LESINA 1

Si Taa Ni Bo’o Na Si Fa’aroṉoa Le’a Eri?

1. Si taa ni bo’o na si fa’aroṉoa eri fasia tha God?

Imole ki na kera todaa marukia i fanua nei iano

Tha God e thathamia imole ki sui keki too ana le’a la i fafona fanua nei iano. Nia ka thauṉania fanua nei iano bia si do ki sui bo’o ne too iei, sula’ania e liothau ana imole ki. E kwaikaraṉi na’a uria tha God kai abula fasia ka falea tole’a la i fana imole ki i la fanua ni sui bo’o. Nia kai fa’adaṉa si do ki sui bo’o ne adea imole ki keka too ana fiila.—Te’emania Jeremiah 29:11.

E a’i ta inotoa si sitatha u uria fa’adaṉa lana isisu’a la, mata’ia, mado maea. Sui mena ana, si fa’aroṉoa le’a e too. E kwaikaraṉi na’a uria tha God kai talaa inotoa ki sui bo’o i fanua nei iano ana inotoa nia. Imole ki sui bo’o na kera too i faara inotoa eri keki fulato’ona enenoa bia tole’a la.—Te’emania Revelation 11:15; 21:3, 4

2. Uria taa ni bo’o na si fa’aroṉoa le’a eri ka gwauṉa’i?

Tha God kai fa’asuia fiila asi maṉa na nia kai fa’adaṉa imole ki na biraṉada e ta’a. (2 Thessalonica 1:8) Si maṉa ta nasi do eri kai mamana? Ba’elana tha God e u’unu sui na’a sulia afeta’ia ki ne labatania imole ki i tara’ena. Ta’a la ki ne raa i tara’ena e fatania e kwaikaraṉi uria tha God kai abula na’a.—Te’emania 2 Timothy 3:1-5.

3. Si taa ni bo’o na fuliṉana sa kuki ilia?

Fuliṉana sa kuki to’oa Baebol fasia kuka thaito’omana tha God. Baebol e ’uria ta leta fasia maka ne too ana liothaua. Nia e u’unu sulia abula la na kuki abula ania fasia kuka fulato’ona tole’a la ne tala’ana i tara’ena, bia marukia tathaa na toto kuki todaa i fafona fanua nei iano. E mamana, tei imole ki kesi thathamia uria oki todaa kwaiadomia fasia Baebol. Una eri mena, tole’a la eri na toto kuki fulato’ona e le’a asia na’a, maka ai si tala’ana bona’a uria kuki alabatania tesi do kai su’usia.—Te’emania Proverbs 29:25; Revelation 14:6, 7.