¿Jehova witniska nani ba Jisas ra kasak lukisa ki?

Âu. Jisas witin pali naku win: “Yang sika yabal ba, kasak tânka ba bara rayaka ba sin. Yang bâk baman sip sa Aisa ra waia” (Jan 14:6). Yang nani Jehova witniska nani ba kasak luki banhwisna, Jisas heven wina naha tasba ra balan ai rayaka sunukira ba sakripais baku yabaia dukiara (Matiu 20:28). Witin pruan bara raiti wina kli buan ba mita, ya nani witin ra kasak lukbia ba raya ban kaia lâka bribia (Jan 3:16). Baku sin, kasak luki banhwisna Jisas ba heven ra Gâd Kingka lâka Kingka aimakisa, bara tasba aiska ra kupia kumi lâka bri balbia (Param Marikan 11:15). Ban sakuna, witin win: “Witin [Aisa] ba kau tara sa yang ba wal” (Jan 14:28). Yang nani naha bîla nani ba kasak luki banhwisna. Baha mita, Jisas ra karnika sut bri Gâdka baku kaikras bara mayunras.