Manata To’on̄adoa Ufita Ifana Liliothaua Koro ne Mae?

“Wane ne mae, tala’ana kai maruki lau?” tha Job e soeto’ona asi man̄a tau na’a. (Job 14:14, King James Version) Mada ni oe, lau boo, oko rofe uria sido eri. Si fulato’ona la ufita masa ni oe o rikia lau toa liliothaua koro baki ifafona fanua nei iano ifara si to lea la eri?

Iu, n̄a Baebol e thaun̄ai nia te’e alan̄aia: “Toa mae oe ki keki maruki. . . . Kera keki tatae.” Sui n̄a Baebol ka sorea lau boo: “Ma toa na kera kokoto na keki n̄alia fanua nei iano, ma keki to tatha iei.”​—⁠Isaiah 26:19; Psalm 37:29.

Fasia koka fa’amamanea alan̄aia eki, koro koki lu’ua si soeto’ona la ne’eki: Uria ta na tei imole ki keki mae? Ni fainia toa mae eki? E ade ufita fasia koka thaito’omana keki maruki lau?

Maea, ma Ta Na Kai To’o Si Man̄a Koro Mae

N̄a Baebol e fatai lala’a ania inao mai tha God e ai si thaun̄ai nia imole uria kai mae. Nia e thaun̄ai nia ro imole totolenao tha Adam bia ni Eve, e alu keroa ila o’ola lea eri ifafona fanua nei iano i Eden, maka fa’aron̄o keroa uri keki thare wela ma keka thaun̄ai nia O’ola Lea eri kai baita. Kera keki mae masa keka adefasia n̄ata lana.​—⁠Genesis 1:28; 2:​15-17.

Uria ni keroa kesi manata baita ana adelea tha God, Adam bia ni Eve kero adefasia ma keroa keki n̄alia kwa­kwae la. “Oe [oki] oli uria ila thaegano,” tha God e fa’aron̄o ana tha Adam, “uria thaegano o lae mai fasia. Uria ni oe n̄a gegeo no lae fasia ma oki oli lau boo uria.” (Genesis 3:19) Sui fetei tha God ka thaun̄ai tha Adam e ai si to uboo mai; nia n̄a gegeo ni bana. Uria adefasia la nia, mada abula taa la, Adam e fula to’ona kwakwae la uria kai oli ila gegeo, fasia ka fatai nia e ai si to uboo mai.

Maea e to’olan̄ai nia osi maruki. N̄a Baebol e fatai nia kera kesi toto’o: “Sula’ania na foli lana abula taa la n̄a maea, ma si do na tha God e tona falea bana na n̄a marukia tatha.” (Romans 6:​23, N̄a Alaofua Falu) Fatai nia maea e to’olan̄ai nia e ai bona’a ta lioto’oa lau, n̄a Baebol ka n̄ata una eri lau: “Uria imole ne maruki kera thaito’oma toto keki mae; ma ifana toa mae, ki kesi thaito’oma bona’a tesido lau.” (Ecclesiastes 9:5) Si man̄a ta imole e mae, n̄a Baebol e to’olan̄ai nia: “N̄a anoe do eri elae i ma’a, ni nia ka oli na’a uria ila thaegano; ila fa thato eri n̄a ­lioto’oa nia ka sui bona’a.”​—⁠Psalm 146:​3, 4.

Uria nia, talito’ona bana tha Adam bia ni Eve kera adefasia si baea fifi eki i Eden, uria ta na kulu sui bana kuki mae? Sula’ania kulu sui bana kulu futa na’a ibuira tha Adam e adefasia, ade lana kulu sui bana kuka fulato’ona abula taa la bia maea. Sulia Baebol e fatai nia: “Ana te’e nonii wane, [Adam] ma n̄a maea sulia abula taa la eri, ma sui n̄a maea e to fafia wane ki sui bana.”​—⁠Romans 5:​12, N̄a Alaofua Falu; Job 14:4.

Tei imole keka soeto’ona: ‘E ufita na imole ki kesi to ana ta soul ne toto e ai si mae?’ Imole oro kera to’oa si do ne’e, tei imole keka sorea maea nia ta olofolo lau uria ta ­marukia. Ma sui si manate’e do eri e ai si ni ila Baebol. Sui, Bae lana tha God e to’o lan̄ai nia na’a ta ­te’e soul, uria n̄a soul eri ni oe bona’a neri, bia si bi­ran̄a eri ma lioto’oa eri. (Genesis 2:7; Jeremiah 2:34; Proverbs 2:10) Uria lau boo n̄a Bae­bol e sorea: “N̄a soul ne abula taa​—⁠nia tali to’on kai mae.” (Ezekiel 18:4) N̄a Baebol e ai si fa’aron̄o lau ania n̄a soul toto e ai si mae n̄a maea ana n̄a se’edo.

Tola Imole Keki Tolau Ania

Ibuira abula taa la ma maea ekotho mai ila molagali, tha God ka fatai nia manatana uria toa mae ki keki oli lau mai ana tatae la. Uria n̄a Baebol e to’o lan̄ai nia: “Aberahamo . . . manatana na tha God e sukwai fasi kai tataea [kalu wane nia tha Isaac] imole faisia toa mae ki mena.” (Hebrews 11:​17-19, N̄a Alaofua Falu) Aberahamo e tala’ana kai fito’ona tha God, uria Baebol e n̄ata una eri sula’ania wane Sukwai: “Uria nia God toa mae e ai, nia God toa maruki, uria ni kera sui kera maruki inunufana.”—Luke 20:37, 38, N̄a Alaofua Falu.

