Lesina 7
Idu Karan̄ia Tha God Ana Foa
Uria ta na ka gwaun̄ai asia na’a uria kuki foa asi man̄a ki sui? (1)
Kuki foa ana ni tei, bia e ufita? (2, 3)
Si ta ni bo’o ne lea oki foa uria? (4)
Si man̄a ta ni bo’o na oki foa? (5, 6)
Tha God e ron̄oa foa ki sui bo’o? (7)
1. Foala n̄ata faekwa la bia tha God. Oe oki foa ana tha God asi man̄a ki sui bana. Oki to’o mata fana o ni karan̄i nia mala ta wane kwaimani lea. Jehova e baita asia na’a bia ka sukwai ka tatha, sui mena ni e ron̄oa foa la kulu ki! O foa ana tha God asi man̄a ki sui bana?—Psalm 65:2; 1 Thessalonians 5:17.
2. Foa ta bali bana ana fare baita la kulu. Kuki foa ana talito’ona bona’a tha God, Jehova. Si man̄a tha Jesus e to ila fanua nei iano nia e foa lau bo’o ana Maka, wane e’eta ka ai lau. Fulin̄a na kuki ilia lau bo’o si do eri. (Matthew 4:10; 6:9) Sui mena, la foa kulu ki kuki ai ana thatana tha Jesus. Ka fatai nia kulu manata baita ana tha Jesus bia kuka alua fito’oa kulu ani nia, sulaa nia e tatae fasi kulu.—John 14:6; 1 John 2:1,2.
3. Si man̄a kulu foa kuki n̄ata uria tha God fasia ruru’ukulua. Kulu kusi foa baka lua uria kulu thaitho’omana lea ana foa eri mada kuka te’e mai nia fasia ta buka ni foa. (Matthew 6:7,8) Kulu tala’ana kuki foa ila si man̄a se’ekulua etala ana mamalana bana si man̄a, bia mamalana bana sikula. God kai ron̄oa doanita foa koro asi man̄a koro foa faekwa ila ruru’ukulua. (1 Samuel 1:12,13) E lea asia na’a uria oki rofea tesi kula ne enenoa ne nida faisi tei imole ki oko foa amu te’e oe.—Mark 1:35.
4. Si ta ki bo’o na oki foa uria? Tesido bana ne uria kwaimania oe bi nia. (Philippians 4:6,7) Si foa ba kera to’oa e fatai nia kulu kuki foa thatana Jehova bia uria manata lana. Kuki gani nia lau bo’o uria kai falea si do ana se’edo, manata lube la na abula ta’a la ki, bia kwaiadomia ura sitatha la ana ilito’oa. (Matthew 6:9-13) Kusi ade ta’a asi man̄a kuki foa. Kulu kuki foa uria si do ne talana bana manatana tha God.—1 John 5:14.
5. Oe oki foa tala’ana tasi man̄a bana na ruru’umu e idu oe uria oki sore lea mada oko tan̄oa tha God. (1 Chronicles 29:10-13) Oe oki foa asi man̄a no to ana afetaia bia si man̄a fito’oa oe kera ilito’ona. (Psalm 55:22; 120:1) Nia e lea uria oki foa sui oki bi’i fan̄a. (Matthew 14:19) Jehova e thathami koro koki foa “ta si man̄a si ei.”—Ephesians 6:18, Alaofua Falu.
6. Kulu thathamia asia na’a kuki foa asi man̄a na kulu ilia tesi ta’a la ne baita asia na’a. Asi man̄a eri kulu kuki gania tha Jehova uria kwai tatakomia nia bia kai manata lube kulu. Masa kuka fa’aron̄o ana abula ta’a la kulu bia kuka ili bona’a uria kusi ilia lau tha God e “kwai ma’akwali uria kai manata lubea.”—Psalm 86:5; Proverbs 28:13.
7. Jehova kai ron̄o bana uria foa toa na kera kokoto. Fasia foa la oe tha God ka ron̄oa, oe oki ili uria to la sulia lo tha God. (Proverbs 15:29; 28:9) Oko faekwa tai oe si man̄a oki foa. (Luke 18:9-14) Oki ra uria si do no foa uria. Oe oki filon̄ai lea ana fito’oa bia oko thaito’omana si do no sorea. Talito’ona si man̄a ne una eri tha Jehova kai lu’ua foa oe.—Hebrews 11:6.