Wan taimka ba pain yus munaia sa
1. Naha smalkanka 1 Korint 9:26 ra taki ba, ¿nahki alki daukaia sip sa?
1 Apastil Pal win: “Pâsa ra pruki baku lika yang aiklabras” (1 Ko. 9:26). Pal nahara tânka marikaia want kan Jehova ra kau mayunaia ai brinka kan ba. Sakuna naha bîla nani ba sin, smalkaia warkka ra yus tara brisa. Baha mita wan warkka ba pain daukaia trai munaia sa bara baku yamnika ailal sakaia sip sa. ¿Bara nahki daukaia?
2. Pal bara patitara smalki tataukra nani ra nina bliki, ¿yawan nahki nu takaia sip sa ahkia bara anira smalkaia?
2 Upla nani anira ba ra was. Pal bara patitara smalki tataukra nani ba anira upla ailal bâra kabia pliska ra wih smalki kan (Ap.St 5:42; 16:13; 17:17). Bara, yawan smalkisa pliska ra tihmia saiwuya ba ra upla nani ai watla ra sa kaka, sanska pain kabia utla utla ra smalkaia warkka daukaia. ¿Titan puk ra apia kaka tihmia saiwuya ba ra bus takaskaika pliska ra upla ailal bâra sa? Diara atkaia pliska nani ra, ¿ani piua ra kau upla nani bâra sa ki? Yabal nani ra smalkaia ba kau pain sa baha awarka nani ra.
3. Smalkaia pliska ra, ¿nahki wan taimka ba kau pain yus munaia sip sa?
3 Tânkira lâka wal wark taks. Smalkaia pliska ra taukisa taim aman kaikaia sa wan taimka nahki yus muni ba. Sampla kum, smalkaia daknika ba uba tara sa kaka, baiki sakaia sip sa, baku kau asla wark takbia bara wan taimka ba kau pain yus munbia. Sim natka ra tawan sirpi nani ra smalkaia wisa taim dakni sirpi kum taukaia sa, baku sip kabia upla nani wal kau aisaia. Baha mita, ¿dîa muni wamtla lamara plis kum makabras smalkaia dukiara, bara baku taimkam lus tikma apia?
4. ¿Dîa ba hilp wan munbia ‘upla mamiskra’ lankira kum kaia?
4 Smalki tataukra nani ra Jisas mita ‘upla mamiskra’ baku wal prakan (Mk. 1:17). Inska mamiskra kum ba kiulh ba ban lî ba ra lulki kaia baman lukras. Witin ai brinka sa inska ba alkaia. Inska mamiskra pain kum ba nu sa ahkia bara anira inska nani bâra sa, miskaia auya taim mahka ai warkka daukisa, bara tânkira lâka wal wark takisa. Sim natka ra yawan sin smalkaia warkka ba takaskraskira daukbia (Hib. 6:11).