¿Dîa muni Gâd ai asla takanka kum brisa?

1. Patitara Israel nisanka ba ra, ¿dîa muni Gâd asla daukan?

Ebraham kiamka nani ra Jehova bui asla daukan bara ai lâka nani sin yaban. Witin naha nisanka ra “Israel” nina mâkan, bara naha nisanka ba ai mihta ra kan, Gâd bîla bara mayunanka lâka kasak ba smalkaia (Lawana 147:19, 20). Baku kan ba mita nisan wala uplika nani ba sip kan baha yamnika briaia. Blasi Sturka 22:18 aisi kaiks.

Gâd Israel uplika nani ra wahbi sakan Ai witniska nani kabia dukiara. Israel uplika nani ra dîa takan ba sturka walaia ba wan marikisa Gâd lâka nani ba bîla walbia kaka, yamnika manis bribia (Kli Smalkanka 4:6). Baha natka ra, Israel uplika nani bâk upla wala nani sin sip kan Gâd ra kakaira takaia. Aiseya 43:10, 12 aisi kaiks.

2. Rait aihwa kristianka nani ba, ¿dîa muni asla wark takisa?

Israel nisanka, Gâd mita wahbi sakan ba, Jehova yamnika lus tiwan. Bara baha sirka ra kristian kangrigisanka ba mangkan (Matiu 21:43; 23:37, 38). Baha mita, naiwa piua ra rait aihwa kristianka nani ba Jehova ra mayunisa ai witniska baku. Sakuna Israel nisanka lika apia. Apastil Nani Sturka 15:14, 17 aisi kaiks.

Jisas ai disaipilka nani ra blikan, nisan sut uplika nani ra wih smalkaia bara disaipil nani daukaia (Matiu 10:7, 11; 24:14; 28:19, 20). Naiwa, tnata yua balaia baila ba ra, smalkaia warkka ba kau daukisa. Naha piua ra nisan sut wina Jehova upla nani wahbi saki aula sa, rilidian kasak ba tilara dimbia dukiara (Param Marikanka 7:9, 10). Rait aihwa kristianka nani asla wark takisa, pana pana ai hilpka brisa bara ai kupia bukisa. Baku sin, witin nani aidrubanka ra sim Baibil smalkanka nani brisa. Hibru Nani 10:24, 25 aisi kaiks.

3. ¿Jehova Witniska nani asla takanka ba nahki tâ krikan?

Naha asla takanka ba 1870 manka wina tâ krikan. Baibil stadi tatakra dakni sirpi kum, tânka kasak ba pliki sakan. Naha tânka ba yukuwan ra swin kan. Witin nani nu kan Jisas kristian kangrigisanka kum bri kan smalkaia warkka daukaia dukiara. Baha mita, naha daknika ba tasba aiska ra King lâka sturka smalkaia dukiara wark kum tara daukan. Bara 1931 manka ra Jehova Witniska nani ai nina ba mâkan. Apastil Nani Sturka 1:8; 2:1, 4, bara 5:42 aisi kaiks.

4. ¿Jehova Witniska nani ba nahki asla takan sa?

Patitara kristianka nani piua ra, kangrigisan nani tasba aiska ra kan ba yamnika manis sakan, kan witin nani ra tâ bri daknika kum mita pura kaiki kan. Bara naha daknika ba Jisas ra kangrigisan Lalka baku kaiki kan (Apastil Nani Sturka 16:4, 5). Naiwa piua ra sin, Jehova Witniska nani ba hilpka tara kum brisa, naha ba Tâ Bri Daknika sa. Witin nani ba spirit lâka ra pâwan kristianka sa bara Betel apiska sut ra pura kaikisa. Naha apiska nani ra, ulbi sakanka nani paskisa, baku sin bîla aisanka 600 pura nani ra lakisa bara upla nani ra yabisa. Witin nani ba Baibil ba yus muni kangrigisan 100.000 pura nani ra maisa nihkisa bara tâ brisa. Baku sin, kangrigisan bani ra Gâd sîpka nani ra latwan lâka wal kangrigisan almukka nani ba main kaikisa. 1 Pita 5:2, 3 aisi kaiks.

Jehova Witniska nani ba asla takan sa sturi yamni nani ba smalki disaipil nani daukaia dukiara. Apastil nani daukan baku, witin nani ba utla utla ra smalkisa (Apastil Nani Sturka 20:20). Jehova Witniska nani ba tânka kasak lan takaia want uplika nani ra Baibil stadika nani yabisa. Witin nani ba asla takanka kum baman apia sa, pana pana muihni lakri baku latwan kaikisa bara wan Aisa Jehova main kaiki ba mita lilia lâka ra iwisa (2 Tesalonaika 1:3). Asla takanka ba Jehova kupia lâka daukaia ai brinka sa bara upla nani ra hilp munaia sin want sa. Baha mita, tasba aiska ra pamali kau tara kum baku sa bara lilia iwisa. Lawana 33:12 bara Apastil Nani Sturka 20:35 aisi kaiks.