Wan asla takanka ba rilidian wala nani pasin nani ra lalah aibapi ba baku apia sa. Kau ni, patitara kristianka nani daukan baku, spirit lâka ra kristian waitna nani bâra sa ‘kangrigisan nani ba pura kaiki main kaikisa’ (Apastil Nani Sturka 20:28). Naha kangrigisan almukka nani ba spirit lâka ra pâwan bara muihni lakri nani ra tâ brih main kaikisa. Baibil ra wisa: “Lalah brin mai dauki pali baku lika daukpara, kuna upla dukia daukaia want pali baku dauks. Baha nani mihtam ra mangkan ba purara dawanka baku kaia lika apia, sakuna tânka nani mariki bas daukankam ba ni sin” (1 Pita 5:1-3). ¿Witin nani ba dîa warkka nani daukisa?

Yawan dukiara luki main wan kaikisa. Kangrigisan almukka nani ba muihni lakri nani ra spirit lâka ra tâ brih main kaikisa. Gâd witin nani ra wark pain kum yaban sa. Sakuna witin nani baha yus munras upla wala ra taibi munaia. Kau ni, yus munisa muihni lakri nani yamnika dukiara, baha mita lilia lâka bâra sa (2 Korint 1:24). Sepad nani ba ai sîpka nani main kaiki ba baku, kangrigisan almukka nani ba muihni lakri kumi bani ra kakaira takaia trai munisa (Sins Lâka 27:23).

Gâd kupia lâka daukaia hilp wan munisa. Wik bani, kangrigisan almukka nani ba aidrubanka nani tâ brisa bara wan kasakka lukan lâka kau karna daukisa (Apastil Nani Sturka 15:32). Naha waitnika nani smalkaia warkka ba tâ brisa. Yawan ra lan wan daukisa nahki kau pain smalkaia.

Spirit lâka ra wan kupia bukisa. Yawan kumi bani dukiara luki ba mita, kangrigisan almukka nani ba wan watla nani ra wisa, apia kaka aidrubanka watla ra yawan wal aisisa. Bara Baibil wina kupia kraukanka wankisa (Jems 5:14, 15).

Kangrigisan almukka nani wark takaia sa ai pamalika nani dukiara. Baha mita ai taimka ba kunhku sa. ¡Naha kristianka waitna nani ra rispik tara munaia sa! (1 Tesalonaika 5:12, 13.)

• ¿Kangrigisan almukka nani dîa warkka nani daukisa?

• Kangrigisan almukka nani ba, ¿nahki marikisa yawan dukiara luki ba?

Kangrigisan main kaikaia dukiara Baibil ra ‘kangrigisan almukka nani bara hilp mamunra nani ba’ dukiara aisisa (Pilipai 1:1). Kangrigisan aihkika ra naha sât kristianka waitna bâra sa. ¿Hilp mamunra nani ba kangrigisan ra dîa warkka daukisa?

Kangrigisan almukka nani ra tâ baikisa. Hilp mamunra nani ba spirit lâka ra pâwan sa. Yawan witin nani ra kasak lukaia sip sa bara ai warkka nani pain daukisa, wahma apia kaka waitna almuk kabia sin. Witin nani wark kum kum kangrigisan ra daukisa. Naha ba kangrigisan almukka nani ra sanska yabisa sepad warkka dauki muihni lakri nani ra smalkaia dukiara.

Wark pain daukisa. Hilp mamunra nani ba upla ra yamni balan bîla yabisa. Wala nani ba bin saki pliska pura kaikisa, kangrigisan ra upla an balan ba kulkisa bara ulbi sakanka nani sin muihni lakri nani ra yabisa. Baku sin, ani pliska ra smalkaia makaban ba muihni lakri ra yabisa. Aidrubanka Watla ba main kaikaia warkka tâ baikisa. Ani warkka hilp mamunra mihta ra mangki ba witin nani wilinkira daukisa. Baha mita kangrigisan ba witin nani ra tara kulkisa (1 Timoti 3:13).

Sampla pain kum mangkisa. Hilp mamunra nani ba wahbi sakan, ai daukanka pain nani bri ba mita. Aidrubanka ra aisanka nani daukisa piua ra, wan kasakka lâka kau karna daukisa. Smalkaia warkka ba tâ baikisa piua ra, takaskraskira smalkaia hilp wan munisa. Bara kangrigisan almukka nani ra tâ baikisa taim, lilia lâka bara asla lâka ba muihni lakri nani ra smalkisa (Epesus 4:16). Piu lubia ba ra, witin nani sin kangrigisan almukka baku takaia sip sa.

