¿Dîa muni Jehova witniska nani ba Dawan Tutnika Pata ba sât wala daukisa rilidian wala nani dauki ba wal?
Yawan kasak pali trai kaikisa Baibil ra dîa win ba baku dauki waia, Jisas Pruan Kupia Kraukanka daukaia dukiara. Sip sa sin tnatka wala ra wiaia “Dawan Pata” apia kaka las tutnika pata (1 Korint 11:20). Baku sin, upla nani lukanka, bara rilidian wala nani ai tnatka nani ba naha yua nani ba Baibil ra ai bapanka nani bri banhras sa.
¿Dîa muni daukisa?
Yawan Dawan Tutnika Pata ba daukisa, Jisas yawan dukiara pât wahwan ba wan kupia kraukaia dukiara, bara wan tingkika marikaia dukiara (Matiu 20:28; 1 Korint 11:24). Jisas Pruan Kupia Kraukan ba sakrament kum apia sa, baku sin saurka swih tikaia dukiara, apia kaka yamnika kum sakaia dukiara rilidian nani daukanka tânka sin apia sa.a Kan Baibil ba marikisa Jisas ra kasak luki ba baman Gâd ba wan saurka nani ba swih tikaia sip sa, rilidian daukanka kum wal lika apia (Roman 3:25; 1 Jan 2:1, 2).
¿Aima an daukaia sa?
Jisas ai disaipilka nani ra adar yaban Dawan Tutnika Pata ba daukaia, kuna an taim daukaia wiras kan (Luk 22:19). Upla kum kum lukisa kati bani baha ba daukaia sa, wala nani wik bani, apia kaka yu bani, apia kaka yu kum bilara aima ailal daukaia, apia kaka upla kum daukaia nitka brisa kaka daukisa. Kuna diara kum kum bâra ba yawan nu kaia sa.
Jisas Dawan Tutnika Pata ba Insal Luan Yua liliaka Ju nani dauki ba sim yua ra daukan, bara awar nani luan taim pruan (Matiu 26:1, 2). Baha ba ban wina takras kan. Baibil ba Jisas sakripaiska ba Insal Luan Yua sîpka wal prakisa (1 Korint 5:7, 8). Insal Luan Yua liliaka ba mani kum bilara aima kumi baman dauki kan (Impakan Sturka 12:1-6; Libait Lâka 23:5). Patitara kristianka nani sin, Jisas Pruan Kupia Kraukanka ba mani bilara aima kumi dauki kan. Jehova witniska nani sin sim sât daukisa, kan yawan Baibil ra dîa wi ba nina blikisa.b
Yua bara awarka
Dawan Tutnika Pata Jisas nahki bapan ba aima an daukbia wiras, kuna ani yua bara awarka daukbia ba nu takaia hilp wan munisa. Baibil ra Ju nani kalindarka ra wi ba baku, nisán kati yua 14, mani 33 ra lapta dimi wan ningkara Jisas naha adarka yaban (Matiu 26:18-20, 26). Jehova witniska nani sin mani bani Jisas Pruan Kupia Kraukanka ba sim yua ra daukisa, patitara kristianka nani dîa daukan ba nina bliki.c
Mani 33 ra nisán kati yua 14 ba praidi ra kauhan kan, kuna mani bani wik bilara de wala nani ra kauhaia sip sa. Nisán kati 14 ba ahkia yua sa nu takaia dukiara, Jehova witniska nani tnatka kum yus munisa, Jisas Kraist piua ra dîa dauki kan ba nina blikisa, naha taim Ju uplika nani dîa dauki ba lika apia.d
Brit ba bara wain ba
Naha raya daukanka na brit îs luha bara wain pauni ba sin Insal Luan Yua pata takaskan ba Jisas yus munan (Matiu 26:26-28). Ba mita yawan sin yus munisa brit îs luha bara diara wala nani mangkras ba. Bara wain pauni wain mâ swahwan ba yus munras sa, bara wain laya ra sugar apia kaka diara wala nani mangkan ba sin apia.
Rilidian kum kum ba brit îs mangkan ba yus munisa, kuna Baibil ra aima ailal îs ba saurka lâka bara sauhki tikan lâka tânka marikisa (Luk 12:1; 1 Korint 5:6-8; Galesha 5:7-9). Baha mita, brit îs luha bara diara wala mangkras ba pain tânka marikisa Jisas wîna tara saurka luha ba (1 Pita 2:22). Rilidian wala nani wain watlika ra wain mâ laya yus munisa. Baha Baibil dîa wi ba mapara sa. Baku dauki banhwisa Baibil ra bapanka âpu kira ni rum diaia apia lukanka ba wal (1 Timoti 5:23).
Jisas wîna tara apia kaka ai tâlia rait aihwa tânka apia sa, tukinka nani baman sa
Brit îs luha bara wain pauni ba Jisas Pruan Kupia Kraukanka ra yus munisa tukinka baku. Jisas wîna tara bara ai tâlia ba tânka sa. Upla kum pisa apia kaka ai talia nani ra diara aihka lakuya tânka apia sa, upla tila nani luki ba baku. Baku sin ai wîna tara ba tala wal miks munras. Kaisa yawan naha Baibil bapanka kum kaikbia.
