To’a Kwaimani Tha God Ki Kera To Fasia Do Ne Ta’a

Satan e ili to’ona imole uria keki ilia do ta’a ki. Wane ne thathami kwaimani bia tha God kei lalakwa tania si ta natha Jehovah e lalakwa tania. (Psalm 97:10) Tei si do na to’a kwaimani tha God keki to fasia e una eri:

Abula ta’a la ana Oe La. “E ai osi lae uria arai mada kukae ta wane.” (Exodus 20:14) Oe la sui lumaa ka tatha e garo.—1 Corinthians 6:18.

Ku’u La Na Kai Bula Wane. “To’a na kera kukuu ka bula kera . . . e ai dodoloa keki fulato’ona intoa tha God.”—1 Corinthians 6:10.

Thauwanea, Olowela La. “E ai osi thauwane.”—Exodus 20:13.

Bilia. “E ai osi bili.”—Exodus 20:15.

Lolea. Jehovah lalakwa ana “meedo na kai lole.”—Proverbs 6:17.

Isusua La bia Rakairia Na Wane E Ai Si Rau Fafia. “Wane ne liothau ana isusua la [Jehovah] e lalakwa tania.” (Psalm 11:5) “Si do na se’ena imole kai ilia [bia] . . . rakeiria.”—Galatians 5:19, 20.

Thathoa Mala Kura La. “Musi to kwaimani bia wane na . . . ka thathamia si do ta wane.”—1 Corinthians 5:11.

Lalakwa Tai Lana Ta Kwalafa bia Kule’e To’a E’eta. “Muki liothau ana ma’alimae kamulua ki . . . ma muka fo’a fasia to’a na kera fare ta’a iamulua ma keki tona ilamatai kamulua.”—Matthew 5:43, 44.

Si do ki na tha God e fa’aron̄o kulu ania e lea i fakalua. E ai si kwaiakuri asi man̄a ki sui bana kuki to fasia ili lana si do ta’a ki. N̄a kwaiadomia tha Jehovah bia ka safua kwaiadomia Witinis nia ki, kai adomi oe uria oki to fasia ili lana si do ki na tha God e ai si se’ethathala sulia.—Isaiah 48:17; Philippians 4:13; Hebrews 10:24, 25.