daniel 2:41).

Tânka ba: Ai uplika nani ba tar baiwan lâka ra iwisa, ban sakuna Stech bara Reino Unido kuntrika nani ba war aiklabaia daknika karnakira nani brisa. Baha mita ai karnika ba ayan baku sa.

Nahki aimaki ba

2023 mânka ra war aiklabaia dukiara kau lalah aibapan kuntrika nani tilara sa, Stech bara Reino Unido kuntrika nani ba. Witin nani ba kuntri 12 asla taki dîa aibapi ba purkara kau lalah ailal aibapan (Stockholm International Peace Research Institute [Instituto Internacional de Estudios para la Paz de Estocolmo]).

“Reino Unido bara Stech kuntrika nani ba ai tasbaya kaina kahbaia dukiara asla wark taki ba [...] piu bani kau asla karna bara dutki takisa [...;] yawan asla wark takisa, pana pana wan kaina kahbisa, aikuki aiklabisa” (Comando Estratégico, Ministerio de Defensa del Reino Unido, abril de 2024).

Prapit aisanka ba: “Mina sirpika nani ba ayan bara slaubla ni sin daukan ba, baha tânka ba kingka lâka ba ai karnika kabia, ban sakuna swapnika sin bri kabia” (Daniel 2:42).

Tânka ba: Witin nani war aiklabaia daknika karnakira kum brisa, ban sakuna Stech bara Reino Unido kuntrika nani ba ai uplika nani aihkika witin nani ra tâ baikras ba mita, lâ kum kum bapi mangkaia karna munisa.

Nahki aimaki ba

“Tânka pliki kakaira kum kum ba wisa, Stech kuntrika ra pulitik daknika nani tilara tar baiwan lâka bâra ba mita, tasba aiska ra ai karnika ba yus munaia karna munisa, tânka kum baku, kaina kahbaia apia kaka bisnis nani daukaia tânka ra” (The Wall Street Journal).

“Pulitik daknika nani sip karna bapi buras tâka mita [...] pulitik bara gabamint uplika [británico] nani ba, wari taki banhwisa kan tawan uplika nani dukiara chens nani daukaia sip apia munisa” (Institute for Government [Instituto de Gobierno]).

Prapit aisanka ba: “Witin nani [wibia sa kaka, baha kingka lâka] asla takan kabia marit taki ba baku lâka ra asla taki kabia ba mita; ban sakuna, witin nani sut kumi pali takbia apia” (Daniel 2:43).

Tânka ba: Ban kra upla nani ba, gabamint nani wahbi sakanka nani tilara dimaia sip sa. Ban sakuna, las kat, gabamint uplika nani bara tâ baiki uplika nani ba sin witin nani dîa wahbi saki ba wal lilia apia sa.

Nahki aimaki ba

“Naiwa piua ra, Stech kuntrika uplika nani ba ai gabamintka bara pulitik daknika uplika nani dukiara lukanka saura kum brisa” (centro de investigación Pew Research Center).

“Naha 50 mânka bilkara pas trip kaikisa Reino Unido kuntrika uplika nani ba nahki pulitik daknika bara ai gabamintka ra kasak lukras ba” (National Centre for Social Research [Centro Nacional de Investigación Social]).

Prapit Daniel aisanka ba nahki aimakbia

Naha prapit aisanka mariki ba baku, Stech bara Reino Unido kuntrika nani ba tasba aiska ra karnika tara bri kabia. Gâd ba tasba gabamintka nani sut ra pura lui ai Kingka lâka ba bapi mangkan kabia (Daniel 2:44).

Naha prapit aisanka wal talia ulban ba, Param Marikan bukka ra takisa, Baibil ba marikisa “tasba aiska kingka nani” asla takbia Jehovab mapara Armagedan ra war aiklabaia dukiara, “Gâd witinka karnika sut bri ba yua tara warkka ba dukiara” (Param Marikan 16:14, 16; 19:19-21). Naha war aiklabanka ra, Jehova tasba gabamintka nani sut ra sauhki tikan kabia. Prapit Daniel aisanka ra upla lilka tarka tara tânka mariki tasba kingka nani kumi sin âpu kabia.

Naha tânka dukiara kau nu takaia want sma kaka, “¿Qué es el Armagedón?” ulbanka ba aisi kaiks.

Dîa muni yamni sa naha prapit aisanka ba wan tânka briaia

Baibil ba prapit aisan nahki Stech bara Reino Unido kuntrika nani ra pulitik daknika nani ba sip karna bapi buras kabia. Naha wan tânka briaia ba hilp wan munbia naiwa piua ra dîa taki ba lukanka wala wal kaikaia dukiara.

• Tânka brima dîa muni Jisas ai nina blablikra nani ra win naha tasba pulitik bisniska tilara dimaia apia sa (Jan 17:16). Baku sin, tânka brima dîa muni Jisas — Gâd mita ai Kingka lâka kingka kabia bâk sakan ba — win: “Yang kingki lâka ba naha tasba wina apia sa” (Jan 18:36).

• Kasak lukaia sip kama Gâd Kingka lâka ba naha tasba trabilka nani ba wapni ra mangkbia bara upla sut dukiara blisin pranakira nani bri balbia, Gâd pramis munan ba baku (Param Marikan 21:3, 4).

• War aiklabanka nani mita tasba aiska sauhki tikbia lukanka ba wina pri takma (Lawana Nani 37:11, 29).

Daniel prapit aisanka ba marikisa upla lilka tarka tara mina nani tânka mariki kingka lâka, wibia sa kaka Stech bara Reino Unido kuntrika nani aslika lâka ba, naha tasba tâ bribia las gabamintka kabia. ¿Ya baha ningkara balbia? Gabamint kasakkira kum heven wina king aimakbia ba, naha sika Gâd Kingka lâka ba.

Gâd Kingka lâka tasba aiska uplika nani dukiara dîa daukbia kau nu takaia want sma kaka, ¿Gâd Kingka lâka ba dîa sa ki? lilkika ba kaiks