• ¿Hilp mamunra nani ba dîa sât waitnika nani sa?

• ¿Hilp mamunra nani ba nahki hilp munisa kangrigisan ba pain kabia dukiara?

Grik Ulbanka nani ra Bernabé bara apastil Pal dukiara aisisa. Naha waitnika nani impaki pura kakaira baku kan, patitara kangrigisan nani ra wih kaiki kan. ¿Dîa muni? Kan witin nani muihni lakri nani dukiara luki kan. Apastil Pal win witin want kan “muihni nani ba nahki sapa kaikaia”. Witin wilin kan kilumita ailal impakaia muihni lakri nani ra spirit lâka ra tâ baikaia dukiara (Apastil Nani Sturka 15:36). Naiwa piua ra, impaki pura kakaira nani sim lukanka brisa.

Wan kupia bukisa. Impaki pura kakaira bani kangrigisan 20 baku, mani bilara aima wâl, wik kum witin nani ra wih kaikisa. Yawan yamnika manis sakaia sip sa naha waitnika nani bara ai maritka wina. Witin nani ba upla almuk bara wahma tiara nani ra kakaira takaia trai munisa. Baku sin, muihni lakri nani ra Baibil stadika yabaia yula kahbisa. Naha kristian waitna nani kangrigisan almukka nani wal sepad warkka daukisa. Wan kasakka lukan lâka kau karna daukaia dukiara, aidrubanka ra aisanka pain nani yabisa (Apastil Nani Sturka 15:35).

Upla sut dukiara lukisa. Impaki pura kakaira nani ba ai brinka sa kangrigisan nani ra hilp munaia. Witin nani ba kangrigisan almukka nani bara hilp mamunra nani wal asla takisa. Baku natka ra, kangrigisan ba nahki pâwi ba kaikaia sip sa bara kristian waitna nani ra kupia kraunka nani yabisa ai warkka pain daukbia dukiara. Impaki pura kakaira nani ba tâura smasmalkra nani ra smalkaia warkka pain daukaia dukiara hilp munisa. Baibil stadika nani aidrubanka nani ra wi ba ra kakaira takisa bara spirit lâka ra pâwisa sapa makabi walisa. Naha kristian waitna nani ba ‘yawan dukiara luki sakripais daukisa’ (2 Korint 8:23). Yawan witin nani nahki ai kasakka lukan lâka Gâd ra mariki ba nina blikisa (Hibru Nani 13:7).

• ¿Dîa muni impaki pura kakaira nani kangrigisan ra wih kaikisa?

• Wih mai kaikisa taim, ¿dîa yamnika sakaia sip sa?

Muihni lakri kum pât wahwisa piua ra, Jehova Witniska nani ba minitka ra natka kum plikisa hilp munaia dukiara. Baha sut dauki ba witin nani ra wan latwanka lâka marikisa (Jan 13:34, 35; 1 Jan 3:17, 18). ¿Nahki hilp munaia sip sa?

Wan lalahka wal. Judia tasbaya ra plun wahwan kum takan taim, Antiok wina kristianka nani ba lalah mapara witin nani ra tâ baikan (Apastil Nani Sturka 11:27-30). Sim baku, wan muihni lakri nani pât wahwisa yawan walisa piua ra, kangrigisan bâk lalah wal wan prisantka nani yabisa. Baku witin nani dîa ai nitka ba bribia (2 Korint 8:13-15).

Natka wala ra tâ baikisa. Plis kum ra trabil saura kum takan kaka, kangrigisan almukka nani ba muihni lakri nani ra plikisa. Bara hilp munaia dukiara dakni kum paskisa. Plun, lî klin, kwala, anira takaskaia pliska pain kum bara sîka nani sin yabisa. Jehova Witniska ailal ba diara kum kum daukaia lan sa taim, kristian nani trabil bri nani ra wih hilp munisa. Naha sut ai lalahka wal aibapi daukisa. Baku sin, Aidrubanka Watla nani kli paskaia dukiara hilp munisa. Naha asla lâka bara pât nani luan ba ra dîa lan takan ba sut hilp wan munisa trabil tara kum takisa piua ra minitka ra hilp munaia. ‘Kasak lukan lâka ra wan muihni lakri nani’ hilp munisa, sakuna rilidian wala uplika nani ra sin hilp munaia trai munisa (Galesha 6:10).

