Prapit Sofonías samplika wina lan taks
1. ¿Sofonías ba ani piua ra prapit warkka daukan, bara dîa muni sampla pain kum sa?
1 Yawan piua manka ninara, 7 handat mani luan ra, Juda uplika nani ba Baal gâdka ra param pali mayuni kan. King saurakira kum nina, Amón ba ikan, bara wahma lupia kum nina, Josías ba watlika ra king aimakan (2 Kr. 33:21–34:1). Baha piua ra sika, Jehova Sofonías ra wahbi sakan Ai bîla nani ba aisabia dukiara. Sofonías ba Juda ra king kaia pamalika tilara aisubi takan, sakuna wihta tara nani ra Gâd mita dîa witin nani ra daukbia ba sut param win (Sof. 1:1; 3:1-4). Sim baku, naha prapit kupia karna lâka marikan ba daukaia trai munisa bara wan pamalika purkara Jehova mayunanka ba tara kulkisa (Mt. 10:34-37). ¿Sofonías ba dîa maisa pakanka nani yaban bara dîa takan?
2. ¿Jehova lawanka wan alkras ba ra, dîa dauki kaia sa?
2 Jehova ra pliks. Jehova lawanka yua ra dis Witin baman sip kabia upla nani ra swaki sakaia. Baha mita, Sofonías ba Juda uplika nani ra win Jehova ra plikbia, wapni lâka bara bawan lâka ba plikbia kau taim bri kan ba ra (Sof. 2:2, 3). Naiwa sim sât takisa, Sofonías baku upla nani ra wisa Gâd ra plikaia, sakuna yawan sin Jehova wina tnaya ra takaia apia lukanka wal daukaia sa (Sof. 1:6). Ai Bîla ba stadi taki, baku sin wan tâ bribia makabia kaka, Jehova ra plikisa tânka marikisa. Wapni lâka ba plikisa wan rayaka tânka sut ra klin brih iwisa taim. Bawan lâka plikisa dîa Jehova asla takanka wina bliki ba wilinkira alki daukisa taim.
3. ¿Dîa muni diara nani ba pain kabia lukaia sa smalkisa piua ra?
3 Yamnika nani. Sofonías maisa pakanka nani ba mâ pain nani sakan Juda uplika kum kum tilara. Sakuna kum ra kau hilp munan ba sika Josías, naha ba kau tuktan lupia kan piua wina mahka Gâd ra plikan. Piu luan ba ra, Josías ba aidul mayunanka sut Juda wina sakaia dukiara wark tara kum daukan (2 Kr. 34:2-5). Naiwa, King lâka saumukka kum kum ba laih yabal ra kauhisa, sampla baku, walpa nani tilara, kiaya tilara, sakuna wala nani ba tasba yamni ra kauhisa bara mâ pain sakisa (Mt. 13:18-23). Yawan nu sa takaskraskira King lâka saumukka nani mangkaia trai munbia kaka, Jehova ban yamni wan muni kabia (Law. 126:6).
4. ¿Dîa muni Jehova yua balbia bîla kaiki kaia sa?
4 Juda uplika kum kum ba lukan Jehova diara daukbia apia. Sakuna Jehova mita win baha yua tara aula ba pat baila kan (Sof.1:12, 14). Ya ya witin ra ai yukuwaika baku brin ba swakwan (Sof. 3:12, 17). Baku ba mita, Jehova yua balbia bîla kaiki ba ra, Gâd napakanka wala nani tila aikuki wan warkka ba lilia daukbia (Sof. 3:8, 9).