-
¿Gâd Kingka Lâka ba dîa sa ki?¡Man lilia bas ban kaia ra! Baibil dîa wi ba kaiks
-
-
SMALKANKA 31
¿Gâd Kingka Lâka ba dîa sa ki?
Baibil ra smalkanka kau tara ba Gâd Kingka Lâka sa. Baha Kingka Lâka bâk Jehova naha Tasba ra ai kupia lâka daukbia pas piua ra bri kan baku. ¿Gâd Kingka Lâka ba dîa sa ki? ¿Yawan nahki nu sa baha Kingka Lâka pat aimaki ba? ¿Naiwa piua ba kat dîa yamni daukan sa? ¿Bara naika piua ra dîa daukbia? Naha makabi walanka nani ba naha smalkanka ra laki kaiki kabia bara smalkanka wala nani ra sin.
1.¿Gâd Kingka Lâka ba dîa sa, bara ya mita king aimakbia?
Gâd Kingka Lâka ba gabamint kum sa Jehova mita bapi mangkan ba. Baha Kingka Lâka aimakbia Kingka ba Jisas sika, bara witin heven wina king aimakbia (Matiu 4:17; Jan 18:36). Baibil wisa Jisas ba King sa “ban kaia ra aimaki kabia” ba (Luk 1:32, 33). Jisas ba Gâd Kingka Lâka ba Kingka sa, baha mita witin ba Tasba ra iwi uplika nani sut purara king aimakbia.
2.¿Ya nani Jisas wal king aimakbia ki?
Jisas ba yakan king aimakbia apia. Witin wal upla “taya sâtka bani wina, bîla sât aisi ba wina, nisan sâtka bani wina sin [...] witin nani tasba ra karnika alki bri” kabia (Param Marikan 5:9, 10). ¿Jisas wal upla an king aimakbia? Jisas ba Tasba ra balan piua ba wina upla milian milian witin nina blablikra takan sa. Sakuna upla 144.000 baman Jisas wal king aimakbia heven ra (Param Marikan 14:1-4 aisi kaikma). Kristian wala nani ba baha Kingka Lâka uplika kabia naha Tasba ra (Lawana Nani 37:29).
3.¿Nahki tnatka ra Gâd Kingka Lâka ba kau yamni sa Tasba gabamintka nani ba wal?
Gabamint tâ uplika nani ba diara pain daukaia want kabia sin, karnika âpu sa dîa dîa luki ba alki daukaia dukiara. Bara piua kum kum luisa taim, ban kra tâ upla wala aula ba, upla nani ra hilp munaia uya lukras. Sakuna Gâd Kingka Lâka Kingka ba, Jisas, ban kabia bara witin watlika ra king wala aimakbia apia. Heven “Gâdka ba King Lâka kum bukbia bara ban kaia ra sauhki tikan kabia apia” (Daniel 2:44). Jisas ba Tasba aiska purkara king aimakbia, bara upla nani sut ra sim baku prais yamni kulki kabia. Witin latwankira sa, kupia pain brisa, diara sut kasak lâka ba kat daukisa, bara upla nani ra sim lâka painkira nani smalkbia: latwankira, kupia pain, bara kasakka lâka ba (Aiseya 11:9 aisi kaikma).
KAU LAN TAKS
Kaisa laki kaikaia dîa muni Gâd Kingka Lâka ba kau yamni sa Tasba gabamintka nani wal.
4. Tasba aiska purkara King Lâka karnakira kum aimaki kabia
Patitara piua wina naiwa kat tâ upla nani ba Jisas karnika tara bri ba baku kumi sin âpu sa. Matiu 28:18 aisi kaikma, bara naha dukiara aisi banhma:
Jisas king aimakaia karnika ba, ¿nahki sât wala sa naha Tasba gabamintka karnika nani ba wal?
Tasba gabamintka lâka nani ba piua bani chens takisa, bara ai karnika ba Tasba pîska kumi ra baman briaia sip sa. ¿Gâd Kingka Lâka ba nahki sa? Daniel 7:14 aisi kaikma, bara naha dukiara aisi banhma:
¿Dîa muni yamni pali sa Gâd “Kingka Lâka ba sauhki tikan kabia apia”?
¿Dîa muni yamni pali sa Gâd Kingka Lâka ba Tasba aiska ra aimakbia?
5. Tasba gabamintka nani sut ba chens munan kabia
¿Dîa muni Gâd ba naha Tasba gabamintka nani chens munaia nit sa? LILKA ba kaikma, bara naha dukiara aisi banhma:
¿Tasba gabamintka nani ba nahki ai karnika yus munan sa?
