LESINA 20

Raa ʼUfita Ni Boʼo Na Ṉa Figuteʼe Wane Nanaʼo Ana Organization Kera Ilia i Taraʼena?

Figuteʹe Wane Nanaʹo Ana Organization i la si maṉa aposol ki — Figuteʼe wane nanaʼo ana organization i la si maṉa aposol ki

Kristin ki i la si maṉa aposol ki kera teʼemania leta fasia figuteʼe wane nanaʼo ana organization — Teʼemania leta fasia figuteʼe wane eri

I naʼo mai, teʼe figuteʼe wane ana “aposol ki bia toʼa nanaʼo ki i Jerusalem,” kera ilia raa mala figuteʼe wane nanaʼo ana organization [governing body]. Ni kera na keki thauṉaʼi mantaa sulia si do gwauṉaʼi ki i fana Kristin ki sui bana na ṉa spirit abu e gwaida. (Acts 15:2) I nunufana kera uʼunu kakalia taa na ṉa Baebol e soreʼa bia keka alabatania spirit tha God ka talai kera, keka ala ni leʼa la fafia manateʼedo na kera thaunaṉia fasia uʼunua kera ki. (Acts 15:25) I taraʼena mena si abula la eri e totoʼo bana.

Tha God e arutoʼoda ura ili lana thathami la nia. Waidoʼora eki na ṉa spirit abu e gwaida na kera too i la Figuteʼe Wane Nanaʼo Ana Organization [Governing Body], kera manata fifii ana Baʼelana tha God bia keka maʼalutaʼi leʼa ana ʼolosi lana raa kamiliʼa ki bia luʼu lana soetoʼona la ki sula bali ana faʼabaita la. I la uiki ni sui bana keki ofu ura uʼunu la kakalia kwaiatoʼia bare waidoʼorana ki i la fanua nei iano rerebaʼa. ʼUria laʼu boʼo i la si maṉa aposol ki, mili todaa si baʼea ni kwaiadomia ki fasia Baebol i la leta ki, fasia circuit overseer ki, bia tei toʼa ni raa kamiliʼa ki. Si abula la eri e adomia figua tha God keka too ana teʼesi manataleʼedo ura raa ofu la. (Acts 16:4, 5) Figuteʼe Wane Nanaʼo Ana Organization kera liosulia raa ura kwaimaʼakwali la ana si faṉa ura adomi lana maṉoʼedo. Keka faʼasukwai kamiliʼa sui boʼo ura manata fifii la ana ṉata la sulia si faʼaroṉoa leʼa, bia keka liosulia raa ura fili lana tei doʼora ura ili lana teisi raa ki.

Kera bosuli ana spirit abu tha God ura kai talai kera. Figuteʼe Wane Nanaʼo Ana Organization kera lio bonaʼa uria tha Jehovah ne Inoto ka tatha bia tha Jesus na ṉa Gwauna figuteʼe Kristin ura keki talai kera. (1 Corinth 11:3; Ephesus 5:23) Wane i talaʼana ana wane eki na kera ni i la figuteʼe wane eri, e aʼi si liofaʼi nia boʼo mala wane ne talaia figua tha God. Ni kera bia Kristin ki sui boʼo natha God e gwaida, kera ‘lae i buriana tha Jesus ura i fei bana ne lae uria.’ (Revelation 14:4) Figuteʼe wane eri kera manata baita asia naʼa ana foʼa la kulu ki uri kera bia raa na kera ilia.

Ni tei kera na kera ni i la figuteʼe wane nanaʼo ana organization i la si maṉa aposol ki?
I taraʼena, Figuteʼe Wane Nanaʼo Ana Organization kera lae ʼufita sulia kwaitalai lana tha God?