Baibil wal maisa nihkisa. Pât wahwan uplika nani ba hilpka tara nit sa. Baha piua nani ra, Jehova lamara waia sa, kan Witin sika “maisa nanihkra Gâdka sa” (2 Korint 1:3, 4). Upla pât wahwi nani ra Baibil dîa pramis muni ba dukiara aisisa. Baku sin, witin nani ra smalkisa Gâd Kingka lâka baman sip sa wan trabilka nani, wan latwanka bara dîa dîa ambuk wan muni ba âpu daukbia (Param Marikanka 21:4).

• ¿Dîa muni pât tara kum takuya taim Jehova Witniska nani ba minitka ra hilp munaia sip sa?

• Upla nani pât tara wahwan ba ra, ¿dîa hilpka wal maisa nihkaia sip sa?

Jisas kau pruras kan ba ra, ai apastilka nani wina walhwal baman ra paiwan witin wal plis kum ra wih aisaia. Naha nani ba Pita, Jems, Jan bara Andru. Witin naha tasba ra ahkia kli bâra kabia ba sainka aisan taim, makabi walanka kum daukan: “¿Bamna ya pali ba alba kasak sinskira ba? Baha lika ai dawanka mita ai watla suliarka nani purara mangkan ba, witin nani ra piua kat plun dakakbia dukiara” (Matiu 24:3, 45; Mark 13:3, 4). Jisas ai disaipilka nani ra win witin ba “dawanka” sa. Baha mita witin upla daknika kum mangkbia las yua nani ra kristian wala nani ra spirit lâka ra plun dakakbia dukiara. ¿Ya nani kabia?

Witin nani ba Jisas nina blablikra wahbi sakan daknika sirpi kum sa. “Alba kasak sinskira ba” Jehova Witniska nani Tâ Bri Daknika sa. Jehova pakanka nani ra ai piua kat spirit pata yabisa. Yawan kumi bani naha alba kasakkira wina spirit pata ba ‘ai piua kat’ brisa (Luk 12:42).

“Alba sinskira” ba Jehova watla tâ brisa (1 Timoti 3:15). Jisas naha albika ra wark tara kum yaban, Jehova asla takanka naha tasba ra ba tâ briaia. Naha tânka sa yuyaka nani main kaikaia, smalkaia warkka ba tâ briaia bara kangrigisan nani bâk smalkaia. Baha mita, piua kat yawan dîa nit ba wankaia dukiara, “alba kasak sinskira ba” spirit pata ba yabisa. Sampla baku, ulbi sakanka nani smalkaia warkka ra yus muni ba bara aidrubanka nani ra dîa smalki ba witin nani tâ brisa.

Naha ‘albika’ kasak sa, kan Baibil ra dîa smalki ba kat daukisa bara sturi yamni ba smalkaia tâ baikisa. Baku sin sinskira sa, kan Jisas naha tasba ra dîa bri ba tâ brisa (Apastil Nani Sturka 10:42). Jehova naha daknika warkka ba blisin munisa, kan Jehova Witniska nani kau ailal takisa bara spirit lâka ra diara manis brisa (Aiseya 60:22; 65:13).

• ¿Jisas mita yaura wahbi sakan kristian nani ra spirit lâka ra plun dakakbia dukiara?

• ¿Nahki natka ra albika na kasak bara sinskira sa?

Patitara kristianka nani piua ra, dakni sirpi kum, Jerusalem ra ‘apastil nani bara waitna almuk aikuki’ tâ bri daknika kum baku wark taki kan. Witin nani kristian wala nani yamnika dukiara wark takan (Apastil Nani Sturka 15:2). Witin nani sim lukanka bri kan. Bamna Ulbanka nani ba laki kaiki kan bara Gâd spiritka holikira mita witin nani ra tâ bri kan (Apastil Nani Sturka 15:25). Naiwa piua ra sim samplika nina blikisa.