Smasmalkra 8:9 aisi kaikma, bara naha dukiara aisi banhma:
Man dîa lukisma, ¿gabamint nani watlika ra Gâd Kingka Lâka ba aimakaia sa ki? ¿Dîa muni?
6. Gâd Kingka Lâka ra tâ bri nani ba wan tânka brisa
Wan Kingka, Jisas ba, upla baku Tasba ra iwan na ra, “wan swapnika nani bri ba dukiara umpira wan kaikaia sip sa” (Hibru Nani 4:15). Jehova bui upla 144.000 nani wahbi sakan, witin nani ba waitna bara mairin kasakkira sa bara Jisas wal king aimakbia, “taya sâtka bani wina, bîla sât aisi ba wina, nisan sâtka bani wina sin” sakan sa (Param Marikan 5:9).
Jisas bara witin aikuki king aimakbia nani ba ai tânka brisa upla nani nahki iwi ba, ¿baha dukiara luki man nahki damra walisma? ¿Dîa muni?
Jehova bui upla iwanka tnatka bara piua sât sât wina wahbi sakan Jisas wal king aimakaia
7. Heven wina king aimakbia lâka nani ba kau yamni sa Tasba gabamintka lâka nani ba wal
Tasba gabamintka nani ba lâ sât sât paskisa tawan uplika nani ra hilp muni bara kan kahbaia dukiara. Heven wina king aimakbia nani ba sin lâ nani paskisa, bara ai uplika nani ba baha lâka nani rispik munaia sa. 1 Korint 6:9-11 aisi kaikma, bara naha dukiara aisi banhma:
¿Upla nani ba Gâd lâka nani bîla walbia taim wan rayaka ba nahki kabia lukisma?a
¿Man lukisma Jehova ai raitka brisa King Lâka mununhtara iwbia uplika nani ba witin lâka bîla walbia? ¿Dîa muni baku lukisma?
¿Yawan nahki nu sa Gâd bîla walras uplika nani ba ai rayaka chens munaia sip sa? (bors 11 ba kaiks).
Tasba gabamintka nani ba lâ sât sât paskisa tawan uplika nani ra yamni munaia dukiara. Sakuna heven ra king aimakbia nani ba lâ kau yamni nani brisa, bara baku ai uplika nani ra kan kahbi yamni munisa
UPLA KUM KUM NAKU LUKISA: “¿Gâd Kingka Lâka ba dîa sa ki?”.
¿Man dîa lukisma?
DÎA LAN TAKRAM
Gâd Kingka Lâka ba gabamint kum sa heven ra bâra ba, Tasba aiska purkara king aimakbia.
Wan kupia krawaia
¿Ya nani Gâd Kingka Lâka ra tâ bribia?
¿Gâd Kingka Lâka ba nahki kau yamni sa upla gabamintka ba wal?
¿King Lâka mununhtara iwbia uplika nani ra Jehova bui dîa makabisa?
KAU PLIKI KAIKS
Aisi kaiks Jisas ba dîa smalkan ai Kingka Lâka ba anira kaia kan.
“¿Gâd Kingka Lâka ba upla kupia ra sa ki?” (jw.org ra kaiks)
¿Dîa muni Jehova witniska nani ba Gâd Kingka Lâka ba kau bîla walisa, upla gabamintka nani ba wal?
Laki kaiks Baibil dîa smalkisa upla 144.000 Jehova bui wahbi sakan ba Jisas wal king aimakaia dukiara.
¿Mairin kum silak ra kan ba nahki ai tânka brin Gâd baman sip sa tasba trabilka nani ba wapni mangkaia?
“Yang lan takri trabil sut ba kasak lâka ba kat wapni mangkbia” (¡Despertad!, noviembre 2011)
-
-
¡Gâd Kingka Lâka ba pat aimakan sa!¡Man lilia bas ban kaia ra! Baibil dîa wi ba kaiks
-
-
SMALKANKA 32
¡Gâd Kingka Lâka ba pat aimakan sa!
Gâd Kingka Lâka ba mani 1914 ba wina heven ra aimakisa. Baha manka ra sin upla nani tasba na tâ briaia las piua ba tâ krikan. ¿Yawan baha nahki nu sa? Yawan laki kaikbia Baibil dîa dahra aisan, baku sin mani 1914 wina Tasba aiska ra dîa takan bara upla daukanka nani sin.
