Upla ailal ai priaska nani ra danh waras sa, kan bahara spirit lâka ra hilpka kumi sin sakras ba mita. ¿Dîa muni Jehova Witniska nani aidrubanka nani ra waia sa? Bahara, ¿dîa yamnika sâkma?

Upla latwankira nani bara yawan dukiara luki nani tilara lilia kaia. Patitara kristianka nani ba kangrigisan baku asla taki kan. Bahara Baibil ba stadi taki, Gâd ra mayuni kan bara pana pana ai kupia buki kan (Hibru Nani 10:24, 25). Upla latwan lâka bri nani tilara asla takaia ba ai muihni lakri nani baku, apia kaka ai pânika nani baku kaikisa (2 Tesalonaika 1:3; 3 Jan 14). Yawan sin patitara kristianka nani samplika ba nina blikisa bara lilia wan dara walisa.

Baibil smalkanka nani alki daukaia ba yamnika wankisa. Patitara piua ra dauki kan baku, waitna, mairin bara tuktan nani sin asla taki kan. Kristian waitna nani ba Baibil ba pain yus muni hilp wan munisa Jehova smalkanka nani piu bani wan rayaka ra alki daukaia (Kli Smalkanka 31:12; Nihimaya 8:8). Yawan kumi bani wan mihta buki aisaia sip sa, baku sin aiwanaia. Naha ba hilp wan munisa spirit lâka ra wan bîla kaikanka lâka bri ba dukiara aisaia (Hibru Nani 10:23).

Gâd ra kasakkam lukan lâka brisma ba kau karna takisa. Apastil Pal kangrigisan kum ra win: ‘Yang bui man nani mai kaikan ai daukisa, bara baku lika man nani kau karna taki kama; baha tânka ba lika, kasak lukan lâka yang bara man nani brisma ba ni pana pana hilp munaia’ (Roman 1:11, 12). Aidrubanka nani ra spirit lâka ra aitani pâwan kristianka nani wal asla taki ba mita, wan kasakka lukan lâka bara Baibil dîa wi ba alki daukaia dukiara hilp wan munisa.

Mai paiwisa wan aidrubanka nani ra waia bara baku naha blisinka nani brima. Yamni waram kabia. Bahara lalah makabras bara dimaia ba pri sa.

• ¿Wan aidrubanka nani ba, dîa samplika nina bliki daukisa?

• ¿Aidrubanka nani ra wama kaka, dîa yamnika brima?

Aidrubanka nani ra waia dukiara ban kra unta tara bâk wapaia sa, apia kaka lî karna auhi ba tilara wabia, sakuna wik bani aidrubanka ra wisa. Wan rayaka ra trabil bri kabia, apia kaka wark wina aula taim swapan baku wan dara walisa sakuna, ¿dîa muni Jehova Witniska nani sakripais daukisa aidrubanka nani ra ai muihni lakri aikuki kaia dukiara?

Wan yamnika dukiara sa. Apastil Pal ulban: “Pana pana wan walka nani ra hilp munaia”. Witin kangrigisan uplika nani dukiara aisi kan (Hibru Nani 10:24). Naha bîla nani ba wiaia want sa “upla wala dukiara lukaia”, wibia sa kaka, pana pana kakaira takaia. Baha mita, apastil Pal dîa aisan ba wan kupia bukisa upla wala nani dukiara lukaia. Kangrigisan ra pamali kristian nani ra kakaira takisa taim, yawan nu takisa witin nani ba trabil ailal pura luan bara wan trabilka nani baku witin nani sin brisa. Naha sut ba hilp wan munisa wan trabilka nani pura luaia.

Pâna pain nani sakisa. Aidrubanka nani ra, wan kakairika nani wal baman asla takras, wan pânika latwankira nani wal asla takisa. Piu wala nani ra witin nani wal piu luisa, sampla baku wan liliaka nani ra. ¿Naha asla takaia ba wina dîa yamnika sakisa? Witin nani wal kau pain kakaira takisa bara pana pana kau latwan kaikisa. Bara wan pânika nani ba trabil brisa piua ra, yawan hilp munisa, kan pâna lâka tara kum witin nani wal brisa (Sins Lâka 17:17). Kangrigisan ra upla sut wal kakaira takisa taim, yawan marikisa ‘upla wala nani dukiara lukisa’ (1 Korint 12:25, 26).