Gâd mita wahbi sakan ai kupia lâka daukaia. Kristian waitna nani Tâ Bri Daknika tilara wark taki ba Baibil ra kasak lukisa, baku sin spirit lâka ra tânka manis brisa. Witin nani wik bani asla takisa muihni lakri tasba aiska ra dîa taki ba laki kaikaia dukiara. Patitara piua ra dauki kan baku, Tâ Bri Daknika ba Baibil smalkanka nani yabisa, wauhkataya ulbi bâk, apia kaka impaki pura kakaira nani bara kristian waitna wala nani wal sin. Naha ba hilp munisa Jehova uplika nani asla lâka ra iwaia (Apastil Nani Sturka 16:4, 5). Tâ Bri Daknika ba spirit pata ba pura kaikisa. Smalkaia warkka ba tâ brisa bara kristian waitna nani kangrigisan ra ai warkka nani dauki ba sin pura kaikisa.

Jehova spiritka holikira witin nani ra tâ brisa. Tâ Bri Daknika ba, wan Papaskra Tara, Jehova, bara kangrigisan Lalka Jisas ba nina bliki ai warkka nani daukisa (1 Korint 11:3; Epesus 5:23). Baha waitnika nani kristian nani sut lalka baku ai dara walras. Kau ni, Gâd mita wahbi sakan kristian nani baku “sîp Luhpia ba nina blikisa ani anira wabia ba” (Param Marikanka 14:4). Tâ Bri Daknika dukiara wan pura sunbia kaka, witin nani tingki lukbia.

• ¿Patitara piua ra tâ bri daknika ba ya nani kan?

• ¿Nahki natka ra Tâ Bri Daknika ba Gâd hilpka ba plikisa?

Betel ba Hibru bîla ra “Gâd Watla” tânka sa (Blasi Sturka 28:17, 19). Naha ba nina pain kum sa Jehova Witniska nani apiska nani tasba aiska ra bri ba dukiara. Naha apiska nani wina smalkaia warkka ba tâ brisa. Tâ Bri Daknika ba apiska kau tara ba ra iwisa. Naha ba Nueva York (Miriki Kuntrika) ra sa. Naha pliska wina apiska nani kuntri wala nani ra ba pura kaikisa. Naha uplika nani ba bahara iwi ba mita Betel pamalika mâkisa. Witin nani pamali kum sa, aikuki asla wark takisa, plun pîsa bara Baibil stadi takisa (Lawana 133:1).

Betel uplika nani ba pamali baku iwisa. Betel apiska bani ra, waitna bara mairin nani Gâd kupia lâka dauki wark takisa bara King lâka ba tâ baikisa (Matiu 6:33). Witin nani kumi sin ai mana briras. Sakuna anira yapaia pliska kum bara plun sin yabisa. Bara ai nitka nani dukiara hilpka sirpi kum brisa. Kumi bani Betel ra wark kum daukisa. Sampla baku, apiska ra, kitsin ra baku sin plun piaia pliska ra wark takisa. Kum kum ba ulbi sakanka nani saki masinka nani ra wark takisa, rum nani ba klin munisa, kwala tuskisa apia kaka diara nani aisawan ba kli paskisa bara wark wala nani sin daukisa.

Naha pliska ba King lâka warkka tâ baikisa. Betel apiska nani ba paskan sa Baibil tânka nani bîla aisanka sât sât ra dîa sip ba kat smalkbia dukiara. Naha wauhkataya ba samplika kum sa. Naha ba Tâ Bri Daknika ulban sa bara Internet bâk bîla lalakra nani ra yaban upla bîla aisanka ailal ra ulbi sâkbia dukiara. Baha wina ulbi saki masinka nani ra paskan bara 110.000 pura kangrigisan ra blikan sa. Betel ra wark taki uplika nani sut naha sturi yamni smalkaia warkka ba tâ baikisa (Mark 13:10).

• ¿Betel apiska nani ra ya nani wark takisa bara dîa blisinka nani yabisa?

• Betel apiska nani ba, ¿dîa warkka tâ baikisa?

Betel watla ra wark taki uplika nani ba diara sut dauki ba smalkaia warkka kuntri kum ra apia kaka kau ailal ra tâ baikisa. Sampla baku, bîla aisanka wala nani ra lakisa, ulbi sakanka nani bara buk nani taya ba paskisa. Ulbi sakanka wala nani suni swisa. Baku sin, CD apia kaka DVD ra lilka nani sakisa.

