Smalkisma pyua ra pain aisi upla kupia alks
1. Dawan Bila ba wapni kat smalki uplika baku kaia dukyara, dia daukaia nit pali sa ki?
1 Apastil Pâl baku, smalki tataukra lankira nani ba ai dara walisa ‘kasak tanka bila ba wapni kat smalki uplika baku’ kaia dukyara, Baibil tikska aisi kaikaia baman lika aitani apia sa (2 Tim. 2:15). Dawan Bila smalkisa taim, pain aisi nahki upla kupia ba alkaia? (W.n 28:23).
2. Dawan Bila ba kau rispik munbia dukyara, wali nani ra, nahki help munaia sip sa ki?
2 Baibil dia wi ba mariks. Pas taura, wali nani ra marikaia sa Baibil ba rispik laka tara brisa, kan Gâd sinska laka ba ra sa. Baku witin nani kaikbia Bila ba Gâd wina aula sa, bara rispik munbia. Dawan Bila ba kasak luki aisisa kaka, wan wali nani ba, tiks kum aisi kaiki yabia taim aman pali walbia (Hibru 4:12). Tnatka isi kum ra naku wis: “Yang ra uba help ai munan sa nu takaia Gâd dia lukisa naha dukyara. Kaiks ai Bila ba dia wisa.” Sip kaka, pyu bani Baibil wina aisi kaiki swis Bila ba silp marikbia.
3. Tiks kum aisabia ningkara, wali nani tanka bribia dukyara, dia daukaia sa ki?
3 Tnatka wala ba, upla nani ra tikska dahra smalkaia sa. Upla manis ba pas trip Baibil burska kum aisi kaikuya taim, sip ai tanka briras munisa. Baha mita upla ra smalkaia nit sa burska dahra, bara aisisma tanka wal asla prakan sa sapa (Luk 24:26, 27). Tanka kasak nani ba upla ra saki marikaia sa. Baku sin, makabi walanka kum kum dauki yawan nu takbia dia aisi ba, upla ai tanka brisa sapa (Sins.l 20:5; W.n 8:30).
4. Upla ra smalkisa taim, upla kupia alkaia dukyara dia tnatka las ba yus takbia ki?
4 Baibil helpka wal tanka smalkaia. Tnatka yumhpa ba, wali nani ra sinska bara kupia alkaia sa. Help munpi baha tikska aisi kaikan ba, ai rayaka ra nahki silp alki daukaia. Baibil helpka wal tanka smalkisa kaka, bankra ai lukanka ba lakbia (W.n 17:2-4; 19:8). Tanka kum ra, Impakan sturka 6:3, (wahya mina ba sin aisi kaiki) wiaia sip sa, upla nina ba nu takaia nit pali sa, baku uplika wal kakaira takisa. Baha wina makabi wals: “Man lukisma Gâd nina maki wan pura sunra nani ba kau pain kabia ki?”. Upla rayaka ba, tiks kum wal praki kaikisa taim, kau param takisa Baibil ba yus tara brisa. Baha sat Bila smalkanka ba, daukisa kupia yamni bri uplika ba, Jehova Gâd rayakira bara kasakira ba, mayunra plikbia (Jir. 10:10).