Diara sut ra kunin âpu wapni kaia sa

Upla nani sut ba want sa ai pânika nani ba kunin âpu bara wapni kabia, Jehova sin want sa ai pânika nani ba kunin âpu bara wapni kabia. Sakuna, naha tasba ra upla nani ba pana pana kunin muni ba mita, yawan mapara isi apia sa wapni kaia. Yawan kunin âpu bara wapni lâka ra sa kaka, ¿dîa yamnika sâkbia?

1. ¿Dîa tâwan yawan kunin âpu bara wapni kaia sa?

Yawan kunin âpu bara wapni sa taim, Jehova ra marikisa latwan kaiki bara rispik muni ba. Nu bas: Jehova nu sa yawan diara sut luki bara dauki ba (Hibru Nani 4:13). Witin kaikisa yawan wapni kaia want ba, bara baha ba witin kulkisa. Baibil bila Jehova “watawikira nani ra waihla kaikisa, kuna pain nani ra ai kupia aiska kulkisa” (Sins Lâka 3:32).

2. ¿Yua bani yawan nahki sip sa kunin âpu wapni kaia?

Jehova want sa yawan “pana pana sturi kasak ba” aisabia (Sakaraya 8:16, 17). ¿Baha ba dîa tânka sa? Yawan kunin munras bara tânka wahra aisaras, wan pamali uplika nani, yawan wal wark taki uplika nani, kangrigisan ra muihni bara lakri nani, bara gabamint tâ uplika nani ra sin apia. Yawan kunin âpu bara wapni ba mita upla nani ra diara implikras bara kunin munras sa (Sins Lâka 24:28 bara Epesus 4:28 aisi kaikma). Baku sin, yawan diara lal mana aibapisa (Roman 13:5-7). Baha tnatka ra bara “diara sut mapara yang nani pain tauki” bara kunin âpu daukaia sa (Hibru Nani 13:18).

3. ¿Yawan kunin âpu bara wapni sa kaka dîa yamnika sâkbia?

Yawan diara sut mapara kunin âpu bara wapni daukisa taim, upla wala nani mita yamni wan kulkisa. Baku daukisa kaka, kangrigisan bilara uplika nani ba yamni ai dara walbia, pamali latwankira kum baku. Baku sin wan kupia dara walra ba pain âuyapah lâka wankisa. Yawan kunin âpu bara wapni sa taim “Gâd wan Sasakra smalkanka ba painkira” daukbia, bara baku upla wala kra want kabia Jehova kupia lâka daukaia (Taitus 2:10).

KAU LAN TAKS

4. Kunin âpu uplika nani ba Jehova pain kaikisa

Lawana Nani 44:21 bara Malaquías 3:16 aisi kaikma, bara naha dukiara aisi banhma:

• Upla nu takaia apia wisi yawan diara kum yukukbia kaka, ¿dîa muni sinskas lukanka kum sa?

• Isi apia kabia kra sin, dîa pali takan ba yawan param saki aisisa taim, ¿Jehova nahki ai dara walisa lukisma?

5. Yawan piua bani kunin âpu wapni kaia sa

LILKA: ¿Dîa hilp wan munaia sip sa lilia kaia dukiara? —Wan kupia dara walra ba pain briaia (2:32)

Hibru Nani 13:18 aisi kaikma, bara aisi banhma nahki kunin âpu wapni kaia . . .

• wan pamalika wal.

• wark takaia pliska ra bara skul watla ra.

• Tnatka wala nani ra.

6. Kunin âpu wapni kaia ba yamni wan munisa

Yawan kunin âpu wapni sa taim, ban kra trabil kum kum takaia sip sa, sakuna ningkara diara sut kau yamni takisa. Lawana Nani 34:12-16 aisi kaikma, bara naha dukiara aisi banhma:

• Yawan kunin âpu wapni sa taim, ¿nahki wan rayaka ba kau yamni takisa?

1. Marit nani ba kunin âpu wapni sa taim, marit lâka ba kau yamni takisa

2. Wark tatakra kunin âpu sa taim warkka pura kaiki uplika ba yamni lukisa

3. Tawan uplika nani ba kunin âpu taukisa taim gabamint uplika ba yamni lukisa

DÎA LAN TAKRAM

Jehova want sa ai pânika nani ba kunin aisabia apia bara kunin munbia sin apia.

Wan kupia krawaia

• ¿Dîa mapara yawan sip sa kunin âpu wapni kaia?

• ¿Dîa muni sinskas lukanka kum sa yawan diara kum yukukisa kaka?

• ¿Dîa muni man want sma kunin âpu wapni kaia diara sut mapara?

KAU PLIKI KAIKS

¿Aisa, yapti nani ba nahki ai luhpia nani ra smalkaia sip sa kunin âpu kaia dukiara?

Piua bani diara kasak ba aisas (1:44)

¿Dîa muni aitani pain sa ki yawan dîa pramis muni ba kat daukaia?

Dîa pramis munisma ba dauks, bara blisin brima (9:09)

Laki kaiks dîa muni diara lal mana aibapaia sa, lalahka ba upla mita saura yus munbia sin.

“¿Diara lal mana ba man aibapaia sma?” (La Atalaya septiembre 1, 2011)

Waitna kum upla ra kunin muni lalah impliki kan ba, ¿nahki ai lâka saura chens muni wapni takan?

“Jehova kupia yamni bri bara padin wan muni ba lan takri” (La Atalaya mayo 1, 2015)