¿Sturi yamni ba rait pali Gâd wina balisa?

1. ¿Baibil ba ya wina balan?

Baibil ra sturi yamni nani ulban sa. Bahara wisa upla nani  ba naha tasba ra ban kaia ra iwbia (Lawana 37:29). Baibil ba buk 66 ra baiki sakan sa. Bara Gâd waitna 40 yus munan Baibil ba ulbia dukiara. Blasi Sturka wina Kli Smalkanka ba kat Moses ulban 3.500 mani yawan piua ninara. Bara las bukka ba apastil Jan ulban 1.900 mani luan ba ra. ¿Baibil âiulbra nani ba ya lukanka wal ulban? Gâd ai spiritka holikira bâk witin nani ra aisan (2 Samuil 23:2). Witin nani Gâd lukanka wal ulban, silp ai lukanka nani lika apia. Baha mita Baibil ba Jehova Gâd wina balisa. 2 Timoti 3:16 bara 2 Pita 1:20, 21 aisi kaiks.

2. ¿Yawan nahki nu sa Baibil ba tânka kasak brisa?

Yawan nu sa Baibil ba Gâd wina balisa, kan naika piua ra dîa takbia ba sitnika kat aisisa. Upla kumi sin naha daukaia sip apia sa (Jasua 23:14). Jehova laih purara ba baman sip sa upla nani ra dîa takbia ba nu kaia. Aiseya 42:9 bara 46:10 aisi kaiks.

Baibil ba Gâd wina balan ba mita buk wala nani baku apia sa. Baibil milian milian ba upla ra yaban sa bara bîla aisanka handat handat ra ulbi sakan sa. Bara waitna 40 mita ulban, sakuna sim lukanka brisa. Baku sin Baibil ba Gâd latwanka lâka dukiara wan marikisa. Bara karnika brisa upla rayaka nani ba sât wala daukaia dukiara. Naha sut ba wan marikisa Baibil ba Gâd wina balan. 1 Tesalonaika 2:13 aisi kaiks.

3. ¿Baibil ba dîa dukiara aisisa?

Baibil ba aisisa Gâd upla nani dukiara diara pain daukbia. Baku sin tânka wan marikisa nahki muni upla nani ba paradais kum ra iwaia blisinka lus tiwan. Bara nahki muni naha tasba kli paradais kum takbia. Param Marikanka 21:4, 5 aisi kaiks.

Baibil ra Gâd lâka nani, Ai smalkanka bara Witin ai kupia kraukanka takisa. Baku sin Baibil ra takisa Gâd nahki upla nani wal aisi kan ba. Naha ba Witin daukanka painkira nani wan marikisa. Baibil ba hilp wan munisa Gâd ra kau pain kakaira takaia. Bara nahki Witin pânika takaia sip sa. Lawana 19:7, 11 bara Jems 2:23, TNM bara 4:8 aisi kaiks.

4. ¿Nahki Baibil ba tânka briaia sip sa?

Naha wauhkataya ba hilp wan munbia Baibil tânka briaia. Bara Jisas upla ra smalkan baku yawan daukbia. Witin tikska kum aisi kaikan ningkara ‘ai tânka aisi nani ba dukiara smalkan’. Luk 24:27, 45 aisi kaiks.

Gâd sturka yamni ba uba painkira sa. Sakuna upla manis ba naha sturka yamni pain kaikras bara walisa taim ai kupia baikisa. Sakuna swirka baha mai takaskbiara. Gâd ra kakaira takma kaka, raya ban kaia lâka briaia sip kama. Jan 17:3 aisi kaiks.