Betel Apiska nani Pura Kaiki ba smalkaia warkka ba tâ brisa. Tâ Bri Daknika ba naha apiska nani ba spirit lâka ra pâwan kristianka waitna yumhpa apia kaka kau ailal mihta ra mangkisa. Bara naha waitnika nani baha kuntrika nani ra dîa taki ba apia kaka dîa trabilka nani bâra ba dukiara Tâ Bri Daknika ra wisa. Naha dauki ba mita hilp munisa ulbi sakanka nani ra, aidrubanka apia kaka aidrubanka kau tara nani ra dîa ulbi sâkbia ba laki kaikaia. Tâ Bri Daknika ba, nit sa piua ra, pura kakaira wala nani blikisa. Naha kristianka nani Betel apiska nani pura kaiki uplika nani ra kupia kraukanka yabisa, ai warkka ba kau pain daukaia (Sins Lâka 11:14). Betel apiska nani ra wih kaiki uplika kum ba kuntri kum ra auya taim aidrubanka painkira kum daukisa bara aisanka kum yabisa, bahara iwi uplika nani dukiara.

Kangrigisan nani ra tâ baikisa. Betel apiska ra laki kaikisa kangrigisan raya kum daukaia sip sa sapa. Baku sin, tâura smasmalkra nani, misan uplika nani, bara impaki pura kakaira nani warkka ba laki kaikisa. Aidrubanka tara nani ra dîa smalkbia, Aidrubanka Watla raya nani mâkaia warkka tâ brisa. Baku sin, ulbi sakanka nani kangrigisan nani ra blikisa. Betel apiska nani ra dîa warkka dauki ba sut smalkaia ba tâ baikisa (1 Korint 14:33, 40).

• Betel Apiska nani Pura Kaiki ba, ¿nahki muni Tâ Bri Daknika ra tâ baikisa?

• ¿Betel apiska ra dîa warkka daukisa?

Sturi yamni nani ba ‘nisan sâtka bani ra, taika bani ra, bîla sâtka bani ra bara upla sut ra smalkaia dukiara’, Jehova Witniska nani ba ulbi sakanka nani bîla aisanka 700 pura sakisa (Param Marikanka 14:6). ¿Naha warkka tara ba nahki daukisa? Tasba aiska ra Jehova Witniska nani tilara âiulbra nani bâra sa. Baku sin, bîla lalakra nani 3.300 baku naha ulbi sakanka nani lakisa.

Ulbi sakanka nani Inglis bîla ra ulbisa. Tâ Bri Daknika ba mita Âiulbra nani Daknika ba ra pura kaikisa. Naha ba apiska kau tara bâra sa. Baku sin naha daknika ba âiulbra nani warkka apiska kau tara bara apiska wala nani ra dauki ba pura kaikisa. Bahara muihni lakri ailal wark taki ba mita tasba aiska ra dîa taki ba dukiara ulbi sakaia sip sa. Baku natka ra wan ulbi sakanka nani ba upla sut dukiara sa.

Ulbi sakanka nani ba bîla lalakra nani ra blikisa. Ulbi sakanka kum pain sa sapa laki kaikan sa taim, Internet bâk bîla lalakra nani ra blikisa. Baha wina, witin nani ba ai bîla aisanka nani ra lakisa, ningkara pain kabia dukiara laki kaikisa. Bara las ra witin nani tila wina kum ulbi sakanka ra mistik kum bâra sapa saki muni wapnika mangkisa. Bîla lalakra nani ba ulbi sakanka nani lakan ba ra ‘bîla kau pain nani ba’ yus munisa. Bara laki kaikisa naha ulbi sakanka nani ba Inglis bîla ra dîa ulban ba baku kabia (Smasmalkra 12:10).

Masin pain nani yus munisa. Computadora kum ba bîla lalakra kum apia kaka âiulbra kum ba wal sip prakras sa. Sakuna, ulbi sakanka nani kau isti lakbia dukiara muihni lakri nani ba computadora yus munisa. Bahara diccionarios, wauhkataya, buk bara ulbi sakanka wala nani bâra sa. Baku sin, Jehova Witniska nani ba Sistema Electrónico de Edición Plurilingüe (MEPS, naha sika ai nina prahni Inglis bîla ra) programika ba paskan sa. Naha programika wal ulbi sakanka nani bîla aisanka ailal ra computadora kum ra ulbaia sip sa. Baha wina, ulbi sakanka nani ra lilka nani paskisa bara ridi sa taim masin kum ra sakisa.

