O thaitoʼomana tei imole ana Jehovah’s Witness Ki? Mado tei imole iemelia muka too kwaikaraṉi, raa bi kera, muka sukulu ofu, mado muka uʼunu ofu fafia Baebol tesi maṉa. Tei boʼo na ni kamiliʼa, bia uria ta na miki uʼunu bi imole ki sulia faʼamamane la kamiliʼa ki?

Kamiliʼa misi eʼeta boʼo. Mili lae mai fasia kuleʼe wane eʼeta ki ma bibiraṉa eʼeta kwailiu ki. Tei imole iemelia, i naʼo mai, kera too i lana toʼodoa eʼeta ki, ma tei imole e aʼi ofu u boʼo keka fafaʼamamanea tha God. Sui feteʼi mili tataʼe mai mika Witness, kamiliʼa sui boʼo mili falea si maṉa uria toʼo lana Baebol. (Acts 17:11) Mika alafafia do na mili toʼodaki, sui feteʼi imole i talaʼana naʼa kai fili uria faʼabaita la ana tha Jehovah God.

Toʼo lana Baebol e adomi kamiliʼa. ʼUria laʼu boʼo imole ki sui bana, kamiliʼa mena mili too laʼu boʼo ana afetaʼia ki bia si kula na imole i talaʼana e oli kukuru iei. Una eri mena, si maṉa na mili ili uria too la sulia kwaifamanatai ki i la Baebol i la fa thato ki sui bana, mika fulatoʼona tatala la ne leʼa i la too lamaliʼa. (Psalm 128:1, 2) Si do eri ne adea mika uʼunutania i sana imole ki si do leʼa ki na mili toʼoa fasia Baebol.

Mili ili uria too la sulia taa na ṉa Baebol e soreʼa. Baebol e adomi kamiliʼa ura too leʼa la, bia mika farebaita, abula dodoloʼa, bia mika adeleʼa ana imole ki. Baebol e adomi kamiliʼa laʼu boʼo ura kwaiadomi leʼa la i la tafoloa na mili too iei, abula marabibi la, bia too ofu la i maʼalutana bare wela ki. Sulaʼania na mili thaitoʼomana “tha God e aʼi si ado bia ta imole,” faʼamamane la na mili too ania ne ofu kamiliʼa mika teʼe bare waidoʼorana boʼo, doʼanita mika lae mai fasia kuleʼe toʼa eʼeta kwailiu ki bia fanua eʼeta ki. Doʼanita misi eʼeta mena, organization kamiliʼa e talimate bonaʼa.—Acts 4:13; 10:34, 35.

• Jehovah’s Witness Ki, imole ʼufita ki boʼo na ni kera?

• Toʼo lana Baebol e adomi ʼufita ana Jehovah’s Witness Ki?

Imole oro kera sore ada Jehovah’s Witness Ki thatana teʼe toʼodoa faalu neri. Ka una eri mena, e talua 2,700 fa ṉali ne sui naʼa, Baebol e soreʼa toʼa na kera faʼabaita tha God ṉa “witness” nia ki neri. (Isaiah 43:10-12) E lae mai ka fula ana 1931, kera thaitoʼomamaliʼa mala Baebol Student ki. Uria taa na mika talaathatamaliʼa ura si thateʼedo eri, Jehovah’s WitnessKi?

Thateʼedo eri e fataʼi lalaʼa ana God kamiliʼa. Baebol ki na kera kedaa u boʼo mai i totolenaʼo, thatana tha God, tha Jehovah, e kwalusitafa ka talua ṉadeʼe toʼoniʼi si maṉa. Kera lafia si thateʼedo eri fasia Baebol oro ki ma keka talaa ana gwauṉaʼia ki mala Lord mado God. Ka una eri mena, God mamana eri, na thatana tha Jehovah, e alu lalaʼa asi thateʼedo eri i satha Moses. Ni nia ka soreʼa: “Thataku na kai too tathaa bonaʼa neri.” (Exodus 3:15) Adelana boʼo, ni Nia ka eʼeta bonaʼa fasia god ki sui boʼo ne aʼi kesi mamana. Mili seʼethathala uria na mili takwe i fana thateʼedo abu eri.

