¿Gâd tasba na dukiara dîa lukisa?

1. ¿Dîa muni Gâd ba tasba na paskan?

Jehova tasba na upla nani dukiara paskan. Bara witin nani nahara iwbia. Gâd mita Adam Iv wal paskras kan heven ra iwbia dukiara. Jehova insal nani paskan heven ra iwbia dukiara (Job 38:4, 7). Gâd mita waitna ba paradais kum ra mangkan. Naha pliska ba nina Eden giadinka mâki kan (Blasi Sturka 2:15-17). Jehova Adam bara ai luhpia nani ra sanska yaban lilia ban kaia ra naha tasba ra iwbia dukiara. Lawana 37:29 bara 115:16 aisi kaiks.

Pas tâura Eden giadinka baman paradais kum kan. Upla nani ba luhpa sahwi tasba na banhkaia kan. Bara piu lubia ba ra, tasba na purara karnika bribia bara paradais kum daukaia kan (Blasi Sturka 1:28). Tasba na sauhki tikan kabia apia. Naha ba ban upla nani ai watla baku kabia. Lawana 104:5 aisi kaiks.

2. ¿Dîa muni tasba na paradais kum apia sa?

Adam Iv wal Gâd lâka krikan. Baha mita, Jehova witin nani ra paradais wina kangbi sakan. Paradais ba tiwan, bara upla kumi sin kli paskaia sip apia kan. Baibil ra wisa: “Tasba na saurakira nani mihta ra swisa” (Job 9:24). Blasi Sturka 3:23, 24 aisi kaiks.

¿Jehova naha tasba na dukiara dîa luki ba pat ai auya tikan? ¡Apia! Witin sika karnika sut bri Gâdka ba. Witin dîa pramis muni ba daukisa (Aiseya 45:18). Gâd upla nani dukiara dîa luki kan ba daukbia. Lawana 37:11, 34 aisi kaiks.

3. ¿Nahki tasba na paradais kum daukbia?

Naha tasba paradais kum takbia, kan Jisas King kum baku baha daukbia. Baibil ra wisa war kum bâra kabia, ai nina ba Armagedan mâkisa. Bahara Jisas ai insalka nani kira Gâd mapara bûi uplika nani ra sauhki tikbia. Baha wina, Jisas ba Sitan ra 1.000 mani priski bribia. Gâd uplika nani ba naha sauhki tikanka ba wina pri takbia, kan Jisas mita swaki sâkbia bara tâ bribia. Witin nani ba paradais ra raya ban kaia lâka bribia. Param Marikanka 20:1-3 bara 21:3, 4 aisi kaiks.

4. ¿Ahkia pât wahwanka ba âpu kabia?

¿Ahkia Gâd diara saura nani ba âpu daukbia naha tasba ra? Jisas “sain” kum yaban ahkia tnata yua lamara kabia. Naiwa piua ra dîa taki ba upla rayaka ra âpu daukaia sip sa, bara wan marikisa yawan tnata yua nani ra iwisa. Matiu 24:3, 7-14, 21, 22 aisi kaiks.

Jisas naha tasba purara 1.000 mani king aimakbia piua ra pât wahwanka ba âpu daukbia (Aiseya 9:6, 7; 11:9). Jisas ba King kum kabia, baku sin Prîs Tara bara ya Gâd ra latwan kaiki ba witin saurka lâka ba âpu daukbia. Jehova Jisas bâk siknis nani ba, almuk takaia lâka, bara prura ba sin âpu daukbia. Aiseya 25:8 bara 33:24 aisi kaiks.

5. ¿Ya nani paradais ra iwi banhbia?

Ya Gâd kupia lâka dauki ba paradais ra iwbia (1 Jan 2:17). Jisas ai nina blablikra nani ra blikan upla bawikira nani ra smalkaia bara nahki Gâd pânika takaia sip ba. Naiwa piua ra, Jehova upla milian milian ra smalkisa paradais ra iwbia dukiara (Sofonías 2:3). Jehova Witniska nani Aidrubanka Watla ra upla nani ba lan takisa marit uplika kum kau pain kaia. Baku sin, aisa yapti kum pain kaia lan daukisa. Tuktan nani ba ai aisa yapti aikuki Gâd ra mayunisa bara sturi yamni nani wina diara tânka ailal lan takisa. Miqueas 4:1-4 aisi kaiks.