Lisin 5

God panika nani ba paradaisra iwi bangbia

Paradais ba naiwa tasbaika baku kabia apia. Aima kumira sin God brinka apia kan naha Tasba na pât nani bangki kabia, latwanka bara panis wauhwanka laka. Kaina piuara, God Tasba na paradais kum daukbia. Nahki kabia paradais ba? Kaisa yawan kaikaia Baibil dia wi sapa:

Upla pain nani. Paradais ba God panika nani watla kabia. Naha nani diara yamni dauki bangbia pana pana ai walka nani dukiara. Jehova yabalka nani kasak ba wal iwi bangwi kabia.​—Proverbios 2:21.

Plun ailal pali. Paradaisra, upla kumi sin plun wauhbia apia. Baibil ba wisa: “Plun ma ailal pali bara kabia Tasbara.”​—Salmo 72:16.

Utla pain nani bara wark yamni. Paradais Tasbaikara, pamali nani sut ai watla silp brih bangbia. Upla nani sut ba lilia saki warkka kum bribia.​—Isaias 65:​21-23.

Tasba aiskara laman laka. Aima kumira sin upla aiklabi prubia apia war ra. God Bila ba wisa: “[God] war nani ba takaski sa.”​—Salmo 46:​8, 9.

Wan wîna tara yamni laka. Baibil ba pramis muni sa: “Bara iwi nani kumi sin [Paradais wina] wibia apia: ‘Yang siknis sna’ ” (Isaias 33:24). Skahwa nani sin apu kabia, blain nani, kiama prawan nani bilas nani sin apia.​—Isaias 35:​5, 6.

Sari laka, latwanka bara prura sin apu kabia. God Bila ba wisa: “Prura ba kau apu kabia, pura mata inaia laka ai mamna lulkanka laka bara wîna tara latwanka sin kau apu kabia. Diara almuk nani ba sut lui wansa.”​—Reveleshen 21:4.

Upla saura nani ba apu kabia. Jehova pramis munisa: “Sakuna upla watawikira nani ba Tasba wina klaki sakan kabia; bara upla aiatkra nani ba, daiki sakan kabia witin wina.”​—Proverbios 2:22.

Upla nani ba pana pana ai walkara latwan kaikbia bara rispik muni bangbia. Kasak apia laka, taibi munanka, gridi laka, misbara kaikan laka sin apu kabia. Upla nani ba asla lakara bangwi kabia bara God yabalka nani kasak ba wal iwi bangwi kabia.​—Isaias 26:9.