Si Fa’aron̄oa Gwaun̄ai Fasi Nao Mai

Jehovah e ai si alabatania to’a ta’a ki ura keki labatania Fanua Falu. Talito’ona to’a kwaimani nia ki keki to ila Fanua Falu. Ta na kai fula to’ona to’a ta’a ki? Fasia kuka thaito’omana lu’u lana, manata sulia u’unu mamana sulia tha Noah. I la to’oni fa n̄ali ki ne sui na mai, Noah wane lea ne ra sukwai uria ili lana si do na tha Jehovah e thathamia ki. Sui tei imole i fafona fanua nei ano keka ilia si do ta’a ki. Ma tha Jehovah e faron̄o ana tha Noah nani Nia kai fa’asua imole ta’a ki ana kafo olo. Nia e fa’aron̄oa tha Noah uria kai thaun̄ania te aka fasia nia bia wela nia ki kesi mae si man̄a Kafo kai olo mai.—Genesis 6:9-18.

Noah bia wela nia ki kera thaun̄ania aka. Noah e n̄ata sulia si fa’aron̄oa gwaun̄ai eri i sana mole’e imole oro sulia Kafo olo na kai fula mai, sui kesi ron̄o bo’o uri nia. Kesi luka bo’o ana ili lana biran̄a ta’a ki. Buira kera fa’asuia thaun̄ai lana aka, Noah ka tolea do maruki ki uria ilana aka, bi nia ma wela nia ki. Sui Jehovah ka falea mai te’e kuburu baita. Dani e aru sulia 40 fa thato ma 40 fa rodo. Ma kafo ka olo fafia fanua nei ano.—Genesis 7:7-12.

Imole abula ta’a ki kera mae, ma tha Noah bia wela nia ki keka maruki. Jehovah e fa’amaruki kera asi man̄a ana Kafo olo uria i la fanua falu fasia biran̄a ta’a ki. (Genesis 7:22, 23) Baebol e sorea toto kai fula lau bo’o asi man̄a tha Jehovah kai fa’asuia imole na kera lalakwa ilia si do ne kokoto. To’a lea ki e ai kesi sui. Keki to tatha i la Fanua Falu fafona fanua nei ano.—2 Peter 2:5, 6, 9.

I taraena imole oro kera ilia do ta’a ki. Fanua nei ano e fun̄u ana do ta’a ki. Jehovah e asun̄ainia Witinis nia ki asi man̄a ki sui bana uria keki faron̄o talin̄ai ana imole ki, sui imole oro ki kesi thathami ron̄oa bae lana tha Jehovah. Kesi thathami talaa biran̄ada. Kesi thathamia ta na tha God e sorea e kokoto mada ka ai si kokoto. Ta na kai fulato’ona imole una eki? Keki tatala i lana tafa thato? E afetai bona’a uria imole oro ki keki tatala. Nia e lae bona’a uria si man̄a imole abula ta’a ki keki sui, ma kesi to lau.—Psalm 92:7.

Fanua nei ano e toto si sui; keki thaun̄ania uria kai fanua falu. To’a na kera kwaimani bia tha God na keki to tatha i la Fanua Falu i fafona fanua nei ano.—Psalm 37:29.