asla takaia tnatka nani pliki bangwras. Jehova ra, bara ai asla takanka ra sin wapni bangwi ba mita, Baibil lâka ba rispik munisa. Wan taya yamnika ba want sa. Bara wapni ra bapi bui si, wan taya ba wapni ra taubia help munaia sip sa (Hibru nani 12:11).c

Spirit hulikira bui Pâl ra yaban ulban, kristian mairin nani ba Gâd warkka dauki, sam taim ai lal praki srukaia sa. Ahkia taim, bara dia muni baku daukaia sa ki? 1 Korint 11:3-16 ra, Pâl ulban ba kaisa laki kaikaia. Baha ra Gâd ra kulkaia sip wan munbia dukyara bapanka yuhmpa yaban sa: 1) Dia warkka mapa lal praki srukaia sa; 2) Ahkia taim baha daukaia sa; bara 3) Ai kupia ra nahki luki lâka na alki daukbia.

Dia warkka mapa. Pâl bui wark satka wal mapa aisisa: Pura sunaia, bara Gâd Bila dahra aisaia (Borska 4, 5). Pura sunaia ba sika, Jehova ra mayunaia tnatka kum sa. Bara Gâd Bila dahra aisaia ba sika, naiwa pyua ra waitna-mairin nani Baibil smalki ba tanka sa. Baku bamna, Pâl wiaia want sa ki, kristian mairin ba ai pura suni, apia kaka smalkuya taim ban ai lal praki srukaia sa? Apia. Sakuna, ai lal praki srukbia, praki srukbia apia sapa, wal sut na ahkia taim daukbia ba mita sa.

Ahkia taim. Pâl bui plis wal —pamali ra, bara kangrigisan ra— tanka aisisa. Nan ulban: “Mairin lal ba ai maîa waitna  [sika.] Mairin kum ai pura suni bara, apia kaka Gâd bila dahra aisi smalki bara ai lal ba srukras kaka, witin ai maîa waitna swira daukisa” (Borska 3, 5). Jehova bui pamali bilara maîa waitna ba mairin lalka mangkan sa. Sakuna, Jehova mita pamali lalka ra warkka yaban ba mairka bui witin daukaisa wi kaka? Ai lalka ra rispik munras sa kaka, ai maîa waitna swira paskisa. Kaisa tanka kum kum laki kaikaia: Ai maîa waitna bara si, kristian mairin kum upla kum ra Baibil stadika yabaia sa. Ai maîa waitna ra rispik muni ba tawan ai lal praki srukaia sa. Waitna ba pamali lalka sa bamna, pat aihtabi takan, apia kaka kau aihtabi takras kabia sin, mairka ba ban ai lal praki srukaia sa.a Bara witin kau paki, pat aihtabi takan luhpia waitna kum mawanra ai pura sunaia sa kaka? Wel au, luhpia ba pamali lalka apia sa sakuna, yapti ba ai lal praki srukbia. Dia muni ki? Kangrigisan bilara pat aihtabi takan waitnika nani karnika ba rispik munisa bamna.

Kangrigisan bilara wark dauki ba dukyara aisi, Pâl naku sin win: “Ani uplika naha tanka dukyara blahwaia want kaka, witin kaiki kaia sa, yang nani na, bara Gâd sertska nani ba sin tnatka wala lika kaikras bangwisna” (Borska 16). Kangrigisan ta bribia dukyara, Jehova bui pat tahbi daukan waitnika nani mangkan sa (1 Timoti 2:11-14; Hibru nani 13:17). Bahamna, Ai syîpka nani daknika main kaikbia dukyara, waitna nani ra baman, almuk, bara help mamunra napakan baku aimakbia yabisa (Wark nani 20:28). Sakuna, sam taim lika pat aihtabi takan sip waitnika kum warkka ba, kristian mairin kum daukbia nit takisa. Naha tanka ra, ban kra sip waitnika kum apu sa bamna, smalki taki waia aidrubanka ba ra mairin kum ta briaia sa. Warkka na sika, kangrigisan bilara smalkaia warkka dauki ba taka kum sa mita, waitna kum bui daukaia sa. Baku sin kristian mairin kum, pat aihtabi takan waitnika kum bara si Baibil stadika kum ta brisa kaka, sim sat takisa. Mairka ba, waitna kum warkka dauki ba marikaia wisi, ai lal praki srukaia sa.

Sakuna Gâd warkka wala ailal dauki ba dukyara, ai lal praki srukaia nit apia sa. Naha tanka ra, aidrubanka nani ra aisuya taim, upla watla kat smalki taukisa taim (ai maîa, apia kaka pat aihtabi takan waitnika wala kum wal wabia kra sin), apia kaka ai luhpia kau aihtabi takras nani wal ai pura suni, bara stadi takbia taim, ai lal praki srukaia nit apia sa. Sakuna wark kum tanka mapara dia daukaia sapa nu apu sa kaka? Pas pali dukya tanka ba aman luki kaikaia sa.b Sakuna ban aihka ai dara wali, ai kupia bui ai lal praki srukbia wisa kaka, trabil apu, srukaia sip sa.

Ai kupia ra nahki luki. Borska 10 ba ra, diara wal mairin kupia ra ai lal praki srukaia want kabia muni ba aisi naku sa: “Mairin ba insal nani tawan, ai lal purara ai maîa karnika sainka kum bri kaia sa”. Pas pali “karnika sainka kum” wi ba kais. Kan kristian mairin lal praki srukanka ba sika, tahbi daukan waitnika nani ra Jehova bui kangrigisan bilara karnika yaban ba ra, mairka rispik muni ba marikisa. Wibia sa kaka, wapni kat Gâd ra latwan kaiki ba marikisa. Bara walka ba? Burska kata ba “insal nani tawan” sin wisa. Sakuna, ai lal praki sruki taim, mairin ba insal karnakira nani na ra dia munisa ki?

Jehova aipaswanka bilara sut nani ba ra —tasba ra ba, heven ra ba dukyara sin— insal nani bui kaikisa. Bara Gâd karnika munuhtara bangwisa sapa aman lukisa. Kau sin, tasba ra upla bila wawalra wina lan takisa. Kan insal nani ba sin, Gâd karnika munuhtara bangwisa sapa marikaia sa. Bara pat kaikan sa blasi pyua ra insal kum kum baha kat sip alki daukras kan (Judas 6). Bara naiwa pyua ra, kristian mairin kum pat tahbi daukan waitnika kum wal kau sinskira, kau lan, bara kau tanka brisi sin, ai kupia wilin karnika munuhtara sa taim, insal