Naha ulbi saki yakabi lakaia ba, tasba aiska ra Baibil tânka smalkaia warkka ba tâka kum sa, bara prisantka wilinkira yabi ni daukisa. Wahwi atkaia adar âpu.

Prisant kum yabaia dukiara, pliskam pali www.jw.org/miq ra dimi kaiks.

Diara wala mapara wiras sa kaka, Baibil tikska nani ulbi sakanka nahara taki ba Dawan Bîla ba wina brin.

Impresión de diciembre de 2015

Miskito (sp-MIS)

“Taun sirpi kum yahbra tanira kan bara pawri -ai dahra aisisa Dauda, Sierra Leona kuntrika wina ba–. Yu kum, tuktan kapri pyua ra, blahwanka kum takan yang taiya nani bara pamali wala aikuki tasba kum dukyara. Pamalika wal sut ba baha tasbaia ba witin ai dukya aisi bangwi kan. Baha wapnika mangkaia dukyara sukia kum ra winan balan. Sukika ba lukan glas kum mangkan waitnika wala ba mihta ra, baha ningkara witin ra kwala pihni kum wal pura prakan. Pyu kunhku bilara waitnika ba mahka tatatwi bara laptika takan. Lukan glaska ra kaiki bara ai bila kisbi win: ‘Waitna almuk pali kum laimara aula sa kaikisna! Kwala pihni dimisa. Yari, almuk bara tawa pihwan sa, bara wiria bawi wapisa’.

”Yang damiki dukyara aisi kan! Ningkara, witin uba saura ai dara wali kan ba mita, ai bila tara kisbi win: ‘Mai wisna ba kasak luki bangwras sma kaka, man nani silp bal, lukan glas ra kaiki bangws!’. Sakuna, upla kumi sin baha daukaia traikaikras kan! Sukika ba mita waitnika ra dus wahya klamanka kahmi taya kum ra bri kan ba wal lamni daukan.

”Waitnika lukan glas ai mihta ra bri kan bakku, ‘damiki’ mita tasbaia ba yang pamaliki dukya win. Kukiki ra win baha pâtka ra lukras insla warkka daukbia. Pamalika wala ba baha aisi daukan ba pain kaikan. Pâtka ba baku wapni mangki swin.”

Naha sat sturka ba Aprika tasbaia muna tanira ailal pali takisa. Baha ra taki ba baku, taun wala nani ra sin, upla milian nani ba lukisa pruan nani ba spirit nani tasbaia ra lui bangwisa, baha ba wina witin nani sip bangwisa tasba ra iwi uplika nani ra kaikaia bara rayaka ra saura munaia. Baha lukanka ba rait sa ki? Rait pali pruan nani ba raya bangwisa ki? Baku apia sa kaka, ya ba isingni nani raya bangwisa wisa ki? Aitani sa naha makabi walanka nani ansika tanka ba briaia. Kan diara kum raya kaia apia kaka prura dukya sa.

Spirit nani ba rait bara sa! Witin nani tasbaia ra spirit pain bara saura bara sa. Upla nani tasba ra iwisi pruan ba sa ki?

Apia; baha nani apia. Upla kum pruya bara, pruan nani tasbaia ra luras, upla ailal nani luki bangwi ba baku. Nahki yawan naha ba nu sa ki? Kan Baibil wi ba mita. Baibil ba buk kum tanka kasak ba aisisa bara rait aingwa Gâd kumi pali ba wina balisa, ai nina ba Jehova. Jehova mita upla nani ra paskan; witin pain nu sa upla nani pruya pyua ra dia taki ba. (Impakan sturka 6:2 wahya mina ba kaikaia; 2 Timoti 3:16.)

Baibil ba wisa Gâd mita Adam pas waitna ba ra, “tasba yuya wina paskan”. (Blasi sturka 2:7.) Gâd mita paradais ra mangkan, Eden gadinka ra. Adam ba Jehova bila walan kata, pruaia apia kan; kau naiwa Tasba ra raya kaia kan. Sakuna Adam Gâd lâka ba lulki swin pyua ra, Gâd mita win: “Tasba ra kli tauma [...]. Kan baha wina mai paskan bamna. Man ba tasba yuya sma, bamna tasba yuya ra kli tauma”. (Blasi sturka 3:19.)

Naha ba dia tanka sa ki? Kan, Adam ba anira kan Jehova mita kau tasba yuya wina paskras kan pyua ra? Witin plis kumira sin apu kan. Heven wina spirit kum kau aisubi takras apia kan. Witin apu kan. Baha mita, Jehova Adam ra “tasba yuya ra kli tauma” win ba, wiaia want kan Adam ba prubia. Adam ba spirit nani tasbaia ra luras kan. Adam pruan pyua ra, kli rayaka apu takan. Prura ba sika raya kaia apia tanka sa.

Sakuna dia wiaia sip sa upla wala nani prui bangwan ba dukyara? Witin nani ba sin dan apu bangwisa ki? Baibil ba ansika yabisa:

• “Sut [upla nani baku sin daîwan nani ba] plis kumira buisa; sut ba tasba yuya ni wan paskan, bara kli tasba yuya ra taubia.” (Smasmalkra 3:20.)

• “Pruan nani ba diara tanka sin briras, diara sin briras, witin nani diara sut auya tiwan sa.” (Smasmalkra 9:5.)

• “Tnata alkan sa, ai latwanka laka, misbara kaiki laka, bara ai brinka swapni nani sin.” (Smasmalkra 9:6.)

• “Raiti ra wama lika baha ra diara kumi sip daukras, baha ra diara kumi sin man lukras, diara tanka briaia apu bara sins laka sin apu.” (Smasmalkra 9:10.)

• “Witin nani pruisa bara witin kli tasba yuya ra tauisa; bara baha pali pyua ra ai warkka kata laptiwisa.” (Lawana 146:4.)

Karna mai takisa baha tikska nani wi ba alki briaia? Baku sa kaka, naha ra luki kaiks: Pamali ailal nani ra maîa waitna ba lalah sakisa ai watla bilara ta baikaia dukyara. Witin pruya pyua ra, ai pamalika ba pât nani wauhwisa. Aima kum kum ra maîa mairin bara luhpia nani ba lalah aitani kat sin apu sa plun atkaia dukyara. Maîa waitna pruya pyua ra waihlika nani ba sip sa pamalika ra saura munaia. Nanara mamkabi wals: ‘Baha waitnika ba spirit nani tasbaia ra kau raya sa kaka, dia muni kau ai pamalika ra main kaiki bri kapras? Dia muni upla saura nani ba wina ai pamalika ra kaina kahbras sa ki?’. Kan baha tikska nani ba rait ba aisisa. Baha waitnika ba kau raya kapras; diara daukaia sin sip apia sa. (Lawana 115:17.)

Tanka ba aima kumira pruan nani ba sip kli raya bubia apia sa ki? Apia; baha tanka apia sa. Yang nani, kaina tanira pruan wina kli bukaia tanka ba dukyara aisi bangwamna. Sakuna naha wiaia want ba sika, man dia daukisma sapa pruan nani ba nu apu bangwisa. Mai kaikaia, mai walaia apia kaka mai aisaia, sip apia bangwisa. Man witin nani ra sibriaia tanka kumi sin apu sa. Witin nani help mai munaia bara saura mai munaia sin sip apia bangwisa. (Smasmalkra 9:4; Aiseya 26:14.)