Mai paiwisa Gâd kupia lâka dauki uplika nani wal pâna takaia. Naha sât pânika nani ba Jehova Witniska nani tilara sakaia sip sma. Swirka diara kumi sin mai takaskbiara yawan aikuki pâna takaia.

• ¿Dîa muni wan brinka sa aidrubanka nani ra asla takaia?

• ¿Ahkia kangrigisan ra upla nani wal kakaira takaia sip sma?

Patitara kristianka nani ba aidrubanka ra aiwani kan, ai pura suni kan bara Ulbanka nani ba laki kaiki kan (1 Korint 14:26). Wan aidrubanka nani ra wama kaka, naha dauki ba kaikma.

Baibil smalkanka nani walisa. Satadi apia kaka sandi ra kangrigisan bani asla takisa, 30 minit bilara Baibil aisanka kum walaia dukiara. Naha ba tânka marikisa nahki muni Baibil ba hilp wan munisa wan rayaka ra. Baku sin, yawan kumi bani tiks nani ba silp wan Baibilka ra aisi kaikaia sip sa. Naha aisanka ningkara, La Atalaya stadika ba, awar kum bilara daukisa. Baha daukisa piua ra muihni lakri nani ba ai mihta buki aisanka nani daukaia sip sa bara kumi bani La Atalaya wauhkataya kum bri kaia sa. Naha ba hilp wan munisa nahki Baibil smalkanka nani ba wan rayaka ra alki daukaia. Sim stadika ba 110.000 pura kangrigisan, tasba aiska ra laki kaikisa.

Kau pain smalkaia dukiara hilp wan munisa. Baku sin, wik bilara aima kum asla takisa aidrubanka yumhpa laki kaikaia dukiara. Pas ba, Kangrigisan Baibil Stadika kum 30 minit bilara daukisa. Nahara wali nani ra makabi walisa bara witin nani ansika yabisa. Baha stadika ba hilp wan munisa Baibil dahra aisanka nani kau pain tânka briaia. Baha wina, Nahki Smalkaia ba Skulka ba 30 minit bilara dauki sa. Bara muihni lakri nani ba Baibil ra dîa aisi kaikan ba wina aisaia sip sa. Baha ningkara, stadi tatakra nani ba ai aisanka kunhku nani daukisa. Bara tâ bri uplika ba witin nani ra wisa nahki muni smasmalkra kum pain kaia sip sa (1 Timoti 4:13). Aidrubanka danh prakaia dukiara, Gâd Warkka Daukaia Aidrubanka ba 30 minit bilara daukisa. Nahara aisanka, marikanka, bara muihni lakri nani ra makabi walisa nahki Baibil ba yus munaia upla wala ra hilp munaia dukiara.

Aidrubanka ra wama taim, Baibil smalkanka painkira nani dauki ba kaikma (Aiseya 54:13).

• ¿Jehova Witniska nani aidrubanka ra dîa lan takma?

• ¿Wik bilara ani aidrubanka ra waia want sma ki?

Ulbi sakanka nani ra lilka painkira nani takisa bara yawan kaikisa Jehova Witniska nani ai kwalka dimra ba pain pali sa. ¿Dîa muni aidrubanka ra wan kwalka dimra pain kum briaia sa?

Gâd ra kulkanka yabisa. Rait pali Gâd upla mawan sâtka kaikras, sakuna upla ai kupia ra dîa bri ba lika kaikisa (1 Samuil 16:7). Sakuna, Gâd ra mayuni taim, wan brinka sa Witin ra bara wan muihni lakri nani ra rispik munaia. Wihta tara kum mawanra sa taim yawan want sa wan kwalka dimra pain kum briaia, kan naha uplika ra rispik munisa. Sim baku, aidrubanka nani ra “tasba aiska Wihta Tara” mawanra sa, Jehova Gâd. Baku sin aidrubanka pliska ra rispik muni ba mita wan kwalka dimra pain kum briaia sa (Blasi Sturka 18:25).

