Upla ailal ai priaska nani ra danh waras sa, kan bahara spirit lâka ra hilpka kumi sin sakras ba mita. ¿Dîa muni Jehova Witniska nani aidrubanka nani ra waia sa? Bahara, ¿dîa yamnika sâkma?

Upla latwankira nani bara yawan dukiara luki nani tilara lilia kaia. Patitara kristianka nani ba kangrigisan baku asla taki kan. Bahara Baibil ba stadi taki, Gâd ra mayuni kan bara pana pana ai kupia buki kan (Hibru Nani 10:24, 25). Upla latwan lâka bri nani tilara asla takaia ba ai muihni lakri nani baku, apia kaka ai pânika nani baku kaikisa (2 Tesalonaika 1:3; 3 Jan 14). Yawan sin patitara kristianka nani samplika ba nina blikisa bara lilia wan dara walisa.

Baibil smalkanka nani alki daukaia ba yamnika wankisa. Patitara piua ra dauki kan baku, waitna, mairin bara tuktan nani sin asla taki kan. Kristian waitna nani ba Baibil ba pain yus muni hilp wan munisa Jehova smalkanka nani piu bani wan rayaka ra alki daukaia (Kli Smalkanka 31:12; Nihimaya 8:8). Yawan kumi bani wan mihta buki aisaia sip sa, baku sin aiwanaia. Naha ba hilp wan munisa spirit lâka ra wan bîla kaikanka lâka bri ba dukiara aisaia (Hibru Nani 10:23).

Gâd ra kasakkam lukan lâka brisma ba kau karna takisa. Apastil Pal kangrigisan kum ra win: ‘Yang bui man nani mai kaikan ai daukisa, bara baku lika man nani kau karna taki kama; baha tânka ba lika, kasak lukan lâka yang bara man nani brisma ba ni pana pana hilp munaia’ (Roman 1:11, 12). Aidrubanka nani ra spirit lâka ra aitani pâwan kristianka nani wal asla taki ba mita, wan kasakka lukan lâka bara Baibil dîa wi ba alki daukaia dukiara hilp wan munisa.

Mai paiwisa wan aidrubanka nani ra waia bara baku naha blisinka nani brima. Yamni waram kabia. Bahara lalah makabras bara dimaia ba pri sa.

• ¿Wan aidrubanka nani ba, dîa samplika nina bliki daukisa?

• ¿Aidrubanka nani ra wama kaka, dîa yamnika brima?

Aidrubanka nani ra waia dukiara ban kra unta tara bâk wapaia sa, apia kaka lî karna auhi ba tilara wabia, sakuna wik bani aidrubanka ra wisa. Wan rayaka ra trabil bri kabia, apia kaka wark wina aula taim swapan baku wan dara walisa sakuna, ¿dîa muni Jehova Witniska nani sakripais daukisa aidrubanka nani ra ai muihni lakri aikuki kaia dukiara?

Wan yamnika dukiara sa. Apastil Pal ulban: “Pana pana wan walka nani ra hilp munaia”. Witin kangrigisan uplika nani dukiara aisi kan (Hibru Nani 10:24). Naha bîla nani ba wiaia want sa “upla wala dukiara lukaia”, wibia sa kaka, pana pana kakaira takaia. Baha mita, apastil Pal dîa aisan ba wan kupia bukisa upla wala nani dukiara lukaia. Kangrigisan ra pamali kristian nani ra kakaira takisa taim, yawan nu takisa witin nani ba trabil ailal pura luan bara wan trabilka nani baku witin nani sin brisa. Naha sut ba hilp wan munisa wan trabilka nani pura luaia.

Pâna pain nani sakisa. Aidrubanka nani ra, wan kakairika nani wal baman asla takras, wan pânika latwankira nani wal asla takisa. Piu wala nani ra witin nani wal piu luisa, sampla baku wan liliaka nani ra. ¿Naha asla takaia ba wina dîa yamnika sakisa? Witin nani wal kau pain kakaira takisa bara pana pana kau latwan kaikisa. Bara wan pânika nani ba trabil brisa piua ra, yawan hilp munisa, kan pâna lâka tara kum witin nani wal brisa (Sins Lâka 17:17). Kangrigisan ra upla sut wal kakaira takisa taim, yawan marikisa ‘upla wala nani dukiara lukisa’ (1 Korint 12:25, 26).

Mai paiwisa Gâd kupia lâka dauki uplika nani wal pâna takaia. Naha sât pânika nani ba Jehova Witniska nani tilara sakaia sip sma. Swirka diara kumi sin mai takaskbiara yawan aikuki pâna takaia.

• ¿Dîa muni wan brinka sa aidrubanka nani ra asla takaia?

• ¿Ahkia kangrigisan ra upla nani wal kakaira takaia sip sma?

Patitara kristianka nani ba aidrubanka ra aiwani kan, ai pura suni kan bara Ulbanka nani ba laki kaiki kan (1 Korint 14:26). Wan aidrubanka nani ra wama kaka, naha dauki ba kaikma.

Baibil smalkanka nani walisa. Satadi apia kaka sandi ra kangrigisan bani asla takisa, 30 minit bilara Baibil aisanka kum walaia dukiara. Naha ba tânka marikisa nahki muni Baibil ba hilp wan munisa wan rayaka ra. Baku sin, yawan kumi bani tiks nani ba silp wan Baibilka ra aisi kaikaia sip sa. Naha aisanka ningkara, La Atalaya stadika ba, awar kum bilara daukisa. Baha daukisa piua ra muihni lakri nani ba ai mihta buki aisanka nani daukaia sip sa bara kumi bani La Atalaya wauhkataya kum bri kaia sa. Naha ba hilp wan munisa nahki Baibil smalkanka nani ba wan rayaka ra alki daukaia. Sim stadika ba 110.000 pura kangrigisan, tasba aiska ra laki kaikisa.

Kau pain smalkaia dukiara hilp wan munisa. Baku sin, wik bilara aima kum asla takisa aidrubanka yumhpa laki kaikaia dukiara. Pas ba, Kangrigisan Baibil Stadika kum 30 minit bilara daukisa. Nahara wali nani ra makabi walisa bara witin nani ansika yabisa. Baha stadika ba hilp wan munisa Baibil dahra aisanka nani kau pain tânka briaia. Baha wina, Nahki Smalkaia ba Skulka ba 30 minit bilara dauki sa. Bara muihni lakri nani ba Baibil ra dîa aisi kaikan ba wina aisaia sip sa. Baha ningkara, stadi tatakra nani ba ai aisanka kunhku nani daukisa. Bara tâ bri uplika ba witin nani ra wisa nahki muni smasmalkra kum pain kaia sip sa (1 Timoti 4:13). Aidrubanka danh prakaia dukiara, Gâd Warkka Daukaia Aidrubanka ba 30 minit bilara daukisa. Nahara aisanka, marikanka, bara muihni lakri nani ra makabi walisa nahki Baibil ba yus munaia upla wala ra hilp munaia dukiara.

Aidrubanka ra wama taim, Baibil smalkanka painkira nani dauki ba kaikma (Aiseya 54:13).

• ¿Jehova Witniska nani aidrubanka ra dîa lan takma?

• ¿Wik bilara ani aidrubanka ra waia want sma ki?