¿Jehova witniska kum wal Baibil stadi takisna kaka yang sin Jehova witniska kum takaia nit sna ki?

Apia, Jehova witniska kum takaia nit apia sma. Tasba aiska ra upla milian nani ba yang nani wal Baibil stadi takisa, sakuna Jehova witniska nani takras.a ¿Wan Baibil stadika nani ba dîa lukanka wal daukisa? Wan brinka sa Baibil dîa smalki ba man lan takma, bara dîa lan takram ba wal dîa daukma ba mihtam ra sa, kan kumi bani ba silp ai rilidianka ba wahbi sakaia sa (Jasua 24:15).

¿Baibil stadi takisna piua ra silp Baibilki brisna ba yus munaia sip sna ki?

Au sip sma. Sakuna yawan Traducción del Nuevo Mundo Baibilka ba yus munaia laik banhwisna, kan lakanka ba tânka briaia kau isi sa, brinkam sa kaka mana luha Baibil kum maikaia sip sa, sakuna want apia sma kaka man silp Baibilkam ba yus munaia sip sma. Ani Baibilka ba kabia kra sin man sip sma, bîla kaikanka bara swaki sakan lâka smalkanka ba lan takaia.

¿Man nani dîa muni Jehova witniska kum takaia lukanka briras uplika nani wal Baibil stadi takisma ki?

• Lukanka kau tara ba sika, yawan Jehova ra latwan kaiki ba mita sa, bara witin want sa yawan dîa lan taki ba wal upla wala nani ra smalkbia (Matiu 22:37, 38; 28:19, 20). Yawan wan mapara kau kulkanka tara brisa Gâd dukia dadaukra baku upla nani ra hilp munaia Baibil tânka kasak ba lan takbia dukiara (1 Korint 3:​6-9).

• Tânka wala ba upla nani ra latwan kaiki ba mita (Matiu 22:39). Bara yawan dîa aihka painkira lan taki ba, upla wala nani ra smalkaia lilia lâka wankisa (Apastil Nani Sturka 20:35).