Wan daukanka pain nani ba marikisa. Baibil ba kristian nani ra kupia bukisa ai ‘kwalka dimra bara ai sinska yamni briaia’ (1 Timoti 2:9, 10). ‘Wan kwalka dimra pain’ kum briaia ba tânka sa kwala nani uba pamni apia kaka tanta dimaia apia. Baku sin, wan ‘sinska yamni briaia’ ba tânka sa kwala nani uba alala apia kaka kwala sâtka aihka nani ba dimaia apia. Baibil smalkanka ba yawan ra sanska wankisa wan kwalka pain dimaia. Ban kra uya sturi aisaras kabia, sakuna upla nani ba wibia ‘Gâd wan Pri Sasakra smalkanka ba painkira sa’, kan wan kwalka dimra ba pain kum brisa (Taitus 2:10; 1 Pita 2:12). Aidrubanka nani ra wan kwalka dimra pain kum brisa kaka, upla wala nani ra hilp munbia Jehova ra mayunaia.

Kwala pain âpu sma ba mita lukpara aidrubanka nani ra waia sip apia sma. Wan kwalka ba mana apia kaka raya kaia nit apia sa. Wan kwalka pain, klin bara upla nani pain kaiki ba kat dimaia sa.

• ¿Dîa muni Gâd ra mayuni sa taim wan kwalka dimra pain kum briaia sa?

• ¿Dîa smalkanka nani hilp wan munisa wan kwalka dimra pain kum briaia dukiara?

Jehova Witniska nani wal Baibil stadi takisma kaka, kaina manis wina dîa stadi takma ba laki kaikisma. Yamnika tara kum sakaia dukiara aidrubanka nani ra waia ridi takaia sa. Naha ba wik bani daukisa taim, yamnika manis sakisa.

Ahkia bara anira stadi takaia. ¿Ahkia man mampara kau pain sa stadi takaia? ¿Titan ra, wark ra kau waras kainara, apia kaka tihmia ra luhpiam nani yapaia wan ningkara? Piua wihka ra stadi takaia sip apia kama sin, laki kaiks piua an stadi takaia sma, bara trai muns dîa wiram ba kat daukaia. Bin âpu pliska kum ra stadi takaia trai muns, bara tilivisan, radiu, apia kaka teleponkam ba daski swis. Kau stadi takras kainara, wan pura sunaia ba hilp wan munisa wan trabilka nani dukiara lukaia apia, kau ni Baibil ra baman lukaia (Pilipai 4:6, 7).

Dîa stadi takisma ba mark muns, bara mihtam buki aisaia ridi taks. Dîa stadi takma ba laki kaiks. Sampla baku, ulbanka lalka ba, apia kaka saptika ba laki kaiks. Baku sin, ulbanka lalka ba stadika ra nahki param taki ba laki kaiks. Baha wina, lilka nani ba bara laki kaikram ba wina makabi walanka nani taki ba sin laki kaikaia sip sma. Baiki sakanka bani aisi kaiks bara makabi walanka nani ansika ba pliks. Tikska nani ulban ba aisi kaiks, bara nahki naha nani ba stadika ra tâ baiki ba ra luki kaiks (Apastil Nani Sturka 17:11). Ansika nani sâkma taim, bîla kum kum baman baiki sakanka ra taki ba mark muns. Kan naha ba hilp mai munbia ansika nani ba sinskam ra bri kaia. Aidrubanka ra kama taim, brinkam sa kaka, mihtam buki bîla prahni nani aisas.

Wik bani aidrubanka ra dîa lan takma ba kaina manis wina stadi takisma kaka, hilp mai munbia Baibil tânka ba kau pain briaia (Matiu 13:51, 52).

• Wik bani aidrubanka nani dukiara ridi takaia want sma kaka, ¿dîa daukaia sma?

• Aidrubanka ra mihtam buki aisaia want sma kaka, ¿nahki ridi takaia sip sma?

Patitara piua wina, Jehova want sa pamali nani ba aikuki taim lubia, spirit lâka ra Gâd wal pâna lâka kum briaia bara pana pana asla takaia dukiara (Kli Smalkanka 6: 6, 7). Baha mita, Jehova Witniska nani ba wik bani ai taimka sakisa aikuki Gâd ra mayunaia dukiara. Witin nani ba asla lâka ra Baibil ba laki kaikisa, bara ai nitka nani dukiara sin aisisa. Yawan yakan iwi kabia sin, Pamali Mayunra Tihmika ba pain yus munaia sip sa Baibil bâk Gâd dukiara kau lan takaia.

