Param marikan (Reveleshan) ba ulbisa dia takan ba: “Bara kasbrika purara war tara kum takan: Maikal [Jisas Kraist pruan wina kli bukan ba] ai insalka [pain] nani aikuki dragun [Setan] ba mapara aiklaban. Dragunka ai insalka [saura] nani sut kira sin mapara bui aiklaban; sakuna witin nani aiklabanka ba sip pura luras kan, bara dragun ai insalka [saura] nani ba wal kasbrika pura ra pliska apu takan. Baku bamna, dragun tara ba latara lulkan kan. Witin sika pyuta almuk ba, nina debil bara Setan maki ba, witin ka mita sika tasba aiskara kunin aisi ba. Witin ai insalka [saura] nani kira tasba ra lulkan kata”.

Witin nani ra lulkan ba wina dia takan ki? Aisanka ba naku wisa: “Bamna, kasbrika pura ra nani sma ba, liliam taki bas, man nani bahara iwisma ba!”. Insal pain nani ba sip kan lilia taki bangwaia, kan Setan bara ai insalka saura nani ba heven ra dan apu kan. Sakuna Tasba ra uplika nani ba dia takbia ki? Baibil ba wisa: “Sakuna tasba ra kabu ra iwi nani ba mapara lika alai pali kabia, kan Debil ba man nani ra iwan sa, ai kupia sin baikan sa, kan witin kaikisa kau pyua wiria baman brisa bamna”. (Param marikan 12:7–9, 12.)

Au, Setan bara ai panika watawikira nani ba mita upla nani ra mahwakisa, bara naha tasba ra iwi nani ra trabil tara nani bri balisa. Naha insalka watawikira nani ra lasa nina makisa. Witin nani ba Gâd waihlika sa. Sut ba saura bangwisa.

Setan bara lasa nani ba, pyu bani ra panis mamunra bara pât dadaukra bangwisa. Pyu wihka luan ra, Setan mita Job daîwra bara albika nani ra sin ikan. Bara “pasa tara kum” wal, Job luhpia 10 utla bilara kan ba, sut ra ikan. Ningkara Setan “mita Job purara siknis saura blikan, taya ra mina wina lal kat yukri takan”. (Job 1:7–19; 2:7.)

Jisas pyua ra lasa nani ba upla kum kum ra bilas bara nakra blain dauki bangwi kan. (Matyu 9:32, 33; 12:22.) Waitna kum ra lasa pruki, yaban ai wîna ra walpa wal klaki kan. (Mark 5:5.) Tukta kum ra ‘lasa pruki’, yaban kisbi bara ‘tasba ra lulki sabi kan’. (Luk 9:42.)

Naiwa yuara pyu bani ra baku, Setan bara lasa nani ba upla aîkra pali bangwisa. Bamna, ai daukanka saura ba kau ailal daukisa heven wina lulkan ba wina. Sturi nani tasba aiskara taki bara marikisa ai saurka paniskira pali wal dauki ba. Upla kum kum ra siknis saura wal prukisa. Wala nani ra trabil munisa tihmia yaban yapras bara yaprisauhkan saura kaiki bakku. Wala nani ra rug munisa. Bara wala nani ra krisi, upla aîkra kabia, apia kaka silp ai wîna ra ikbia munisa.

Lintina, Surinam kuntrika ra iwi ba aisisa, lasa apia kaka spirit saura kum mita ai pamalika tila wina 16 ra ikan, bara witin ra ai wîna tara ra ai sinska lukanka nani ra mani 18 baku panis muni kan. Witin ra takan ba tanka kaiki wal aisisa, lasa nani ba “panis muni latwan yabaia bara upla nani ikaia lihkisa”.

Sakuna Jehova sip sa Setan saura munanka ba wina ai napakanka nani ra kaina kahbaia. (Sins laka 18:10.)