KRISTIAN RAYAKA KAT IWAIA
Smalkaia warkka kau pain daukaia sip sa: Nahki upla ra wauhtaya kum ulbaia sip sa
DÎA MUNI TÂNKA TARA SA. Pas Korint wauhkataya ba Pal mita wauhtaya 14 ulban ba tilara sa bara witin baha nani ba ulban muihni bara lakri kristian nani kupia bukaia dukiara. Upla kum ra wauhtaya kum ulbaia ba diara yamni nani brisa: ya ulbi ba bîla pain wahbi sakaia sip sa, bara ya wauhkataya brin uplika ba aima ailal aisi kaikaia sip sa. Naha ba tnatka pain kum sa wan pamalika nani ra smalkaia dukiara, kakaira nani ra bara ani uplika wal sip prawras kan ba smalkaia warkka ra. Ban kra, upla kum ra kau lan takan dauki ba wal kli aisaia sip apia sa, apia kaka utla uptis tara ra iwisa bara dimaika ba kan kahbisa, utla tara nani pliska ra upla sut ra chans yabras dimaia, apia kaka plis laihura nani ra iwisa. ¿Pas tâura yawan dîa lukaia sa upla tringsar kum ra wauhtaya ulbia kaka?
NAHKI DAUKAIA
Upla mawan ra aisisma baku ulbaia sip sma. Man ya sma ba tânka ba ulbaia sma bara dîa dukiara ulbisma ba sin. Nanara, makabi walanka pain kum mangks bara jw.org dukiara aisaia. Yawan Internet bâk Baibil klaska yabi ba briaia sip sa wis (ispail ra lika kau takras sa) apia kaka upla watla kat Baibil stadika yawan yabi ba, bara baha stadika ra ani ulbi sakanka yus muni ba tilara lalka kum wiaia sip sma. Wauhkataya ulbisma ba wal, jw.org dimi kaikaia wauhtayka sirpi kum blikaia sip sma, paiwaia wauhkataya kum apia kaka tratado kum.
Diara ailal ulbaia apia sa. Kan uplika ba ul aisi kaikras kainara swapaia sip sa (wauhtayka patrang baku ulbi paskan ba kaiks).
Wauhtaya ulbram ba pain laki kaiks mistik bribia apia dukiara, isi aisi kaikaia sip kabia bara pâna lâka mariks, kupia buki bîla nani bara rispik lâka ba sin. Blikaia mana ba dukiara pain tânka pliks, baku uplika ra yabia taim witin diara aibapbia apia.