Gâd lamara waia piua kum sa. “Gâd lamara man nani was, bara witin lika man nani lamamra wabia.” (Jems 4:8.) Yawan Gâd ra kau pain kakaira takisa Witin ai daukanka bara patitara piua ra dîa daukan ba Baibil ra aisi kaikisa taim. Natka isi kum Pamali Mayunra Tihmika ra daukaia sip ba sika Baibil ba wan bîla baikra karna ni aisi kaikaia. Ban kra Nahki Smalkaia ba Skulka aisi kaikanka ba pamali baku laki kaikaia sip sa. Baku sin, pamali kumi bani tikska kum aisi kaikaia bara wala nani ba baha tikska nani wina dîa raya lan takan ba laki kaikisa.

Piua kum saki pamali baku kau asla kaia. Marit nani bara ai luhpia aikuki kau asla ai dara walisa, Baibil ba laki kaikisa piua ra. Naha piua ba lilia bara kupia kumi lâka ra daukaia sa. Pamali sut bahara kaia ai brinka sa. Aisa yapti ba ai luhpia nani dîa nitka bri ba kat tânka smalkaia sa. Ban kra La Atalaya bara ¡Despertad! wauhkataya nani, apia kaka internet wan pliska, jw.org laki kaikaia sa. Skul watla ra luhpa nani ba dîa trabilka nani bri ba bara nahki wapnika mangkan ba dukiara aisaia sip sa. Aidrubanka nani ra dîa lawanka nani aiwanbia ba aikuki praptis munaia sip sa. Baha wina, pamali baku plun kum ridi daukan ba piaia.

Pamali baku wan taimka Jehova ra yabi ba hilp wan munisa Gâd Bîla ba kau latwan kaikaia. Bara Gâd dîa daukisma ba blisin munbia (Lawana 1:1-3).

• ¿Dîa muni wan taimka sakaia sa pamali baku Gâd ra mayunaia dukiara?

• Aisa yapti nani Pamali Mayunra Tihmika ba, ¿nahki lilia daukaia sip sa?

¿Dîa muni naha uplika nani ba lilia banhwisa? Witin nani ba aidrubanka kum ra sa. Patitara piua ra Gâd uplika nani ra adar yaban mani bani aima yumhpa asla takaia. Yawan sin wan muihni lakri aikuki asla takaia want sa (Kli Smalkanka 16:16). Mani bani, yawan aidrubanka yumhpa brisa: Yu kumi Aidrubanka wâl sa bara Aidrubanka Kau Tara, naha ba yu yumhpa bilara daukisa. ¿Naha nani wina dîa yamnika sakisa?

Wan kristianka lâka kau karna takisa. Israel uplika nani ba liliakira Jehova ra mayuni kan “aidrubanka tara mawanra”, bara yawan sin muihni lakri aikuki liliakira Gâd ra mayunisa (Lawana 26:12; 111:1). Naha aidrubanka nani ba sanska wankisa muihni lakri nani plis wala wala wina ra kakaira takaia. Dinar piua ra yawan plun ba aidrubanka pliska ra pîsa. Naha ba hilp wan munisa witin nani wal pâna lâka ra kaia (Apastil Nani Sturka 2:42). Bahara ‘muihni lakri’ latwan lâka tara bri ba yawan kaikisa (1 Pita 2:17).

Spirit lâka ra pâwaia dukiara hilp wan munisa. Israel uplika nani ba yamnika wala sakan Gâd “tânka kasak brin bamna” (Nihimaya 8:8, 12). Yawan sin Baibil smalkanka nani aidrubanka nani ra wali ba tara kulkisa. Aidrubanka ra aisanka nani ba Baibil tikska kum ai plamaya baku brisa. Marikanka nani bara smalkanka nani ba hilp wan munisa nahki Gâd kupia lâka daukaia wan rayaka ra. Bara upla rayaka ra takan sturka nani walisa taim, wan kupia bukisa naiwa piua nani ra, kan yawan kaikisa upla wala nani ai trabilka nani pura luan. Aidrubanka Kau Tara nani ra Baibil wina pulanka nani daukisa, bara hilp wan munisa Baibil sturka nani nahki takan ba wan sinska ra luki paskaia. Baku sin, lisin ailal wan smalkisa. Aidrubanka bani ra, upla nani ai rayaka ra Gâd ra yaban ba aihtabi takisa.