Bîla aisanka kum upla wiria baman aisi kabia sin, yawan ba witin nani dukiara ulbi sakanka nani ban paskisa. ¿Dîa muni? Kan Jehova “want sa, upla sut ba swaki sakan kabia, kasak tânka ba sin witin nani kakaira taki banhbia” (1 Timoti 2:3, 4).

• ¿Wan ulbi sakanka nani ba nahki paskisa?

• ¿Dîa muni bîla aisanka ailal ra ulbi sakanka nani paskisa?

Mani bani, Jehova Witniska nani ba mana luha Baibil nani bara ulbi sakanka milian milian upla mihta ra swisa. Baku sin, Aidrubanka Watla bara Betel apiska nani paskisa. Bahara wark taki uplika nani bara misan uplika nani ra sin hilpka yabisa. Trabil tara takuya taim, baha pliska nani ra sin hilpka blikisa. Naha sut daukaia dukiara, ¿ani wina lalahka sakisa?

Yawan ba lalah makabras. Smalkaia warkka daukaia dukiara lalah ailal yus munaia sa. Sakuna upla ra lalah makabras. Mani 100 luan ba ra, La Atalaya wauhkataya ra win yawan ba Jehova hilpka brisa. Baha wina aisan: “Yawan ba upla ra lalah makabia apia bara upla ra sin wibia apia hilpka yabia”. Bara baku takan sa (Matiu 10:8).

Upla nani silp luki kaiki dîa yabi ba wal tâ baikisa. Upla ailal ba smalkaia warkka ba pain kaiki ba mita ai kupia ra dîa laki kaikan ba wal tâ baikisa. Baku sin, Jehova Witniska nani ba ai taimka sakisa, ai karnika yabisa bara diara sut bri ba yus munisa Gâd kupia lâka daukaia dukiara (1 Kronikas 29:9). Aidrubanka Watla ra bara wan Aidrubanka Kau Tara nani ra bakska nani bâra sa wan prisantka nani mangkaia dukiara. Naha prisantka aihkika ba upla umpira nani wina balisa. Naha uplika nani ba Jisas mita sim piarka mairin kata baku kaikisa. Naha ba lalah mâ lupia wâl tempel watla bakska ra mangkan (Luk 21:1-4). Upla kumi bani laki kaikaia sip sa ai prisantka “dîa yaia ai kupia ra lukan ba kat yaia sa” (1 Korint 16:2; 2 Korint 9:7).

Yawan kasak lukisa Jehova mita ya ai yuyaka nani wal Witin ra mayunaia want ba blisin munbia. Baku natka ra King lâka warkka bara Ai kupia lâka ba daukbia (Sins Lâka 3:9).

• ¿Wan asla takanka ba nahki natka ra sât wala sa rilidian wala nani ba wal?

• ¿Upla prisantka nani yabi ba nahki yus munisa?

Yawan Gâd ra mayuni pliska ba Aidrubanka Watla nina mâkisa. Naha nina brisa, kan diara sut lan taki ba Gâd Kingka lâka dukiara sa. Naha ba Jisas smalkanka kau tara kan (Luk 8:1).

Tawan ra Gâd ra mayunaia pliska kum sa. Baha pliska nani wina smalkaia warkka ba tâ brisa (Matiu 24: 14). Naha Watla nani ba sât sât bâra sa, sakuna sut ba painkira sa. Aidrubanka Watla kum kum ra kangrigisan kau ailal asla takisa. Mani luan nani ra, tausin tausin paskan sa (yu bani tasba aiska ra matsip paskisa) kangrigisan kau ailal taki ba mita. ¿Nahki naha warkka daukan sa? (Matiu 19:26.)

Upla nani yaban lalahka apahki bri ba wal paskisa. Baha lalahka ba Betel apiska kau lamara ba ra blikisa. Baha natka ra kangrigisan nani ba sip sa Aidrubanka Watla saura sa kaka, kli paskaia apia kaka âpu sa kaka raya kum paskaia.