Thateʼedo eri e fataʼi lalaʼa ana raʼa kamiliʼa. E thafali mai ana tha Abel, witness ki na kera fatania fitoʼoa kera i fana tha Jehovah kera oro. Tei imole ki ana “figua baita eri na kera witness,” nia natha Noah, Abraham, Sarah, Moses, David, bia tei imole ki laʼu. (Hebrew 11:4–12:1) Ni kamiliʼa mili takwe ura alulalaʼa la ana mamana la sulia God kamiliʼa, ʼuria laʼu boʼo wane ne witness i la koutu.

Mili lae sulia si do natha Jesus e ilidaki. Baebol e alaṉia tha Jesus ana “ṉa witness mamana eri ne raa mamana.” (Revelation 3:14) Tha Jesus e soreʼa, ni nia e alulalaʼa ana thatana tha God bia ka aʼi si too fasia uʼunutaʼi lana mamana la sulia tha God. (John 17:26; 18:37) Adelana boʼo, toʼa na kera lae mamana sulia tha Christ, kera takwe i fana tha Jehovah bia keka alu lalaʼa ana thatana. Jehovah’s Witness Ki na kera raa sukwai ura ili lana si do eri.

• Uria taa na Baebol Student eki keka talaa thatada ura Jehovah’s Witness Ki?

• Si maṉa taa natha Jehovah e thafali too ana witness nia ki i fanua nei iano?

• Ni tei boʼo na Witness tha Jehovah ne gwauṉaʼi ka tatha?

Baebol e soreʼa, i buriana tha Christ e mae, toʼa na toʼodo lada e garo keki tataʼe mai i maʼalutana Kristin ki ma keki toʼo garo ana mamana la i la Baebol. (Acts 20:29, 30) Lalae si do eri ka mamana bonaʼa. Kera ṉalia toʼodo lana tha Jesus keka safua ana manataleʼedo i ukita, ma figuteʼe wane na kera liofanida mala Kristin ki ka thafali bonaʼa. (2 Timothy 4:3, 4) E ʼufita, thaitoʼomeʼedoa na kulu too ania i taraʼena e lae mamana mai fasia Baebol?

E fula naʼa asi maṉa uria tha Jehovah kai alu lalaʼa ana mamana la. Baebol e soreʼa, i la fa thato iʼisi ki, thaitoʼomeʼedoa ne mamana e tataʼe mai kai baita. (Daniel 12:4) I la 1870, teʼe figuteʼe wane na kera rofe uria mamana la, kera riki thaitoʼomana manataleʼedo na toʼodoa oro kera lae sulia e aʼi si ṉado ana Baebol. Adelana boʼo, keka thafali rofe uria thaitoʼomeʼedoa eri u boʼo na Baebol e toʼodaki, ma tha Jehovah ka adomi kera ura maʼalutaʼi kokoto la ana skrifsa ki.

Teʼe figuteʼe wane kera toʼodo taiṉaʼi i lana Baebol. Toʼodo la sulia Baebol na mili lae fafia i taraʼena, Baebol Student eki u boʼo na kera ilia mai i naʼo. Kera uʼunu kalia ta uʼunua sui laʼu boʼo ta uʼunua ana uʼunua ki ne too i lana Baebol. Asi maṉa na kera teʼemaʼi toʼona ta uʼunua i la Baebol ne afetaʼi ura maʼalutaʼi lana, keka rofe laʼu uria tei skrifsa ki na kai infitaa lalaʼa ana uʼunu eri. Asi maṉa na kera rikia skrifsa eki uʼunu lada e bobola ma ka too lalaʼa, keka kedaa bonaʼa taa na kera toʼoa. Sulaʼania kera alabatania Baebol talani nia ka infitaa uʼunua eki, mamana la sulia thatana tha God bia Inotoa nia, mantaa nia i fana imole ki bia fanua nei iano, toʼa na kera mae ma manatatoʼoṉadoa ura tataʼe la fasia maea ka fataʼi lalaʼa laʼu. Si abula la eri, e adomi kera fasia faoro la i faara faʼamamane la oro ne garo.—John 8:31, 32.

