¿Jehova witniska nani ba ani wina lalah sakisa ki?

Tasba aiska ra wan warkka ba Jehova witniska kumi bani ai kupia wina prisant nani yabi ba wal daukisa.a Naha prisantka nani ba aidrubaia pliska nani ra bakska nani bâra ba ra dingkaia sip sa, apia kaka wan Internet pliska jw.org ra prisant yabaia tnatka wala nani mariki ba bâk sin yabaia sip sa. Upla bani dîa dukiara prisant yabaia wahbi sakaia sip sa, tasba aiska smalkaia warkka, kangrigisan nitka, apia kaka wâlsut dukiara.

Jehova witniska kumi ra sin makabras sa, 10 bani wina kumi (diezmo) yabaia. Baku sin ai pedika wina an pursent yabaia lâ kum mangkras sa (2 Korint 9:7). Aidrubanka nani ra kaliksan makabras, bara dimaia dukiara sin lalah makabras. Tahbi daukan lâka, upla pruan bikaia aisanka, marit lâka liliaka, bara diara wala dukiara lalah aibapaia makabras sa. Lalah sakaia dukiara plun pata, apia kaka diara wala upla ra atkras. Baku sin, bingo pulaia, loterías, rifas, kermes, plun piaia liliaka, apia kaka diara wala nani dauki lalah wahbras, upla ra lalah wankbia sin makabras. Bara ya mita prisant yaban ba aima kumi ra sin maisa pakras sa (Matiu 6:2-4). Baku sin, wan Internet pliska bara ulbi sakanka kumi ra sin diara wahwi maisa pakanka nani briras sa.

Jehova witniska nani kangrigisan sut ba kati bani aidrubanka nani ra maisa pakisa, kangrigisan ba lalah an yus munan, bara an brisa. Bara piua bani laki kaikisa lalahka ba wapni lâka kat yus munisa sapa (2 Korint 8:20, 21).

Nahki prisant yabaia sip sa

• Prisant yabaia bakska nani: Wan Asla Aidrubanka Watla, Aidrubanka Tara Watla, apia kaka aidrubaia pliska wala nani ra prisant yabaia bakska nani bâra sa. Baha bakska nani ra lalah apia kaka cheque dingkaia sip sma.

• Internet bâk prisant yabaia: Tarjeta de crédito, apia kaka débito, bank cuentika bâk, apia kaka electrónico tnatka wala nani bâk lalah prisant yabaia dukiara, kuntri ailal ra Internet wahia “Jehova witniska nani ra prisant yabaia” ba yus munaia sip sa.b Baku tnatka ra Jehova witniska kum kum ba kati bani “lalah wiria tnaya ra laki swi[sa]”, piua bani lalah prisantka yabi kaia dukiara (1 Korint 16:2).

  

• Kaina ra prisant ridi dauki yabaia: Prisant kum kum ba yabaia dukiara, kaina ra ridi daukaia bara lâ tânka kaiki nani hilpka plikaia nit sa. Naha tnatka ra prisant yabisa taim, ban kra, kuntri kum kum ra lal mana kau sipar kulkaia sip sa. Upla manis ra hilp munan sa, tânka plikaia ai prisantka nani yabaia nahki ridi munaia kau raya sa taim, apia kaka prubia taim. Naha tnatka nani dukiara kau nu takaia want sma kaka, lamamra Jehova witniska nani apiska tara wal aisaia sip sma:

  • bank cuentika nani

  • seguros bara kau almuk takras kaina ra dîa ridi daukram ba

  • bienes raíces ba

  • kampani ra lalah tâ baikram wauhkataya nani, bara lalah makabaia raitka ba

  • testament ra prisantka mangkaia, bara lalah apia kaka diara wala nani yamnika bara raitka yabaia

Iwisma pliska ra prisant yabaia tnatka nani dukiara, kau nu takaia want sma kaka, “Jehova witniska nani ra prisant yabaia” wahia ra dimi kaiks.