1. ¿Baibil prapitka nani ba dîa dahra aisan?
Prapit Daniel ba “7 mani” piua kum ba dukiara dahra aisan, baha piua ningkara Gâd Kingka Lâka ba aimakan kabia win (Daniel 4:16, 17). Piua ailal luan ningkara, baha piua dukiara Jisas win “piua mangkan ba tnata alkbia” bara tânka marikan baha piua ba kau danh takras kan ba (Luk 21:24). Yawan laki kaikbia nahki baha piua 7 nani ba mani 1914 ra aimakan.
2. ¿Mani 1914 ba wina Tasba ra dîa takisa bara upla daukanka nani ba nahki sa?
Jisas disaipilka nani ba witin ra makabi walan: “¿Man balaia sma ba bara tasba tnata sainka ba sin ani kabia ki?” (Matiu 24:3). Baha dukiara Jisas dahra aisan nahki sain sât sât taki kaia kan, witin king aimakbia ningkara. Baha sainka tilara war, plun wahwan bara tasba nikbanka nani takbia win (Matiu 24:7 aisi kaikma). Baku sin Baibil prapitka nani ba dahra aisan upla daukanka tnatka ba “tnata yua nani ra” trabil saura nani buki kabia (2 Timoti 3:1-5). Mani 1914 ba wina baha trabilka nani ba kau klir kaikisa.
3. ¿Dîa muni Gâd Kingka Lâka aimakan piua ba wina diara nani ba kau saura takan?
Jisas ba Gâd Kingka Lâka ra king aimakan taim heven ra war kum takan, Jisas ba Sitan bara ai lasika nani mapara aiklaban. Sitan lus tiwan, baha dukiara Baibil wisa “witin ai insalka nani kira tasba ra lulkan” (Param Marikan 12:9, 10, 12). Sitan ba ai kupia karna baiwisa, kan nu sa witin ra sauhki tikbia ba. Baha mita, panis bara pât wahwanka ba witin paskisa Tasba aiska ra. Baku bamna wan tânka brisa dîa muni diara sut ba uba saura sa. Ban sakuna, Gâd Kingka Lâka ba trabil nani sut ba âpu daukbia.
KAU LAN TAKS
Kaisa laki kaikaia yawan nahki nu sa Gâd Kingka Lâka ba mani 1914 ba wina aimakisa, bara baha dukiara yawan dîa wan tânka briaia sa.
4. Baibil prapitka nani ba mani 1914 ba dukiara piua ba kulki
Patitara piua ra Babilon kingka kum nina Nabucodonosor mâki ba ra Gâd bui yaprisauhkanka kum kaikbia yaban, baha yaprisauhkanka ra Gâd marikan naika piua ra dîa takaia kan ba. Daniel mita yaprisauhkanka tânka ba Nabucodonosor kingka lâka ba wal prakan, bara Gâd Kingka Lâka ba wal sin (Daniel 4:17 aisi kaikma).a
Daniel 4:20-26 aisi kaikma, bara ningkara lilka tânka mariki ba yus muns makabi walanka nani tânka pliki kaikaia dukiara:
(A) ¿Nabucodonosor ba yaprisauhkanka ra dîa kaikan? (bors 20 bara 21 ba kaiks).
(B) ¿Dusa yari tara ba ra dîa takaia kan? (bors 23 ba kaiks).
(C) ¿“Mani 7” las ba ra dîa takaia kan? (bors 26 ba kaiks).
Dusa yari tara ba Gâd Kingka Lâka ba wal asla sa
PRAPIT DAHRA AISANKA BA (Daniel 4:20-36)
King aimakaia
(A) Dus yari tara kum
King lâka ba alki takaskan
(B) “Dusa ba tasba ra bataks” bara “mani 7” swika lubia
Kli king aimakisa
(C) “King lâka ba kli man ra maikan kabia”
Prapit dahra aisanka ra pas tânka aimakan taim . . .
(D) ¿Dusa yari tara tânka ba ya wal praki kaikisa? (bors 22 ba kaiks).
(E) ¿Ahkia king lâka ba alki takaskan? (Daniel 4:29-33 aisi kaikma).
(F) ¿“Mani 7” las ba ra Nabucodonosor ra dîa takan? (Daniel 4:34-36 aisi kaikma).
