Lesina 14
Witness Tha Jehova Ki Kera To Ofu Ufita
Si man̄a ta ni bo’o n̄a Witness Tha Jehova Ki e thafali asi man̄a kulu ne’e? (1)
Witness Tha Jehova Ki kera abula ufita bo’o ila ofula kera? (2)
Kera beta ufita ana aru malefo la kera? (3)
Ni tei ne tatha inao ila te’e figua? (4)
Ofu la baita ufita ki bo’o ne tatha ila te’e fa n̄ali? (5)
Si ra ufita ki bo’o na kera ilia ila biu gwaun̄ai bia thare’e biu ki? (6)
1. Witness Tha Jehova Ki kera thafali ila si man̄a kulu ana 1870. Inao mai, kera alan̄ida ana Toa kera to’o uria Baebol. Sui ila 1931 kera keka n̄alia si thate’edo fasia kekeda la abu n̄a Witness Tha Jehova Ki. (Isaiah 43:10) Thafali lana figua eri e faekwa bana ma nia ka tagwasu bona’a uria mole’e Witness Ki, kera oga ana fa’aron̄o la ania ka talua 230 au’ua.
2. Baita lana figua eki Witness Tha Jehova Ki kera ofu ulu siman̄a ila te’e wiki. Ni oe kera gani oe uria oki fula ana ta te’edo ana do eki. (Hebrews 10:24,25) N̄a Baebol ni bona’a na kwatona si do na kera to’oa ki. Ofu la kera ki kera thafalia bia keka fa’a suia ana foa. Ana ruru’uda te’efau “fa n̄u ana spirit” kera n̄u lia lau bo’o ila baita lana ofu la. (Ephesians 5:18,19) E ai osi usi, bia e ai kesi gania ta fa seleni.—Matthew 10:8.
3. Baita lana figua kera ofu ila Kingdom Hall. Biu eri e kwaiakuri bana toa ana Witness keka tofa kasia bada. Ni oe osi rikia bona’a ta imisi, airarafolo, mada tesido bana ana si do eki ila Kingdom Hall. Malefo ura usi lana tei sido kera falea bada mala asi tona fale la. Fana toa na kera thathami tona fale, te’e kwade’e do eto lau bo’o.—2 Corinthians 9:7.
4. Ila te’e figua, n̄a toa nanao ki kera to, mada toa na kera lio sulia si ra ki. Kera tatha inao ana to’odo la ila figua eri. (1 Timothy 3:1-7; 5:17) Wane ni ra ki keki adomi kera lau bo’o. (1 Timothy 3:8-10, 12,13) Toa eri kera tatae kesi baita fafia figua eri sui bo’o. (2 Corinthians 1:24) Kera kesi falea bo’o ta thate’edo e’eta lau ifada. (Matthew 23:8-10) Afi la kera e ai si e’eta lau fasia tei imole ki lau. Bia kesi usi kera uria si ra eki. Toa nanao eki kera kwai alami bada uria keki lio sulania thathamila n̄a figua eri ana spirit. Kera keki falea si n̄ata ni kwai adomi la bia kwai betaia la si man̄a ana ilito’oa.—James 5:14-16; 1 Peter 5:2,3.
5. Witness Tha Jehova Ki kera to lau bo’o ana tei ofula ne baita mada figu la baita ila te’e fa n̄ali. Asi man̄a eri ki figua ki keki lae ofu uria kwaifa manataia e’eta ki sui bana ila Baebol. Babataesi la ana toa falu ki natha Jesus e toleda nia elado lau bo’o ila ofula eri mada figu la baita eri.—Matthew 3:13-17; 28:19, 20.
6. Biu gwaun̄ai ni ra ila fanua nei iano fana Witness Tha Jehova Ki e to mai i New York. Si kula eri na N̄ata Ofua eri kera to iei, te’e kule’e wane ana toa nanao na kera thaito’omana lea ura lio la sulia fanua nei iano rereba’a kera to iei. Fulin̄ana 100 thare’e biu ura ra la e ni kakalia fanua nei iano. Ilana si kula eki, toa na kera tofe ra kera kwai adomi uria thaun̄ai lana bia fale lana buka sulia Baebol. Si tatha la kera falea lau bo’o uria to ofua sulia si ra ana si fa’aron̄o ne lea. E tala’ana bana lae oko rikia ta thare’e biu ni ra ne ni karan̄i oe?