Lesina 3

Tei Na Tha Jesus Kraest?

Uria ta na keka alan̄ia tha Jesus Kaluwane “ulu nao” tha God? (1)

Uria ta keka alan̄ia nia ana “N̄a si Baea”? (1)

Uria ta tha Jesus ka sifo mai ila fanua nei iano mala wane? (2-4)

Uria ta nia ka ilia si do ni kwele la ania? (5)

Si ta tha Jesus kai ilia asi man̄a ne ni umai? (6)

1. Jesus e to mai ithalo mala spirit sui nia ka sifo mai uria ila fanua nei iano. Nia na do totolenao tha God e thaun̄ai nia, bia keka alan̄ia nia ana Kaluwane “ulu nao” tha God. (Colossians 1:15; Revelation 3:14) Jesus bona’a te’e fa Kaluwane tha God e thaun̄ai nia talifi nia. Tha Jehova e aruto’ona tha Jesus sui fetei ka uria imole, mala “wane gwaun̄ai ana raa” uria thaun̄ai lana si do ki sui bo’o ithalo bia ila fanua nei iano. (Proverbs 8:22-31; Colossians 1:16,17) Tha God ka aruto’ona lau bo’o mala Wane ni n̄ata. Nia adelana keka alan̄ia tha Jesus ana “N̄a si Baea.”—John 1:1-3; Revelation 19:13.

2. God e falea mai Kaluwane Nia ila fanua nei iano ka alua ila rakena ni Mary. Aia tha Jesus e ai si to ana ta maka ana se’edo. Adelana ni nia e ai si to ana ta abula ta’a la. God e falea tha Jesus ila fanua nei iano ne’e uria ulu si do: (1) Uria kai to’oa mamana la sula’a nia tha God (John 18:37), (2) uria kai beta to mamanala, ka falea si tathala la fasia kuka lae sulia (1 Peter 2:21), bia (3) ka fale te’e fau ana man̄ona fasia ka lube kulu fasia abula ta’a la bia maea. Uria ta na ka ilia si do eki?—Matthew 20:⁠28.

3. Uria ade fasia lana n̄ata fifi tha God wane totolenao, tha Adam, e ilia si do na Baebol e alan̄ia ana “abula ta’a la.” God e sorea bona’a nia kai mae. (Genesis 3:17-19) Nia e ai si fula to’ona na’a si oloto’oa na tha God e alua, aia nia ka ai si lea bo’ona. Nia ka thafe’e arai bona’a bia kai mae. Adam ka falea abula ta’a la ifana wela nia ki sui bana. Adelana kulu baita mai kuka arai, matai, bia kuka mae. E ade ufita fasia imole ki sui keka maruki?—Romans 3:23; 5:12.

4. Tha Jesus wane e kokoto mala tha Adam. E ai si uria tha Adam, tha Jesus ade sulia tha God te’e fau doanita ka fulato’ona ilito’oa baita. Ni nia e tala ana kai falea man̄ona te’efau ne kokoto uria usi lana abula ta’a la tha Adam. Sido eri n̄a Baebol e to’olan̄ai nia ana “tae la fasia.” Wela tha Adam ki keki lube fasia kwakwaela ana maea. Imole eki na kera alu’a fito’oa kera ana tha Jesus abula ta’a la kera keki manata lubea bia keka toda marukia tatha.—1 Timothy 2:5,6; John 3:16; Romans 5:18,19.

5. Si man̄a tha Jesus e to ila fanua nei iano ne’e nia e fa’a akwa mataia ki, ka tharea toa na kera thaofa, bia ka fa’a enoa kuburu. Nia ka fa’a tataea toa mae ki. Uria ta na ka ilia si do ni kwele la ki ania? (1) Nia e liodila uria toa na kera se’e fi, bia ka thathamia kai adomi kera. (2) Sido ni kwele la ki ania ne ilia e fa’amamanea nia Kaluwane tha God. (3) Kera fatai nia si do na nia kai ilia i ifana toa na kera ade sulia asi man̄a kai kwaitalai mala Wane Inoto ila fanua nei iano.—Matthew 14:14; Mark 2:10-12; John 5:28,29.

6. Jesus e mae sui tha God ka tataea lau bana mala ta spirit, bia ni nia ka oli uria ithalo. (1 Peter 3:18) Sui ibuira, tha God ka alu nia ka Wane Inoto. Kwai karan̄i na’a uria tha Jesus kai fa’a suia ta’a la ki bia se’efia fasia fanua nei iano ne’e.—Psalm 37:9-11; Proverbs 2:21,22.

[Pictures on page 7]

Ila ra tha Jesus nia e to’odo, ilia si do ni kwele la ki ania, lau bo’o ka falea man̄ona te’e fau i fakulua