Fesi Oki Beta Sulia Kwaimania, Oki Wane Ni Kwaimani La

Liothaua e fa’an̄adoa kwaimania. Si man̄a na o to’oa do oro ki sulia tha Jehovah, liothaua oe i fana kai baita lau. Si man̄a na liothaua oe i fatha God e tagwasu, thathami la oe uria ra la i fana kai tagwasu lau bo’o. Si do eri e ade oe uria oki wane ni ra i fana tha Jesus Christ. (Matthew 28:19) Si man̄a na o to na’a bia Witinis tha Jehovah ki na kera te’e barewai do’ora na e se’ethathala, oki fulato’ona kwaimani la ne to tatha. Si ta ni bo’o na oki ilia?

Oki fatania liothaua oe i fatha God ana adesulia lana loa nia ki. “Sula’ania liothau la uria tha God neri, na kuki adesulia si n̄ata fifi nia ki; ma si n̄ata fifi nia ki do kulua e ai.”—1 John 5:3.

Abula sulia ta no to’oa. Jesus e faron̄o ana te’e u’unu ne to’olan̄ania si do eri. Te’e wane ne manata e thaun̄ania luma nia i fafona thaame’e gwa fau baita. Te’e wane ne o’ewanea ka thaun̄ania luma nia fafona one. Si man̄a te’e kuburu baita e fula mai, luma na e to i fafona gwa fau baita ba e ai si oge, ma luma na e to i fafona one ka oge. Jesus e sorea to’a na kera ron̄oa to’odoa nia ki ma keka adesulia kera uria wane ne manata ne thaun̄ania luma nia i fafona fau. Ma to’a na kera ron̄oa to’odoa nia ma e ai kesi adesulia kera uria wane o’ewanea ne thaun̄ania luma nia i fafona one. Ni tei na o thathami uri nia?—Matthew 7:24-27.

Fale oe te’efau. Nia e to’olan̄ania oki u’unu bia tha Jehovah ila fo’a la bia oki faron̄o nia o thathami ilia bona’a ra nia ne toto si sui. Ili lana ra tha God e fatania ni oe wane ni ra tha Jesus Christ.—Matthew 11:29.

Babataesi. “Keki babataesi oe, oki [“fa’afalua,” NW] ruru’umu, abula ta’a la oe ki kai ei na’a, oki ’ai ana thatana n̄a Lord.”—Acts 22:16.

Oki ra talin̄ai ana ra la fatha God. “Atona bana ta si do muki ilia, muki ra se’emabe uria, ’uria sa muki ilia i fana n̄a [“Jehovah,” NW], i fana imole e ai.”—Colossians 3:23.