Lisin 1

God wan paiwisa ai panika nani kaia

God brinka sa yawan nani ba ai panika kabia. Man nu katma ki Upla kulkanka kau tara paskanka aiska purara ba sip sma panikam takaia? Ebraham ra, witin piu wihka ninara iwi kan ba, God panika makan (Jems 2:23). Baibil ba aisisa waitna wala nani bara mairin nani sin lilia brih bangwan God panika baku bara sin blisin tara nani brih bangwata. Naiwa yua, upla ailal Tasba aiskara God panika nani takan. Man sin sipsma kaia.

God panika laka ba kau pain sa upla ya ya panika takaia ba wal. God ai panika nani kasak bangwi bara aima kumira sin tnayara laki swiras sa (Salmo 18:25). God panika kaia ba kau pain sa yuya nani ailal bri kaia ba wal. Yuikira nani prui bangbia taim, upla wala nanira ai lahlaka ba wisa. Ban sakuna, God panika lakara ai lilia bri bangwi ba yuya paskanka kum bri bangwi sa upla kumi sin sip mihta dakbras.​—Matyu 6:19.

Bankra upla nani bara sa want apia kabia man lan taki kama God dia smalki ba. Panikam nani kum kum kat sin daukbia bara pamalikam nani sin (Matyu 10:​36, 37). Upla kum man lamwaska kiki apia kaka sirang mai ikbia kaka, mamkabi wals: ‘Yaura yang wantsna yamni ai kaikbia, waitna nanira apia kaka God ra?’ Luki kaiks naha dukiara: Upla kum bila plun pisma ba swis mai wibia kaka, daukma ki? Kasak pali daukma apia! Raya kaia sa kaka yawan nani plun piyaya sa. Baku bamna, God sip sa daukaia man raya iwma bankaiara! Baha mita, ban lan taki bas nahki God panika takaia dukiara bara yarka upla kumi sin mai takasbiara.​—Jan 17:3.