Lisin 2

Yawan wan panika kau pain briaia sip ba sika God

Diara kau pain manra takaia sip ba sika God panika kaia. God mai smalkbia nahki lilia laka bara trabil apu ba laka briaia ba; mistik lukanka ailal nani ba wina pri mai sakbia daukanka nani sauhki ba wina sin. Puram sunra nani sin walbia. Winam kat pri laka maikbia bara man silp winamra aitani lukanka brima (Salmo 71:5; 73:28). God hilp mai munbia pât piua nani mai alki taim (Salmo 18:18). Bara God manra maikisa ai prisantka raya bankaia ba laka.​—Roman nanira 6:23.

Yawan God lamara auya taim, God panika nani lamara auya. God panika nani ba sin man panikam nani takbia. Kasak pali, man mampara muihkam bara lamkra nani baku kabia. Lilia taki bangbia God tanka mai smalki bangwi ba dukiara, hilp mai muni bangbia bara spirit kam buki bangbia.

Yawan God wal baku apia sa. God panika laka plikuya bara, diara kau kulkanka bri ba yawan tanka brin kaia sa: God wal wan panika kaia laka ba pâna laka kum man witin wal baku natkara apia sa. Yawan nani wal witin ba kau mani nani ailal pali brisa bara sin kau sinskira bara karnakira pali sa. Witin yakan ai raitka brisa wan Gabamintka withka kaia. Baha mita, yawan witin panika nani kaia wantsa kaka, witinra yawan walan kaia sa bara wan makabi ba daukaia sa. God bila wali daukaia ba aima banira wan yamnika dukiara kabia.​—Isaias 48:18.