¿Gâd ba tala ba dukiara dîa lukisa?

Tala ba tânka tara brisa. Wan wîna ra tala âpu kaka yawan pruaia sip sa. Gâd wan paskan bamna ai raitka brisa wan wiaia nahki tala ba yus munaia sip sa sapa. ¿Gâd dîa win sa tala ba dukiara? ¿Tala ba yawan sip sa plun baku piaia, apia kaka wan wîna tara ra dingkaia? ¿Bara tala tânka ba dukiara dîa hilp mai munbia diara pain daukaia?

1. ¿Gâd ba tala ba dukiara dîa lukisa?

Patitara piua ra, Jehova ai uplika nani ra win: “Tala ba sika baha nani sut ba rayaka yabisa” (Libait Lâka 17:14). Jehova mapara tala ba rayaka tânka sa. Bara rayaka ba Gâd wina prisant kum sa, holi sa, baha mita tala ba sin holikira sa.

2. ¿Tala yus munaia dukiara Gâd ba dîa lukisa?

Pas kristian kangrigisanka ba kau aipaswi takras kainara, Jehova ai uplika nani ra adar yaban tala ba piaia apia (Blasi Sturka 9:4 bara Libait Lâka 17:10 aisi kaikma). Bara pas kangrigisan bapi mangkan taim Jehova kli naha adarka na yaban. Tâ bri daknika ba kristian nani ra win diara kum kum diaia apia bara piaia apia, “tâlia ba sin apia” (Sturka Nani 15:28, 29 aisi kaikma).

¿Dîa tânka sa ki tala yus munaia apia? Ban kra daktar kum mai wisa rum ba yus munma apia, sakuna man rum dima kaka, ¿pain kabia lukisma? ¿Bara plun rum wal piakan ba pima ki?, apia kaka ¿rum ba wînam tara wakia ra indeksan sabi dingkma ki? Apia pali. Sim baku, tala ba yus munaia apia Gâd adar yaban ba tânka sa yawan tala ba diaia apia, bara daiwan langki ikan wîna ba sin piaia apia sa. Baku sin, plun tala wal piakan ba yawan piaia apia sa.

¿Daktar nani tala yus muni ba dukiara yawan dîa lukisa? Daktar nani ba tala yus muni tnatka kum kum ba Gâd lâka nani ba krikisa. Naha baku: upla wîna wakia ra tala aihwa dingkisa, apia kaka tala pîska nani ba glóbulos rojos, glóbulos blancos, plaquetas bara plasma sin dingkisa. Sakuna tnatka kum kum daktar nani tala yus muni ba Gâd lâka nani kriki sapa klir pali apia sa. Tnatka kum ra tala pîska nani wina diara kau sirpi nani saki yus munisa. Tnatka wala ra, daktar nani ba upla silp tâlia ba yus muni hilp sâtka kum paskisa. Tala ba tnatka sât sât ra yus muni ba pain laki kaikaia sa, bara upla bani silp lukaia sa dîa alki daukbiaa (Galesha 6:5).

KAU LAN TAKS

3. Diara daukma ba Jehova luki ba kat kaia sa

Tala ba dukiara Gâd luki ba kat, ¿man nahki sip sma sim sât lukaia? LILKA ba kaikma, ningkara pana pana aisi banhs nahki sip sa naha hilpka nani alki briaia:

LILKA: ¿Tala yus munaia ba dukiara dîa ba pain laki kaikaia sa? (5:47)

• Gâd ra puram suns sins lâka maikbia (Jems 1:5).

• Baibil ba tala ba dukiara dîa smalki ba pliki sâks, bara nahki alki daukaia ba sin (Sins Lâka 13:16).

• Iwisma pliska ra siknis wina rawaia dukiara nahki tnatka ra tala ba yus muni ba tânka pliki sâks.

• Tala yus munaia tnatka nani tila wina, ani ba man sip briras sma ba nu bas.

