Akaloa Lana Si Do Ki Bia Thauwanea Ana Akalo E Ta’a

Satan e thathamia oki raa ana akaloa lana si do ki. To’a oro kera afufu i sana akalo kera ki mada i sana anoedo ki fesi ka su’usi kera fasia tesi do na kai labatai kera. Kera ilia si do eki sulia kera mau ana sukwaia anoedo ki. Keka alua tesi oko na kera akaloa ana abada mada ana aeda ura kwai su’usi la. Keka ku’ufia mada keka usua ana se’eda “meresina” na kera fiia sa kai adomi kera fasia sukwaia akalo. I lana fera mada i lana thaegano manafera kera ki, tei imole kera tha’ufunia tei si un̄e’ai na kera fiia sa kai kwai su’usi. Tei wane ki keka aruto’ona “meresina” na kera akaloa ura kera fa’a mamanea kai adomia bisnis, sukulu, mada ruana kera.

Kwai su’usi la ne lea ka tatha fasia tha Satan bona’a na oki kwaimani bia tha Jehovah. Jehovah God bia ensol nia ki kera sukwai ka talua Satan bia dimon nia ki. (James 2:19; Revelation 12:9) Jehovah e kwai makwali ura fatai lana sukwaia nia uria su’usilana to’a kwaimani nia ki—to’a na kera takwe mamana i fana.—2 Chronicles 16:9.

Baelana tha God e sorea: “Osi akaloa si do ki.” Jehovah e lalakwa tania akalo lana si do ki bia thauwanea ana akalo sulia si biran̄a eki Satan tha Devil ne takwe sukwai burina.—Leviticus 19:26.