Fula ana 1879, Baebol Student eki keka riki thaitoʼomana e fula naʼa asi maṉa uria imole ki i la fanua ki sui bana keki roṉoa mamana la. Adelana boʼo i la fa ṉali eri, keka thafali thauṉania magasin eri na miki thauṉania u bamaliʼa i taraʼena, The Watchtower. I taraʼena, e karaṉia 700 ṉata la eʼeta kwailiu ki na mili thauṉania ana buka ki ma 239 kokomua ki i la fanua nei iano na mili uʼunu sulia mamana la ne too i la Baebol iei. Thaitoʼomeʼedoa ne mamana e tataʼe mai ka baita maka talua bonaʼa si maṉa ne sui toli!

• I buriana tha Christ e mae, si taa ne fulatoʼona mamana la i la Baebol?

• Si taa na mili ilia na mika fulatoʼona laʼu mamana la ne too i la Baebol?

I la fa ṉali oro ki, Jehovah’s Witness Ki kera arutoʼona, keka thauṉania, bia keka ukalia Baebol eʼeta kwailiu ki. Lalae mika riki thaitoʼomana e leʼa uria miki thauṉania ta Baebol transleison faalu na kai adomia imole ki sui bana ura keki too ana “thaitoʼomeʼedoa kokoto sulia mamana la,” nia na ṉa thathami la tha God. (1 Timothy 2:3, 4) Adelana boʼo, i la 1950 mika thafali falea tei bali ana New World Translation Baebol na mili kedaa ana English na imole ki nai maṉa eki kera maʼalutaʼi leʼa ania. E talua 120 ṉata la eʼeta kwailiu ki na mili kedaa sui naʼa ana Baebol eri ma mika mamana fafia bulasi kokoto la ania.

Imole ki kera atoʼia Baebol ne kwaiakori uria maʼalutaʼi lana. Ṉata la ki kai tatala i buira fa ṉali oro, ma Baebol oro eʼeta kwailiu na kera kedaa ana English e too ana teisi faraʼi la na kesi arutoʼona naʼa mado e aʼi si kwaiakori ura maʼalutaʼi lana. Keka rikia laʼu boʼo tei kekedaa ana Baebol i naʼo mai ne kokoto ka tatha. Kekedaa eki e adomi kamiliʼa mika maʼalutaʼi leʼa ana si baʼea ki na kera arutoʼona i la si maṉa na kera kedaa Baebol ana Hebrew, Aramaic, bia Greek.

Imole ki kera atoʼia Baebol ne uʼunu kokoto. Toʼa na keki akelatania Baebol ura ṉata la eʼeta kwailiu ki, fuliṉana sa kesi talaa baʼelana tha God sulia manatada i talaʼada, ma keki mamana bonaʼa fafia akelataʼi la ne lae kokoto sulia kekedaa ana Baebol i naʼo mai. Mena ana, i la Baebol oro eʼeta kwailiu ki, e aʼi kesi alua thatana God mamana eri, tha Jehovah, iei.

Imole ki kera atoʼia Baebol ne fareʼinoto ana tha God. (2 Samuel 23:2) Karaṉia 7,000 si kula i lana New World Translation Baebol na mili olifafia thatana tha God mika alua ka too u boʼo sulia toto lana mai, asi maṉa na kera kedaa Baebol mala nunuʼido eri i aena si pefa naʼi e fatania. (Psalm 83:18) Sulaʼania kera raa taiṉaʼi sulia fa ṉali oro ki, Baebol eri ka kwaiakori ura teʼemaʼi lana bia ka alu lalaʼa ana manatana tha God. Masa oko too ana ta New World Translation Baebol ana ṉata la oe mado ka aʼi mena, mili thathamia uria ʼosi too fasia teʼemaʼi lana Baebol afa boṉi ki sui bana.—Joshua 1:8; Psalm 1:2, 3.

• Uria taa na mika thauṉaʼi mantaa ura thauṉaʼi lana ta Baebol transleison faalu?

• Imole ne thathamia kai toʼoa thathami la tha God, si taa ni boʼo ne leʼa uria kai ilia afa boṉi ki sui bana?