¿Dîa muni Jehova witniska nani ba ai smalkanka nani kum kum chens munan sa ki?

Wan smalkanka nani ba Baibil ra baman aibapanka brisa, baha mita Baibil dîa wi ba kau pain wan tânka bri auya sa taim, smalkanka nani kum kum ra chens nani daukisa. a

Sins Lâka 4:​18 bîla nani ba hilp wan munisa wan tânka briaia dîa muni naha chenska nani daukaia ba nit pali sa: “Upla kasakkira nani yabalka bîla ba, yu wala ingnika baku sa: baha kau ban kanra ingwisa, yu aihwa ulan ba wal”. Wibia sa kaka, yu baiwi ingnika ba tawa tawa ingni takisa taim paskanka ba kau pain kaikaia sip ba baku, Gâd ai napakanka nani ra tawa tawa bara piua kat tânka kasak nani ba marikisa (1 Pita 1:​10-​12). Baku sin Baibil ba wisa las yua nani ra “piua balbia ba kat” Gâd tânka kasak kau param sakaia warkka ba kau isti takbia daukbia (Daniel 12:4).

Naha chenska nani dauki ba wal yawan tâ iwaia apia sa. Patitara piua ra Gâd napakanka nani ba sin, lukanka mistik nani bri banhwan bara baha tâka mita witin nani sin, ai lukanka nani bri kan ba chens munaia nit kan.

• Moses Israel uplika nani ra pri sakaia wilin takan, ban sakuna 40 mani luan ba kat Gâd baha warkka witin ra yaban (Apastil Nani Sturka 7:​23-​25, 30, 35).

• Misaya prubia bara kli bukan kabia prapit dahra aisanka Baibil aisi ba, apastil nani ba ai tânka briras kan (Aiseya 53:8-​12; Matiu 16:21-​23).

• Jehova yua ahkia aimakbia ba dukiara pas kristianka nani kum kum ba lukanka mistik bri kan (2 Tesalonaika 2:​1, 2).

Patitara piua ra Gâd napakanka nani ba lukanka mistik kum kum bri kan, ban sakuna piua luan ba wal Gâd tânka kasak ba marikan. Naiwa piua ra sin Gâd ra bik takisa, yawan nani wal sim baku daukbia (Jems 1:5).