Lalakwa Tania To’odoa Ne Garo!

Satan bia dimon nia ki kesi thathamia oki ra i fatha God. Kera thathamia keki tolea imole ki fasia tha God masa e tala’ana. Kera ili ufita asi do eri? Te’e si tatha la ana to’odoa ne garo. (2 Corinthians 11:13-15) To’odoa e garo masa nia e ai si to’oa mamanala fasia Baebol. To’odoa ne garo e uria seleni ne ai si mamana—riki lana kai uria seleni mamana, ma nia do mamana e ai. Nia kai falea afetaia i femu.

God ana mamanala, Jehovah, e ai si se’ethathala sulia to’odoa ne garo. I la si man̄a tha Jesus e to i fafona fanua nei ano, te’e to’odoa kera thathamia keki thaun̄inia. Kera sorea fo’a la kera ne mamana. Kera sorea: “Amilia te’e Maka, tha God.” Tha Jesus e alafafia? E ai! Nia e sorea i sada: “Kamulua wela maka kamulua na tha Devil.” (John 8:41, 44) I taraena imole oro ki kera ra i fatha Satan bia dimon nia ki, ma keka sore ada kera fo’a i satha God!—1 Corinthians 10:20.

Ai ne fufura kai to ana foedo ne ta’a uria lau bo’o to’odoa ne garo kai to ana imole na kera ilia do ta’a ki. Fanua nei ano e fun̄u ana ta’ala sulia do ta’a oro na imole ki kera ilia. Biran̄a ta’a ki, firua, bilia, afetaia, thauwanea, bia labatai lana kini ki. To’a oro na kera ra asi biran̄a eki kera to ana to’odoa kera ki, sui to’odoa kera ki e ai si adomi kera bo’o uria ili lana si do ki ne lea. E afetai uria keki kwaimani bia tha God masa e ai kesi sui fasia ili lana do ta’a ki.—Matthew 7:17, 18.

To’odoa ne garo e to’oa i sana imole ki uria keki fo’a ana aedol. God e sorea kesi fo’a ana aedol. Nia e tala’ana. O thathamia bamua ta wane ne toto si n̄ata uri oe ma kai n̄ata ana bia nuumu? Oki kwaimani mamana bamua bia wane una eri? E ai, nia e afetai. Jehovah e thathamia imole ki keki n̄ata uri nia, ma kesi n̄ata uria ta aedol mada ta nunuido, ne ai si isu.—Exodus 20:4, 5.

To’odoa ne garo e alabana fafia thauwane la asi man̄a ana omea. Jesus e sorea imole kwaimani tha God keki to ana liothau la uri kera kwailiu. E ai kusi thaun̄ia imole na kulu liothau ania. (John 13:35) Nia e garo lau bo’o uria na kuki thaun̄ia imole ta’a ki. Si man̄a ma’alimae tha Jesus ki kera lae mai uria keki ra’u nia, nia e ai si alabatania disaepol nia ki uria keki firu su’usi nia.—Matthew 26:51, 52.

To’odoa ne garo e to’oa imole abula ta’a ki keki to ana se’efila ila era akoako. Baebol e to’oa abula ta’a la e kwai talai ura maea. (Romans 6:23) Jehovah nia God ana liothaua. E tala’ana bana God ana liothaua kei falea se’efii la ne toto si sui fana imole ki? E afetai! I lana Fanua Falu, te’e to’odoa bo’o, to’odoa natha Jehovah e alafafia. (Revelation 15:4) To’odoa ki sui na kera to’oa si do ki na e man̄o mai fasia tha Satan keki ai na’a.