¿Jehova witniska nani ba prisant nani dîa dukiara yus munisa?
Kristian warkka bara wan asla takanka dukiara prisant nani yus munisa. Yawan wan warkka ba diara kum dukiara daukisa, upla nani Jisas Kraist disaipilka nani takbia hilp munaia dukiara; baha sika wan warkka ba (Matiu 28:19, 20).
Upla kum lalahkira takbia dukiara prisantka nani yus munras. Jehova witniska kumi sin ba utla utla ra smalki ba mita, apia kaka kangrigisan kum tâ bri ba mita lalah briras. Baku sin, wan asla takanka ra piua aiska wark taki nani ba, wibia sa kaka, Jehova witniska nani apiska tara nani, apia kaka tasba aiska apiska kau tara ra wark taki nani ba, Tâ Bri Dakni ba, apia kaka pura kaiki nani ba ra lalah aibapras.
Dîa nani daukisa
Ulbanka nani paskaia warkka: Mani bani Baibil apia kaka Baibil wina ulbi sakanka nani milian milian bîla laki, print muni, bara upla mihta ra mana luha yabisa. Baku sin, wan ulbi sakanka nani ba Internet pliska jw.org ra, bara JW Library aplicaciónka ra sin mana luha briaia sip sa, bara diara atkaia maisa pakanka nani briras sa.
Diara paski mâkaia bara main kaikaia warkka: Tasba aiska ra mayunaia pliska nani mâkisa bara main kaikisa. Bahara tingki, wan kangrigisanka nani ba asla taki Gâd ra mayunaia sip sa. Baku sin, apis tara nani bara bîla lakaia apiska nani mâkisa bara main kaikisa. Naha warkka aihkika ba mana luha daukisa, baku lalah uya tikras sa.
Wan asla takanka dukiara: Tasba aiska smalkaia warkka dukiara lalah prisant yaban ba wina yus munisa, tasba aiska apiska kau tara, apis tara nani, bîla lakaia apiska nani bara impaki pura kakaira nani warkka ba tâ baikaia dukiara.
Smalkaia warkka: Sturi yamni apia kaka Gâd Bîla smalkaia dukiara, Jehova witniska kumi ra sin lalah aibapras sa (2 Korint 2:17). Ban sakuna, pas handat mani kristianka nani baku, piua aiska smalkaia warkka daukbia wahbi sakan nani ra takaskaia pliska isi kum, bara ai nitka dukiara hilp lupia kum yabisa (Pilipai 4:16, 17; 1 Timoti 5:17, 18).
Lan daukaia warkka: Aidrubanka tara nani daukaia dukiara sin prisant nani yaban ba yus munisa, baku sin, Baibil wina sakan walaia dukia nani bara lilka nani sin paskisa. Kangrigisan almukka nani bara piua aiska smalki tataukra nani ai warkka kau pain daukbia hilp munaia dukiara, skul sât sât ra lan daukisa.
Hilp yabaia warkka: Tasba sauhkanka nani, apia kaka blahwanka tara nani takisa taim, ya nitka bri nani ra plun, lî bara takaskaia pliska yabi hilp munisa. Naha hilp yabaia warkka wina “kasak lukan lâka ra wan muihni nani” baman yamnika briras, Jehova witniska apia nani sin yamnika brisa (Galesha 6:10).