• Gâd Ebraham ra pramis tara kum daukan
    Baibil tânka ba, ¿ani sa ki?

    • LISAMRA takan wina, 350 mani luan. Ebraham ba Ur tawanka ra iwi kan. Baha pliska ba naiwa piua ra Irak kuntrika tilara sa. Witin ba waitna kum kasak pali kan, sakuna ai kasakka lâka traika kaikan. Kaisa kaikaia nahki takan.

      Jehova Ebraham ra makaban ai kuntrika ba swibia bara Kenan tasbaya ra wabia. Ebraham Gâd bîla walan. Witin ai maritka bara ai tubani Lot bara ai watla uplika nani wal piu wihka impaki kan. Baha wina, Kenan tasbaya ra wan. Sakuna plis kumi ra baman takaskras kan. Witin plis sât sât ra utla papakni kum ra iwi kan. Jehova Ebraham ra pramis tara kum daukan: Ebraham tâka mita upla nani sut yamni munan kabia, bara Ebraham kiamka ba sin tawan tara kum kabia bara Kenan tasbaya ba ai dukia bribia.