Jisas ai disaipilka nani ra ai tâlia ba dibia win kan kata, witin nani ra makabai kan Gâd lâka nani tala piaia apia win ba krikaia kan. (Blasi Sturka 9:4; Apastil Nani Sturka 15:28, 29). Kuna baha ba aitani apia kan. Kan Jisas aima kumi ra sin wiaia apia kan Gâd lâka nani ba krikbia tala holika lâka ba (Jan 8:28, 29).
Apastil nani ba Jisas tâlia ba aima kumi ra sin di banhras kan. Kan baha tihmika ra ai tâlia ba laikbia witin win, mariki kan kau ai sakripaiska ba daukras kan (Matiu 26:28).
Jisas sakripaiska ba “aima kumi baman [...] ban kaia ra” daukan (Hibru Nani 9:25, 26). Sakuna Dawan Tutnika Pata dauki piua bani, brit ba bara wain ba Jisas wîna tara bara ai tâlia ra lakisa kaka, baha dauki uplika ba kli kli Jisas sakripaiska daukisa.
Jisas win: “Naha dauks, yang dukira kupiam kraukaia”, kuna wiras kan: “Naha dauks, yang sakripaiski kli kli daukaia dukiara (1 Korint 11:24, Lâ Raya Wauhkataya 1986).
Brit ba bara wain ba Jisas wîna tara bara ai tâlia rait aihwa ra lakuya kasak luki uplika nani ba, Baibil tikska kum kum ra bapanka brisa lukisa. Tânka kum baku, Jisas wain dukiara aisan tikska kum ba Baibil ailal ra naku bîla lakan sa: “Naha sika yang tâilia” (Matiu 26:28). Ban sakuna, naha Jisas bîla ba naku sin bîla lakaia sip sa: “Naha tânka ba sika yang tâilia” apia kaka “naha tânka marikisa yang tâilia ba”.e Jisas smalki kan taim ai tnatka kan ba baku, maprika lilka kum yus muni kan (Matiu 13:34, 35).
¿Ya nani brit pisa bara wain dîsa?
Jehova witniska nani Dawan Tutnika Pata daukisa taim, upla wiria baman brit pisa bara wain dîsa. ¿Dîa muni?
Jisas laikan talia ba wal “lâ raya kum” bapan sa, patitara Jehova Israel uplika nani wal lâ aisi daukan ba watlika ra (Hibru Nani 8:10-13). Ya baha lâ raya tilara nani ba Jisas Pruan Kupia Kraukanka ra brit pisa bara wain dîsa, kristian sut lika baha sip daukras. Tnatka aihka painkira bâk “Gâd mita paiwan uplika” nani baman sip sa (Hibru Nani 9:15; Luk 22:20). Baha kristianka nani ba heven ra Jisas wal king aimakbia. Baibil ba tânka marikisa 144.000 uplika nani baman baha prana ba bribia (Luk 22:28-30; Param Marikan 5:9, 10; 14:1, 3).
Yawan aihkika ba Kraist wal king aimakbia daknika sirpi tilara apia sa, upla kwâra tara tilara sa, bara naha Tasba ra ban kaia ra iwbia bîla kaikisa. (Luk 12:32; Param Marikan 7:9, 10). Naha Tasba ra ban kaia ra iwbia bîla kaiki ba mita, brit piras bara wain sin diras sa, kuna Jisas yawan dukiara dîa daukan ba ra wan tingkika lâka marikaia dukiara, Jisas Pruan Kupia Kraukanka ra asla aidrubisa (1 Jan 2:2).
a El Espíritu Santo, la Iglesia y los sacramentos bukka wahia 12 ra wisa: “Baibil ra ‘sakrament’ bîla ba âpu sa. ‘Diara yukukan ba dukia’ bîla ba tahbi daukan lâka bara Dawan Tutnika Pata dukiara Lâ Raya Wauhkataya ra yus munras sa”.
b The New Schaff-Herzog Encyclopedia of Religious Knowledge bukka, volumen IV, wahia 43-44, bara McClintock wihki Strong wal Cyclopedia bukka, volumen VIII, wahia 836 kaiks.
c The New Cambridge History of the Bible bukka, volumen 1, wahia 841 kaiks.
d Naiwa piua ra Ju nani ai kalindarka ra mangki brisa nisán kati ba kati raya takuya yua ba wina. Naha tnatka na pas 100 mani piua nani ra yus munras kan. Blasi Juka nani ba nu banhwi kan, nisán kati ba tâ kriki kan kati raya ba Jerusalem wina mahka ingni takuya ba wina kulkaia. Bara wiaia want sa, kati raya wina de kum, apia kaka kau luaia sip sa. Baha mita Jehova witniska nani Jisas Pruan Kupia Kraukanka dauki yua ba, naiwa piua Juka nani Insal Luan Yua liliaka dauki ba wal sim sât aimakras sa.
e Naha sât Baibilka nani kaiks: A New Translation of the Bible, James Moffatt; The New Testament—A Translation in the Language of the People, Charles B. Williams; bara The Original New Testament, Hugh J. Schonfield.