Iu, God ne Sukwai e ai si to’o ana tali to’ona sukwaia ma ni nia eto lau boo ana si manate’edo uria imole filia nia ki. Jesus Kraest e n̄ata una eri: “Musi kwekwele asi do eri, uria na si kade’e man̄a eri karan̄i na mai, na toto toa ni sui na kera ni la kwain̄eia ki keki ron̄oa n̄ata lana, ma keki kotho i ma’a.”​—⁠John 5:​28, 29, N̄a Alaofua Falu; Acts 24:15.

Ibuira lau nia ka n̄ata una eri, Jesus ka fula to’ona te’e nofia ne lae mai fasia Israel ila toa susu i Nain. N̄a wane bi’i baita eri n̄a kali wela te’e gwa oru. Si man̄a ne rikia liodila eri, Jesus ka liodila asia na’a. Nia ka n̄ata uria wane mae eri, nia alan̄ai nia: “Wane no bi’i baita, ku soree isamu, Tatae!” Ma wane eri ka tatae, ma tha Jesus ka falea ifana thainana.​—⁠Luke 7:​11-17, N̄a Alaofua Falu.

Uria lau boo gwa oru eri, se’ethathala la e baita asia na’a si man̄a tha Jesus e liliu mai ila to’oa tha Jairus, wane gwaun̄ai ana biu ni foa. N̄a thari nia ne mae neri te’e tafula fa n̄ali ma ro fa n̄ali boo. Si man̄a tha Jesus e fula ila to’oa tha Jairus, nia ka lae kau isana thari eri nia ka una eri: “Wela nai, tatae!” Ma ni nia ka ilia!​—⁠Luke 8:​40-56, N̄a Alaofua Falu.

Ibuira lau, tha Lasarasi ruana tha Jesus ka mae. Si man̄a tha Jesus e fula i to’oa nia, Lasarasi e mae fai fa bon̄i sui na’a. Do anita nia ka liodila mena, wai waena nia ni Matha e to ana manata n̄adoa, ka sorea: “Nau ku thaito’omana na nia kai tatae lau ana tatae la ba faisia maea afa bon̄i i’isi.” Tha Jesus ka lae isana kwain̄aia eri, ka una eri muki idua gwa fau ne’e, nia ka ai: “Lasarasi, oki kotho mai i ma’a!” Ma ni nia ka ilia!​—⁠John 11:​11-44, N̄a Alaofua Falu.

Manata fesi sulia sido ne’e: To lana tha Lasarasi e ufita boo ila fai fathato eki? Lasarasi e ai si sorea boo tesido suli nia e to mai ithalo mada ila hell, uria nia kai fa’aron̄o ania masa ni nia e to mai tesi kula. E ai, Lasarasi e ai si thaito’omana bona’a tesido si man̄a ne mae nia e to bona’a ma’asia “ana tatae la ba fasia maea afa bon̄i i’isi” masa tha Jesus e ai si tatae nia fasia maea.

Nia e mamana n̄a mirakol tha Jesus e ilidaki do uria kasi man̄a ni bana, uria toa nia e tatae kera ki, kera mae lau bada. Ka una eri mena, nia e falea si fa’a mamane la ila 1,900 fan̄ali ne tatha na’a, ana sukwaia tha God, toa mae toto keki maruki lau! Ana mirakol eki tha Jesus e fatai nia kasi do faekwa ni bana ana sido toto kai to ifanua nei iano ifara Inotoa tha God.

Si Man̄a na Liliothaua Koro e Mae

Si man̄a ma’alimae ana maea e fula, liodila oe kai baita, do anita ni oe oki manata to’on̄ado uria nia kai tatae. Abera­hamo e to ana fito’oa uria kwaina kai maruki lau, sui mena kulu te’emai sulia “Aberahamo e liodila asia na’a maka an̄i asia na’a uria ni Sera.” (Genesis 23:2) Ma tha Jesus e ufita? Si man̄a tha Lasarasi e mae, “nia kwai baita i ruru’una, ma liona ka dila,” ma kasi man̄a ibuira “tha Jesus ka an̄i.” (John 11:​33, 35, N̄a Alaofua Falu) Si man̄a ta lilio­thaua oe e mae, e ai si fatania fe’edala uria oki an̄i.

Si man̄a ta wela e mae, e afetai asia na’a ifana thaina eri. Ade lana Baebol e fa’aron̄o ania si liodila na thaina eri e to’o matafana. (2 Kings 4:27) E mamana asia na’a nia afetai lau boo ifana maka eri. “O ni nau sakwai mae, ni nau te’e nau, fuli n̄ana ni oe,” kwaimanatai la tha King David si man̄a kalu wane nia tha Absalom e mae.—2 Samuel 18:33.

Do anita, uria no fa’a mamanea tatae la, liodila la oe e ai si tau. Sulia Baebol e sorea, ni kamalua “e ai musi liodila, uria oron̄ana toa, ne ai ada ta do na keki manatato’o n̄ado uria.” (1 Thessalonians 4:​13, N̄a Alaofua Falu) Sui mena ana oe oki idu karan̄ia tha God ila foala, ma Baebol ka alan̄ai nia “nia tala’ani nia kai fa’a sukwai oe.”—Psalm 55:⁠22.

Masa e ai kesi fa’arono ana e’eta la eri, si n̄ata ne’e ki sui boo ila Baebol e lae mai fasi n̄a New World Translation of the Holy Scriptures.