• ¿Dîa muni Aidrubanka Kau Tara nani ba liliakira sa?

• Aidrubanka Kau Tara nani ra wama kaka, ¿dîa yamnika sâkma?

Jisas kau pruras kainara win: “Naha king lâka sturka yamni na tasba aiska ra smalkan kabia, kuntri sut baha ba pain kaikbia dukiara; bâra lika tnata ba aimakbia” (Matiu 24:14). Sakuna, ¿naha warkka tasba aiska ra nahki dauki kabia? Jisas naha tasba ra dîa daukan baku, naha warkka ba daukbia (Luk 8:1).

Upla watla kat smalkisa. Jisas ai disaipilka nani ra smalkan nahki utla utla ra smalkaia (Matiu 10:11-13; Apastil Nani Sturka 5:42; 20:20). Patitara kristianka nani ba anira smalkaia pliska nani blikan (Matiu 10:5, 6; 2 Korint 10:13). Naiwa piua ra sin smalkaia warkka ba asla daukan sa, bara kangrigisan bani smalkaia pliska kum brisa. Naha ba hilp wan munisa Jisas adarka ba nina blikaia: “Upla nani ra smalkaia, witnis sin aisaia” (Apastil Nani Sturka 10:42).

Upla ani ani ra kabia ba ra smalkisa. Jisas ba sampla pain kum mangkan. Upla nani bâra kan pliska nani ra smalkan, sampla baku, kabu un ra bara liwanhta nani ra sin (Mark 4:1; Jan 4:5-15). Yawan upla nani ra smalkisa ani pliska ra kabia sin, sampla baku, yabal ra, bisnis pliska ra, upla kirhbi pliska ra, apia kaka telepon bâk sin smalkisa. Baku sin, wan lama uplika nani, skul pânika nani bara wan pamalika wala nani ra sanska pain kum bâra sa kaka smalkisa. Naha sut ba sanska yaban sa upla milian milian tasba aiska ra “swaki sakan lâka” sturka nani ba walaia sip sa (Lawana 96:2).

Upla kum naha sturka nani walaia want ba dukiara luki kaiks. Witin ra sip sma wiaia naha sturka nani ba hilp munaia sip sa. ¡Upla wala nani ra dîa lan takisma ba dukiara aisas!

• ¿Dîa sât ‘sturka yamni’ smalkaia sa?

• ¿Nahki Jehova Witniska nani Jisas samplika nina blikisa smalkisa piua ra?

Tâura smasmalkra kum ba sika kristian nani ba smalkaia pliska raya nani ra smalkisa bara spirit lâka ra yabal raya kum baku paskisa, upla wala nani bâk wapbia dukiara. Jisas ba tâura smasmalkra kum baku kan. Witin naha tasba ra balan upla ra smalki swaki sakan lâka yabaia dukiara (Matiu 20:28). Naiwa piua ra, Jisas disaipilka nani ba witin samplika nina blikisa bara awar ailal smalki ‘disaipil nani daukisa’ (Matiu 28:19, 20). Kristian manis tâura smasmalkra warkka ba daukisa.

Tâura smasmalkra ba piu aiska smalkisa. Jehova Witniska nani sut ba sturi yamni ba smalkisa. Sakuna, kum kum ai rayaka ba laki kaikan sa tâura smasmalkra taki kati bani 70 awar smalkaia dukiara. Naha daukaia dukiara, witin nani ba kampani warkka ba piu aiska ba daukras. Kristian wala nani piu aiska smasmalkra baku takisa, bara ani pliska ra kau smalkaia nit ba ra wisa. Witin nani kati bani 130 awar apia kaka kau daukaia sip sa. Ai rayaka ra diara manakira nani briras, bara kasak lukisa Jehova mita dîa ai nitka ba yabia (Matiu 6:31-33; 1 Timoti 6:6-8). Kristian nani piu aiska smalkaia sip apia nani ba tâ baiki smasmalkra baku takisa. Witin nani ba kati bani 30 apia kaka 50 awar smalkisa.