• Man dîa daukma ba wal kupiam dara walra ba âuyapah bribia (Sturka Nani 24:16).b

• Nahki tala yus munma ba man silp lukaia sma, upla wala mai wiaia apia sa, man maritkam ba, kangrigisan almukka kum, bara Baibil stadika maiki uplika ba sin apia (Roman 14:12).

• Man dîa want sma ba kat wauhtaya kum ra ulbi swis upla wala nani nu takbia dukiara.

4. Jehova witniska nani ba tnatka kau pain ba plikisa siknis wina rawaia dukiara

Tala ba nahki yus munaia Gâd adar yabi ba yawan bîla walisa, sakuna sim taimka ra ani tnatka kau pain ba plikisa siknis wina rawaia dukiara. LILKA ba kaikma.

LILKA: Profesor Massimo Franchi ra makabi walisa (1:36)

Taitus 3:2 aisi kaikma, bara naha dukiara aisi banhma:

• Daktar nani wal yawan turi aisisa taim, ¿dîa muni rispik bara laman lâka wal aisaia sa?

Alki briaia apia sa	Kristian bani silp luki daukaia sa
A. Plasma sanguíneo	Plasma pîska wina kau sirpika nani
B. Glóbulos blancos	Glóbulos blancos pîska wina kau sirpika nani
C. Plaquetas	Plaquetas pîska wina kau sirpika nani
D. Glóbulos rojos	Glóbulos rojos pîska wina kau sirpika nani

5. Tala pîska nani wina diara kau sirpi nani ba

Tala aihwa ba pîs walhwal brisa: glóbulos rojos, glóbulos blancos, plaquetas bara plasma. Bara baha pîska nani ba wina diara kau sirpi nani sakisa.c Baha dukia kau sirpi nani ba wal sîka paskisa siknis rakaia dukiara, baku sin upla ba tala plapaia sikniska brisa taim baha wal hilp brisa.

Tala pîska wina diara kau sirpi nani ba yus munaia dukiara kristian bani silp lukaia sa dîa daukbia ba, ai kupia dara walra ba witin ra hilp munaia sa pain wahbi sakaia Baibil smalki ba kat. Tala pîska wina diara kau sirpi nani ba aparit bara sîka nani ra yus munaia ba kristian kum kum mapara saura sa. Sakuna kristian wala mapara trabil âpu lukisa baha yus munaia.

Man diara daukma ba lukisma taim wînam kat mamkabi wals:

• ¿Yang daktar nani ra nahki tânka marikaia sip sna tala pîska wina diara kau sirpi kum kum ba yus munamna, apia kaka yus munras ba?

DÎA LAN TAKRAM

Jehova want sa tala ba yawan holi kulkbia.

Wan kupia krawaia

• ¿Dîa muni Jehova mapara tala ba holi sa?

• ¿Yawan nahki nu sa tala yus munaia apia adarka ba, wan wîna ra tala dingkaia apia ba sin tânka sa?

• Tala yus munaia tânka ba dukiara, ¿dîa hilp mai munbia diara pain daukaia?

KAU PLIKI KAIKS

Daktar nani ba man silp tâliam ba wal hilp sâtka kum yus munaia mai wibia kaka, ¿man dîa laki kaikaia sma ki baha hilpka kau briras kainara?

“Aisi kakaira nani ba makabi walisa” (La Atalaya octubre 15, 2000)

Tala pîska nani wina diara kau sirpi nani ba man alki briras kainara, ¿dîa laki kaikaia sma ki?

“Aisi kakaira nani ba makabi walisa” (La Atalaya junio 15, 2004)

Tala ba dukiara Jehova smalki ba tânka briaia bara tara kulkaia dukiara, ¿daktar kum ra dîa hilp munan?

“Tala ba dukiara Jehova smalki ba tâinka briri” (¡Despertad!, diciembre 8, 2003)

Kaiks nahki kangrigisan almukka kum kum ba aspital nani wal asla wark takisa siknis tânka ra muihni bara lakri nani ra hilp munaia dukiara.

Jehova siknis uplika nani ra main kaikisa (10:23)