Upla wilinkira nani wal paskisa. Kuntri ailal ra Aidrubanka Watla nani Mâki daknika nani bâra sa. Naha daknika nani ra muihni lakri wilinkira nani wark takisa bara kangrigisan wala apia kaka kuntri wala ra wih kangrigisan kristianka nani ra hilp munisa ai Aidrubanka Watla paskaia dukiara. Sakuna tasba pliska wala nani ra lika utla paskaia lan kristianka nani ba bui Aidrubanka Watla aisawan ba, apia kaka raya kum paskaia nit sa kaka paskisa. Baku sin upla wala nani mana luha wark takisa. Sakuna baha Aidrubanka Watla paski uplika aihkika ba sim baha pliska wina sa bara witin nani bahara asla takbia. Jehova spiritka holikira bara muihni lakri wark karna taki ba mita naha warkka nani daukan sa (Lawana 127:1; Kolosi 3:23).

• ¿Dîa muni yawan Gâd ra mayuni pliska ra Aidrubanka Watla nina mâkisa?

• ¿Nahki natka ra Aidrubanka Watla nani tasba aiska ra paskisa?

Jehova Witniska Aidrubanka Watla nani ba Jehova ra mayunaia dukiara sa. Baha mita klin bara pain pali kaia sa. Klin munaia ba blisin kum sa, Jehova ra mayunanka lâka tilara sa, baha mita yawan sut tâ baikaia sa.

Aidrubanka lubia ningkara, klin munaia warkka ba daukaia sa. Aidrubanka bani lubia ningkara, kangrigisan sut ba wilinkira ni klin munaia warkka ba daukisa. Bara wik bilara aima kumi klin munaia warkka kau pain daukisa. Kangrigisan almukka apia kaka hilp mamunra kum ba klin munaia warkka ba tâ brisa. Witin nani ba pahbisa, plur ba dikisa, pukpuka ba diki sakisa, sir nani ba ai pliska kat mangkisa, tailit nani ba klin munisa, windar nani ba diara mâka alkan kaka klin daukisa, glas nani ba sin klin daukisa; dipasta ba saki muni plis wala ra lulkisa, bara latka nani ba sin skahkisa. Bara mani bilara aima kum pan klin munaia warkka kau tara kum daukisa. Tuktan nani ra lan daukaia sa naha warkka tâ baikbia, baku natka ra naha pliska ra kau rispik munaia lan takbia (Smasmalkra 5:1).

Diara aisawan ba kli paskaia dukiara tâ baikisa. Mani bani Aidrubanka Watla latka bara bila ba pain sa sapa laki kaikisa. Baku natka ra diara aisawan bâra sa kaka laki kaikisa dîa daukbia. Naha daukisa taim, hilp munisa naha pliska ba klin, pain bara wihka ra wabia dukiara (2 Kronikas 24:13; 34:10). Aidrubanka Watla kum klin bara pain sa kaka, Jehova mayunanka ra kulkanka yabisa. Baha mita, wilinkira tâ baikisa kaka, marikbia yawan Jehova ra latwan kaikisa (Lawana 122:1). Baku sin, upla wala wan kaiki ba tâ iwbia (2 Korint 6:3).

• ¿Dîa muni Jehova ra mayuni pliska nani ba main kaikaia sa?

• ¿Dîa warkka nani daukisa Aidrubanka Watla ba klin bri kabia dukiara?

¿Tânka kasak ba kau lan takaia want sma? ¿Tiks kum, Baibil sturka apia kaka plis kum bara diara kum patitara piua ra takan ba kau pain tânka briaia want sma? ¿Pat luki kaikram sa Baibil ba hilp mai munaia sip sa trabil kum pura luaia? Baku sa kaka, aitani sa Aidrubanka Watla ra ulbi sakanka nani bâra ba pain yus munaia.

Aidrubanka Watla ra ulbi sakanka bâra ba yus muns. Ban kra Jehova Witniska ulbi sakanka nani man dîa bîla aisisma ba sut âpu sma. Sakuna, Aidrubanka Watla ra ulbi sakanka kau raya sakan nani ba bâra sa. Baku sin, bahara Baibil sâtka wala nani bara diccionarios apia kaka wauhkataya wala nani sin bâra sa. Aidrubanka kainara apia kaka lubia ningkara yus munaia sip sma. Ban kra computadora kum bâra sa, bara Watchtower Library brisa. Naha CD ka ra ulbi sakanka aihkika ba takisa bara natka isi kum brisa pliki sakaia dukiara. Bahara tiks, bîla nani bara diara wala nani sin plikaia sip sa.