Tâura smasmalkra nani ba Gâd ra latwan kaikisa bara upla ra sin. Jisas upla ra kaikan baku yawan sin kaikisa nahki upla manis Gâd tânka kasak bara dîa daukbia dukiara lan takaia nit sa (Mark 6:34). Sakuna yawan ba tânka kasak ba nu ba mita witin nani ra hilp munaia sip sa bara bîla kaikanka lâka ba sin yabisa. Wan walka ra latwan kaiki ba mita, wan taimka bara wan karnika ba sin yus munisa spirit lâka ra hilp munaia (Matiu 22:39; 1 Tesalonaika 2:8). Naha dauki ba mita, upla nani kasakka lukan lâka kau tara takisa, Gâd lamara wisa, bara kau lilia ai dara walisa (Apastil Nani Sturka 20:35).

• ¿Tâura smasmalkra kum ba dîa tânka sa?

• ¿Dîa muni tâura smasmalkra nani piu aiska smalkisa?

Jehova Witniska nani tila ra spirit lâka skulka nani ba ai warkka nani natka kum sa. Bara piu aiska smalkaia warkka dauki nani dukiara, skulka nani ridi daukan sa. Baku witin nani ai warkka ba pain pali daukbia dukiara sa (2 Timoti 4:5).

Tâura Smasmalkra nani Skulka. Taura smasmalkra kum, ai warkka mani kum alkisa taim, skulka kum 6 yua ra dauki ba paiwisa, bara naha ba Aidrubanka Watla kau lamara ba ra daukisa. Naha skulka ba taura smasmalkra nani ra hilp munisa kau Jehova lamara kaia, smalkaia warkka ra kau lankira kabia bara ban naha warkka dauki kabia dukiara hilp munisa.

King Lâka Sturka Smalki nani Skulka. Naha skulka ba kati wâl bîla ra daukisa, bara taura smasmalkra lankira nani ra ridi daukisa. Baku sin, ai watla swih smalki tataukra nit pliska kum ra smalkaia wilin ba dukiara sa. Witin nani wisa “Yang nâra sni, yang ai bliks”. Baku witin nani smalki tataukra kau tara tasba ra balan, Jisas, tnata lukisa (Aiseya 6:8; Jan 7:29). Plis laihura nani ra waia bara iwaia lan takaia ba wan rayaka kum kau isi ra iwaia tânka sa. Ban kra uplika nani ba ai iwanka natka, dîa pata pî ba bara pliska ba sât wala sa. Ban kra, bîla aisanka raya kum lan takaia sa. Naha skulka ra mairin bara waitna mayas, baku sin, marit nani manka 23 wina 65 bri nani ra lan daukisa kristian daukanka pain nani briaia, bara witin nani sip kabia yus munaia baha pliska nani ra kabia taim. Baku naha nani ra Jehova asla takanka ba kau yus munaia sip kabia.

Misan Uplika nani Skulka. Hibru bîla ra, “Galaad” wiaia want sa “witnis aisanka manis”. Mani 1943 wina upla 8.000 pura misan skulka diman sa, bara “tasba aiska” ra misan uplika baku witnis aisaia blikan sa. Witin nani wark pain kum daukan (Apastil Nani Sturka 13:47). Sampla baku, misan uplika nani Perú kuntrika ra wan taim, bahara kangrigisan kumi sin âpu kan. Naiwa piua ra 1.000 pura kangrigisan bâra sa. Baku sin, Japan kuntrika ra wan taim, Jehova Witniska 10 baku bâra kan; nanara 200.000 pura bâra sa. Galaad skulka ba kati matsip bilka ra daukisa bara Baibil smalkanka tihu nani ba laki kaikisa. Misan uplika nani plis kum ra smalki bara Galaad ra kau waras ba, betel uplika, piu aiska smasmalkra nani apia kaka impaki pura kakaira nani tila ra sa kaka, sip sa naha skulka ra paiwan kaia bara smalkanka manis briaia. Baku witin nani hilp munaia sip sa tasba aiska ra smalkaia warkka ba karna daukaia bara bapi briaia.

• ¿Tâura Smasmalkra nani Skulka ba ani lukanka wal daukisa?

• ¿King Lâka Sturka Smalki nani Skulka ba ya nani dukiara sa?