Luhpiam nani ra Gâd warkka daukaia lan dauks
1. Lawana 148:12, 13 ulban ba dukyara, aisa nani ba dia daukaia lukisa?
1 Jehova tuktan sirpi nani ra paiwisa Witin ra mayunbia (Lawana 148:12, 13). Baha mita, aisa yapti kristian nani ba ai luhpia ra Baibil tanka kasak bara daukanka nani Gâd yamni kaiki ba baman smalkras. Witin nani sturi yamni smalki tataukra kabia dukyara lan daukisa. Bara naha ba nahki tawa tawa ra daukaia sip sa ki?
2. Aisa yapti samplika ba, ai luhpia nani ra nahki help munisa?
2 Sampla pain kum. Gidiun, 300 waitna nani ra naku win: ‘Yang ra aman ai kaiki dia daukamna ba man nani sin baku dauks’ (Wihta 7:17). Luhpa nani ba ai aisika nani dia dauki ba kaiki, tnata lukisa. Kristian waitna kum tihmia ra wark taki ba, satadi titan ra ris briaia watlika ra, swapan kabia sin ai luhpia aikuki smalkaia takisa. Baku, sturi kumi sin aisaras ai luhpia nani ra marikisa smalkaia warkka ba taura wan rayaka ra mangkaia sa (Mat. 6:33). Luhpiam nani ba Gâd warkka liliakira dauki, mai kaiki sa puram sunaia baku, Baibil aisi kaia, aidrubanka nani ra mihtam buki aisaia bara smalkaia warkka daukaia? Param sa, luhpiam nani ra sampla kum kasak yabaia sip apia kama, sakuna witin nani ra sampla pain kum yabisma ba luhpiam nani ba kaikbia bara man daukisma baku witin nani sin daukbia (K.smal 6:6, 7; Rom. 2:21, 22).
3. Spirit laka ra luhpa nani ba pawbia dukyara aisa yapti nani ba nahki ta baikaia sip sa?
3 Spirit laka ra pawaia. Aisa yapti ba ai luhpia nani ra swapraskira lan daukisa nahki wapaia, sturi aisaia, kwala dimaia. Bara ai luhpia ba baha pain daukisa taim kli diara wala ra yaban wark daukisa. Bara kristian bangwisa kaka, ai luhpia nani ra ani pitka sip ba kat spirit laka warkka daukbia yabisa (1 Kor. 9:26). Luhpiam nani ra lan daukisma aidrubanka nani ra ai mihta buki aisaia bara Nahki Smalkaia ba Skulka ra ai aisanka nani yakan ridi daukaia? (Lawana 35:18.) Smalkaia warkka ra wark sat sat bara ba daukaia kupia bukisma ki? Aihtabi takbia dukyara apia kaka taura wih smasmalkra warkka daukbia kupia bukisma? Bara smalki tataukra liliakira nani luhpiam ra help munbia dukyara, pana takbia tnatka plikisma ki? (Sins.l 13:20.)
4. Luhpa nani ba dia yamnika brisa sirpi wina ai aisika nani Jehova ra mayunaia ta baiki sa taim?
4 Pyua kum ra lawana aîulbra ba naku aisan: “Dawanki, wahma katna ba wina ai smalkram, bara ban kau aisisna, man warkkam tara daukram ba” (Lawana 71:17). Luhpa ba tuktan lupia wina smalki tataukra takbia dukyara lan dauks. Naiwa pyua ra luhpiam nani dukyara daukisma ba witin nani man takbia pyua ra kasak help munbia (Sins.l 22:6).