¿Tasba aiska ra ban kaia ra bapi bui gabamintka kum bâra sa ki? | ¿Baibil dîa wisa?

Tasba aiska gabamintka nani ba trabil ailal bri banhwisa. Tânka kum baku, blahwanka nani, aiklabanka nani, bara iliksan piua ra upla nani ba witin nani ra tâ baikras sa, kau ni gabamintka nani mapara buisa, bara pulitik tar baiwanka lâka sin bukisa, naha sât trabilka nani ba mita karna bapi bui talia gabamintka nani ra kat sin ambuk munisa.

Baibil ba tânka marikisa ban kaia ra bapi bui gabamintka kum bâra sa. Ban kra baha dukiara man pat walram sa, Jisas Yawan Aisa pura sunra ba ra baha gabamintka dukiara aisan.

• “Baha mita, man nani naku puram suns: ‘Yawan Aisa kasbrika purara sma ba, ninam ba holikira kulkan kabia. Man king aimakaia ba yarka balbia. Man kupiam lâka tasba ra daukan kabia, kasbrika purara dauki ba baku’” (Matiu 6:9, 10).

¿Baibil ba baha Kingka lâka dukiara dîa smalkisa?

Baha Kingka lâka ba ban kaia ra bapi bui gabamintka kum sa

Baha Kingka lâka ba kasbrika pura wina aimakisa.

• Jisas “King lâka kasbrika purara ba” nina mâkan (Matiu 4:17; 5:3, 10, 19, 20). Baha mita Jisas win: “Yang kingki lâka ba naha tasba wina apia sa” (Jan 18:36).

Baha Kingka lâka naha tasba gabamintka nani ra pura lubia.

• Baibil naku smalkisa: “Ban sakuna king lâka wala nani sut ra pura lubia bâra ban kabia ban kaia ra” (Daniel 2:44).

Baha Kingka lâka ba, Jisas King baku sauhki tikan kabia apia.

• Baibil naku smalkisa: “Ai karnika ba ban kaia ra sa, ai kingka lâka ba sauhki tikan kabia apia” (Daniel 7:13, 14).

Baha Kingka lâka ba tasba ra kupia kumi lâka bara âuyapah lâka ba bri balbia.

• Baibil ba naku smalkisa: “Upla nani sut ai wainka nasla nani ra, kwah damni dusa nani distika ra sin, ban ai kupia kumi iwi kabia, sibrin sin daukbia apia” (Miqueas 4:4).

Gâd Kingka lâka dukiara kau lan taks

Jisas tasba ra kan piua ra witin piu aiska “Gâd king aimaki ba lâka sturka yamni ba” dukiara smalkan (Matiu 9:35). Baku sin witin kaina manis dukiara naku aisan:

• “Bara naha king lâka sturka yamni na tasba aiska ra smalkan kabia, kuntri sut baha ba pain kaikbia dukiara; bâra lika tnata ba aimakbia” (Matiu 24:14).

Naiwa piua ra baha Kingka lâka sturka yamni nani ba 240 kuntri nani bara plis sât sât ra kau purkara smalkisa. ¿Baha Kingka lâka ba dîa yamnika nani wankbia? ¿Man nahki baha yamnika nani ba briaia sip sma? Mai paiwisa baha Kingka lâka dukiara kau lan takma.

¿Gâd Kingka lâka ba dîa sa ki? lilkika ba kaiks.