PRAPIT DAHRA AISANKA BA PAS TÂURA NAHKI AIMAKAN
King aimakaia
(D) Nabucodonosor, Babilon kingka ba
King lâka ba alki takaskan
(E) Mani 606 ningkara y.p.n., Nabucodonosor ba sinskas takan bara mani 7 param pali ai kingka lâka ba sip tâ briras
King lâka ba kli brisa
(F) Nabucodonosor sinska ba pain takisa bara kli king aimakisa
Prapit dahra aisanka ra tânka wala ba aimakan taim . . .
(G) ¿Dusa yari tara tânka ba ya nani wal praki kaikisa? (1 Kronikas 29:23 aisi kaikma).
(H) ¿Ahkia witin nani kingka lâka ba alki takaskan? ¿Yawan nahki nu sa Jisas Tasba ra kan taim baha uplika nani ba king apia kan ba? (Luk 21:24 aisi kaikma).
(I) ¿Ahkia baha kingka lâka ba kli aimakan?
PRAPIT DAHRA AISANKA TÂNKA WALA BA NAHKI AIMAKAN
King aimakaia
(G) Israel kingka nani ba Gâd Kingka Lâka ra aimaki kan ba
King lâka ba alki takaskan
(H) Jerusalem ra sauhki tikan bara king lâka ba 2.520 mani nani bilkara alki takaskisa
King lâka ba kli brisa
(I) Gâd Kingka Lâka ra Jisas ba king aimakisa
¿Mani 7 piua wihka ba nahki kulki sakisa?
Baibil ulbanka ra pîska kum kum ba pîs wala tânka briaia hilp wan munisa. Naha luki kaiks, Param Marikan bukka ba wan wisa piua yumhpa pura bakriki ba 1.260 yu nani tânka sa (Param Marikan 12:6, 14). Piua yumhpa pura bakriki ba dubil kulkisa taim, 7 piua nani takisa, apia kaka 2.520 yu nani. Baibil ulbanka ra yu dukiara aisisa taim mani kum baku kulkisa (Isikiel 4:6). Baku bamna, Daniel bukka ra 7 piua nani dukiara aisi ba: 2.520 mani nani tânka sa.
5. Tasba ba mani 1914 wina sât wala takan
Jisas ba kaina manis aisan witin King aimakaia tâ krikbia ningkara tasba nahki kabia ba. Luk 21:9-11 aisi kaikma, bara naha dukiara aisi banhma:
Baha tikska ra trabil nani aisi tila wina, ¿man ani ba kaikisma, apia kaka sturka walisma?
Apastil Pal ba tânka marikan nahki upla daukanka ba taki kabia, upla nani tasba na tâ briaia las piua ra. 2 Timoti 3:1-5 aisi kaikma, bara naha dukiara aisi banhma:
¿Upla daukanka nani naha tikska ra taki ba man pat kaikram ki?
6. Gâd Kingka Lâka ba pat aimakan sa, baku bamna yawan diara kum kum daukaia sa
Matiu 24:3, 14 aisi kaikma, bara naha dukiara aisi banhma:
¿Ani warkka tara wan marikisa Gâd Kingka Lâka ba pat aimakisa?
¿Man sin nahki sip sma baha warkka daukaia?
Gâd Kingka Lâka ba pat aimakisa, bara tisku piua ra Tasba aiska ba ai karnika ra bribia. Hibru Nani 10:24, 25 aisi kaikma, bara naha dukiara aisi banhma:
“Dawan yua ba pat baila” bamna, ¿yawan kumi bani dîa daukaia sa?
Upla wala rayaka ba nahki swaki sakaia dukiara man lan takisma kaka, ¿dîa daukma?
UPLA KUM KUM MAKABI WALISA: “¿Dîa muni Jehova witniska nani ba mani 1914 ba dukiara uba smalkisa?”.
¿Bara man dîa wima?
DÎA LAN TAKRAM
Prapit dahra aisanka nani ba, Baibil lâka kat piua nani kulki sakaia ba, bara Tasba ra dîa taki ba wan marikisa Gâd Kingka Lâka ba pat aimakisa naiwa piua ra. Yawan baha kasak lukisa, baha mita Kingka Lâka sturka yamni nani ba yawan smalkisa, baku sin kangrigisan aidrubanka nani ra dimisa.
Wan kupia krawaia
Piua 7 nani prapit Daniel dahra aisan ba danh takan taim, ¿dîa pali takan?
¿Dîa muni man kasak lukisma Gâd Kingka Lâka ba mani 1914 ba wina aimakisa?
¿Man nahki kasak luki marikaia sip sma Gâd Kingka Lâka ba pat aimakisa?
