Si Taa Ni Bo’o Ne Toto Kai Fulato’ona To’odoa Ki?

1. To’odoa ki sui bo’o e kokoto?

I la to’odoa ki sui bo’o e too ana imole ki na kera thathami lae mamana sulia tha God. Kulu se’ethathala asi na’a uria tha God e riki thaito’omana imole eki bia ka thai suli kera. Kwaimanatai asia na’a, kera aruto’ona thatana to’odoa ura ili lana do ta’a ki. (2 Corinth 4:3, 4; 11:13-15) Tei to’a na keki fale u’unu, kera fa’aroṉo ania tei to’odoa ki kera ado bia terrorist ki, to’a na keki lagua tei kule’e wane, omea, bia labata’i lana kala wela. Si do eki e labatania bona’a maṉona imole ki na kera thathami lae mamana sulia tha God!​—Te’emania Matthew 24:3-5, 11, 12.

To’odoa na e mamana e fare’inoto ana tha God. To’odoa ne a’i si mamana e faretoloṉia tha God. Nia e to’oa manate’edo ne a’i si mamana sulia tha God bia to’a na kera mae, na e a’i si lae mai fasia Baebol. Ma tha Jehovah e thathamia imole ki uria keki thaito’omana mamana la suli nia.​—Te’emania Rome 6:23; 1 Timothy 2:3-5.

2. Si taa ni bo’o ne toto kai fulato’ona to’odoa ki?

E le’a asia na’a, tha God, maana e a’i si boko ura riki lana to’odoa ki na kera liothau bada ana fanua nei iano natha Satan e inoto ania, doanita keka sore ada sani kera na kera liothau ani nia. (James 4:4) Ba’elana tha God e ’alaṉia to’odoa eki sui bo’o ne garo ana “Babilon Baita.” Babilon, nia na ṉa toaa susu ba i na’o ṉa to’odo e a’i si mamana e thafali mai fasia i buriana Kafo Olo ba i la fa thato tha Noah. E kwaikaraṉi asia na’a uria tha God kai fa’adaṉaa to’odoa na e lolea bia ka labatania imole ki.​—Te’emania Revelation 17:1, 2, 5, 16, 17; 18:8.

Tha Jehovah e a’i si liodoraa to’a na kera thathami lae mamana suli nia na kera too e’eta kwailiu i la to’odoa e’eta ki na e a’i si mamana i la fanua nei iano. Ni nia e ofua imole una eki asi maṉa na e to’oa mamana la i sada.​—Te’emania John 6:45.

3. Si taa na fuliṉana sa imole na kera thathami lae mamana sulia tha God keki ilia?

Tha Jehovah e thai le’a sulia imole ki na kera thathamia mamana la bia si do na e le’a. Ni nia ka are kera uria keki lae fasia to’odoa na e a’i si mamana. Imole ki na kera liothau ana tha God kera kwaialami ura keki taala biraṉada fasia ka fa’ase’ethathala nia.​—Te’emania Revelation 18:4.

I buriana tha Jesus e mae, asi maṉa na imole ki na kera thathami adesulia tha God kera roṉoa si fa’aroṉoa le’a fasia aposol ki, keka se’ethathala asia na’a. Tha Jehovah e to’oa te’e toola faalu i sada, toola na e fa’ase’ethathala ne too ana manatato’oṉadoa bia toola sulia manatana tha God. Ni kera keka fatania si biraṉa le’a i fekelu’a i tara’ena, sula’ania kera abula sulia si fa’aroṉoa le’a eri ma keka alua thathami la tha Jehovah totole na’o i la marukia kera.​—Te’emania 1 Thessalonica 1:8, 9; 2:13.

Tha Jehovah e thathagonia imole ki na kera lae fasia to’odoa na e a’i si mamana ura keki too nada bia bare’e wela nia ki na kera fo’a ani nia. Masa oko thathami’i ro’o sulia tha Jehovah, ni oe oki kwaimani le’a bi nia, oki waido’ora bia bare wela nia na kera fo’a ani nia ma keka liothaua ani kera kwailiu, bia oki fulato’ona marukia tathaa.​—Te’emania Mark 10:29, 30; 2 Corinth 6:17, 18.

4. Si taa natha God kai ilia fasia i la fanua ki sui bo’o keka too ana se’ethathala la?

Kwakwa’e la na kai fulato’ona to’odoa na e a’i si mamana, si fa’aroṉoa le’a neri. Nunufana si abula la eri, i la fanua ki sui bana keki fulato’ona too le’a la. Maka a’i bona’a ta to’odoa na e a’i si mamana na kai ukalia bia kai talai garo ana imole ki. I heven bia i fanua nei iano keki ofu ni fo’a la ana talito’ona God mamana eri.​—Te’emania Revelation 18:20, 21; 21:3, 4.