¿Jehova lan mai dauki ba pain yus muni sma ki?
1. ¿Dîa lan daukaia skulka dauki aula sa?
1 Wan Smasmalkra Tara, Jehova, mapara aitani kaikisa ai napakanka nani ba dîa nu takaia nit ba lan takbia (Ais. 30:20). Naiwa piua ra, lan daukaia skulka kau tara ba tâ brih aula sa. Aiseya win baku, upla milian milian tasba aiska wina, spirit lâka ra, Jehova watla ilka ra balisa (Ais. 2:2). ¿Dîa muni? Jehova ai yabalka nani natka smalkbia dukiara (Ais. 2:3).
2. ¿Nahki Jehova smalkanka painkira wanki ba wina hilp mai munan sa?
2 Pain ridi daukisa. ¡Gâd smalkanka nani ba kasak hilp wan munan sa! Kan baku lan takan sa Gâd ba Ai nina kum brisa bara Witin yawan dukiara lukisa (Law. 83:18; 1 Pi. 5:6, 7). Baku sin, makabi walanka tara nani dukiara ansika wankan ba naha: ¿Dîa muni yawan panis taki bara pruisa ki? ¿Nahki liliaka rait aihwa ba sakaia sip sa? ¿Rayaka ba dukiara dîa lukanka bâra sa? Baha baman apia sa, Jehova tânka painkira nani wan smalkan sa wan rayaka kau lilia kabia dukiara (Jas. 1:8).
3. ¿Aisi kaikaia bara ulbaia skulka ba dîa dukia sa bara nahki yamnika ailal sakaia sip sa?
3 Jehova upla ailal ra aisi kaiki bara ulbi lan âpu nani dukiara hilp munan sa. Kangrigisan ra skul painkira yabi ba wina smalki tataukra ailal bara upla wala nani ra sin hilp munan sa. Nitka bâra sa kaka, kangrigisan almukka daknika ba sip sa baha sât skulka nani ridi daukaia. Naha skulka ra dimbia uplika nani ba “aisi kaikaia bara ulbaia lan takbia dukiara sa, baku uplika ba sip kabia Baibil stadi takaia bara upla wala ra tânka kasak ba lan daukaia” (km 10/11 wah. 4; be-S wah. 21-23). Naha sanska nani pain yus munbia kaka, naiwa piua ra rayaka kum pain brih iwbia bara naika piua ra sin (Law. 119:105; Jn. 17:3).