KAU PLIKI KAIKS
Piu luan sturka tânka pliki kakaira nani ba mani 1914 ba dukiara dîa ulban aisi kaiks nahki Tasba sât wala takan baha manka wina.
“Ahkia piua wina upla daukanka ba saura takan” (¡Despertad!, abril 2007)
Aisi kaiks nahki Matiu 24:14 ra prapit dahra aisanka ba waitna kum rayaka ba chens munan.
“Béisbol pulanka ba tara kulki kapri” (La Atalaya núm. 3, 2017)
¿Yawan nahki nu sa Daniel sapta 4 dahra aisanka ba Gâd Kingka Lâka ba dukiara aisisa?
“¿Ahkia piua ba wina Gâd Kingka Lâka ba aimakisa? (Pas pîska)” (La Atalaya octubre 1, 2014)
¿Yawan nahki nu sa “7 mani” piua ba Daniel sapta 4 aisi ba mani 1914 ra danh takan?
“¿Ahkia piua ba wina Gâd Kingka Lâka ba aimakisa? (Pîska wala)” (La Atalaya noviembre 1, 2014)
a Las ulbi sakanka wâl ba “Kau pliki kaiks” pîska ra taki ba aisi kaikma naha smalkanka ra.
-
-
¿Gâd Kingka Lâka ba dîa daukbia?¡Man lilia bas ban kaia ra! Baibil dîa wi ba kaiks
-
-
SMALKANKA 33
¿Gâd Kingka Lâka ba dîa daukbia?
Gâd Kingka Lâka ba pat aimakisa. Tisku piua ra diara tara Tasba ra chens munan kabia. Kaisa laki kaikaia dîa dukia yamni nani daukbia Gâd Kingka Lâka ba, bara man baha sut ba liliakira bîla kaiki kama.
1. ¿Gâd Kingka Lâka ba nahki kupia kumi bara kasakka lâka kli mangkbia Tasba ra?
Gâd Kingka Lâka ra Jisas ba tâ brisa, bara tisku piua ra Armagedan war aiklabanka ba ra, upla saurakira nani sut ra sauhki tikbia bara Tasba gabamintka nani ra sin (Param Marikan 16:14, 16). Baha piua ra, naha Baibil pramiska na aimaki kabia: “Kau piua wiria man, bara watawi ba âpu kabia” (Lawana Nani 37:10). Gâd Kingka Lâka bâk, Jisas ba Tasba ra kupia kumi lâka bri balbia bara kasakka lâka ba sin (Aiseya 11:4 aisi kaikma).
2. Gâd kupia lâka ba naha Tasba ra daukbia taim, ¿upla rayaka ba nahki kabia?
Diara sut ba Gâd Kingka Lâka karnika mununhtara kabia taim, “kasakkira nani ba lika tasbaya ba bri iwbia, ban kaia ra sin baha tasbaya ra iwi kabia” (Lawana Nani 37:29). ¡Luki kaiks man nahki lilia iwma! Upla kasakkira nani tilara kama, upla nani sut Jehova ra bara pana pana sin latwan kaiki kabia. Upla kumi sin siknis takbia apia, bara upla nani sut ban kaia ra iwi kabia.
3. Saurakira nani ra sauhki tikbia ningkara, ¿Gad Kingka Lâka ba dîa daukbia?
Saurakira nani ra sauhki tikbia ningkara, Jisas ba mani 1.000 king aimaki kabia. Baha piua ra, upla 144.000 Jisas wal king aimakbia ba upla nani ra hilp munbia diara sut mapara kasakkira kaia, bara saurka lâka wina pri takbia aiska pali. Mani 1.000 piua ba danh takbia taim, Tasba ba paradais painkira kum kabia, Jehova lâka bîla wali uplika nani ba liliakira bâra kabia. Ningkara, Jisas bui King Lâka ba kli ai Aisika Jehova ra laki yabia. Baha piua kat lika Gâd kupia lâka ba “tasba ra daukan kabia” (Matiu 6:9, 10). Klir pali kabia Jehova ba king kasak pain sa bara ai uplika nani ra main kaikisa. Ningkara, Jehova bui Sitan ra âpu daukbia, lasa nani ra sin, bara ani uplika ai Kingka Lâka mapara bui ba sin (Param Marikan 20:7-10). Gâd Kingka Lâka ba diara kasak nani daukbia ba ban kaia ra bâra kabia.