Nahki Smalkaia ba Skulka dimi uplika nani ra hilp munisa. Man naha skulka dimisma kaka, ulbi sakanka nani Aidrubanka Watla ra ba yus munaia sip sma aisankam nani daukisma piua ra. Skulka tâ bri ba mihta ra sa naha ulbi sakanka nani pliska ba main kaikaia, bara ulbi sakanka las nani ba bahara dingkisa. Witin apia kaka Baibil stadika maiki uplika ba hilp mai munaia sip sa dîa plikisma ba sakaia dukiara. Sakuna amya tiwbiara buk nani Aidrubanka Watla wina saki plis wala ra sip bri waras; baku sin, naha ulbi sakanka nani pain main kaikaia sma bara baha nani ra diara ulbaia apia sa.

Baibil ra wisa ‘Gâd tânka kasak ba’ lan takaia dukiara, yawan wilin kaia sa naha ba “diara mana yukukan ra kan plikisma baku” (Sins Lâka 2:1-5). Aidrubanka Watla ra ulbi sakanka nani bâra ba yamnika tara kum sa, baha tânka pliki sakaia dukiara.

• Aidrubanka Watla ra, ¿dîa hilpka tara bâra sa tânka nani pliki sakaia dukiara?

• ¿Nahki muni Aidrubanka Watla ra ulbi sakanka nani bâra ba wina yamnika sakaia sip sa?

Jisas ai disaipilka nani ra win: “Man nani yarka ingnikam upla sut mawanra ingbia, bara diara yamni dauki banhwisma ba kaiki, witin nani mita kasbrika purara bâra ba mayunbia” (Matiu 5:16). Baha mita upla sinska lâka pâwi auya ba ra diara raya nani paski ba Jehova Witniska nani yus munisa, sampla baku, Internet. Bahara jw.org/miq pliska ba Jehova Witniska nani yus munisa ai smalkanka bara dîa dauki ba marikaia dukiara. ¿Dîa bahara sakaia sip sma?

Baibil makabi walanka nani ansika yabisa. Bahara makabi walanka kau tara nani upla dauki ba ansika sakaia sip sma. Tanka Kasak Ba Nu Takan mai Daukisa ki? wauhkataya ra makabi walanka 6 sakaia sip sma. Naha ba bîla aisanka 400 pura ulbi sakan sa. Baku sin, Traducción del Nuevo Mundo bîla aisanka 100 pura bara buk nani, baha nani tilara, Rait pali Baibil ba Dia Smalkisa ki? bukka ba bâra sa. Baku sin, La Atalaya bara ¡Despertad! wauhkataya kau raya nani ba bahara sakaia sip sma. Naha ulbi sakanka nani ba Internet wina PDF apia kaka EPUB natka baku sakaia sip sa. Man want sma kaka, wahia kum kum sakaia sip sma. Bara upla kum tânka kasak ba lan takaia want ba ra yabaia. Baku sin, baha pliska ra ulbi sakanka nani CD apia kaka DVD natka bâk sakaia sip sma. Bara upla bîlas nani dukiara sin ulbi sakanka nani bâra sa. Baibil sturka nani grabar munan ba sin sakaia sip sma bara ris bri kama taim walaia.

Jehova Witniska nani wina lan takaia sip sma. Internet pliska ra Jehova Witniska nani tasba aiska ra dîa dauki ba takisa. Baku sin, lilka nani bâk marikisa Jehova Witniska nani ai warkka dauki ba nahki pâwisa bara upla nani ra hilp muni ba sin. Bahara Aidrubanka Tara nani ba ahkia bara anira daukbia ba sin takisa. Bara nahki muni Betel apiska nani wal aisaia sip ba dukiara sin.

Naha bâk tânka kasak ba plis kau laihura nani ra smalkisa bara upla nani kuntri ailal ra lan takaia sip sa, sampla baku, Antartida kuntrika ra. Wan pura suni Jehova ra makabisa “sturka yamni ba aihni pali plis plis ra wabia” (2 Tesalonaika 3:1).

• ¿Nahki muni jw.org/miq pliska bâk upla ailal tânka kasak ba lan takisa?

• ¿Baha pliska ra dîa sakaia sip sma?