KAU LAN TAKS
Kaiks dîa muni yawan kasak lukisa Baibil pramiska nani ba Gâd Kingka Lâka bâk aimaki kabia.
4. Gâd Kingka Lâka mita upla gabamintka nani ba âpu daukbia
Tasba ra, “upla ba nahki karnika bri ba, ai walka ra saura” muni ba yawan kaikisa (Smasmalkra 8:9). Baku upla mita saura dauki ba, Gâd Kingka Lâka ba wapni mangkbia.
Daniel 2:44 bara 2 Tesalonaika 1:6-8 aisi kaikma, bara naha dukiara aisi banhma:
Tasba gabamintka nani mapara bara witin nani ra tâ baiki nani ba sin, ¿Jehova Jisas wal dîa daukbia?
Jehova bara Jisas dukiara pat lan takram bamna, ¿dîa muni kasak lukisma witin nani ba diara sut ba lâ kat bara wapni kat daukbia?
5. Jisas ba King kau yamni sa
Jisas ba Tasba uplika nani ra tnatka ailal ra hilp muni kabia. LILKA ba kaikma bara baku nu takma Jisas ba pat marikan sa nahki witin brin daukisa upla ra hilp munaia, bara Gâd bui karnika yaban ba.
Jisas Tasba ra kan taim, diara nani daukan ba marikan Gâd Kingka Lâka ba dîa daukbia. ¿Naha blisinka nani nâra taki ba tilara, ani sa man kau kaikan mai dauki ba? Tiks nani sut aisi kaiki banhma kan hilp wan munisa kau lan takaia baha blisinka nani ba dukiara.
JISAS TASBA RA KAN TAIM . . .
HEVEN WINA JISAS BA . . .
pâsa ba lamni daukan (Mark 4:36-41).
lî, pâsa, dus bara daiwan nani ra pât wina pri sâkbia (Aiseya 35:1, 2).
sain pranakira dauki upla tausin ailal ra plun dakakan (Matiu 14:17-21).
plun wahwanka lâka ba âpu daukbia (Lawana Nani 72:16).
upla ailal sikniska ba rakan (Luk 18:35-43).
upla nani sut ra siknis wina rakbia (Aiseya 33:24).
upla pruan kum kum ra raiti wina bukan (Luk 8:49-55).
prura pâtka ba wina upla sut ra pri sâkbia (Param Marikan 21:3, 4).
6. Gâd Kingka Lâka ba mita naika piua ba pranakira kabia
Jehova patitara piua ra upla dukiara dîa want kan ba Gâd Kingka Lâka bâk daukbia, Tasba paradais takbia ba ra ban kaia ra iwbia. LILKA ba kaikma bara nu takma nahki Jehova Jisas ra karnika yabisa ai kupia lâka daukaia dukiara.
Lawana Nani 145:16 aisi kaikma, bara naha dukiara aisi banhma:
Jehova bui upla “rayaka bri nani ba sut âuyapah” yabia ba dukiara, ¿man nahki damra walisma?
UPLA KUM KUM NAKU LUKISA: “Upla nani sut asla takbia kaka, sip kabia wan trabilka nani wapni mangkaia Tasba aiska ra”.
¿Ani trabilka nani upla gabamintka nani sip wapni mangkras ba Gâd Kingka Lâka ba lika wapni mangkbia?
DÎA LAN TAKRAM
Gâd Kingka Lâka ba dîa daukaia want ba daukbia. Tasba aiska ba paradais kum kabia, bara upla pain nani baman bâra kabia ban kaia ra Jehova ra mayuni kabia.
Wan kupia krawaia
¿Nahki Gâd Kingka Lâka ba Jehova nina ba holikira daukbia?
¿Yawan nahki nu sa Baibil pramiska nani ba Gâd Kingka Lâka bâk rait takbia?
Gâd Kingka Lâka ba diara yamni nani daukbia ba tilara, ¿man ba ani kau kaikan mai daukisa?
KAU PLIKI KAIKS
Armagedan tânka ba dukiara kau lan taks.
Laki kaiks Jisas aisan “pât wahwanka yua” ra dîa takbia ba. (Matiu 24:21).
Kaiks pamali kum ba asla lukisa nahki lilia kabia paradais ra.
Upla rayaka sturka na kaiks “Diara ailal nu takaia want kapri”, lan taks nahki pulitik uplika kum ba tânka kum pliki kan ba sakan.
“Baibil ba upla rayaka chens munisa” (La Atalaya enero 1, 2012)
-