LESON 24
Ta na Baebol e Sorea Sula’ania Angel ki?
Jehovah e thathamia kuki thaito’omana famili nia na kera to i heven. Famili eri Jehovah na to i heven nia na angel ki, Baebol e sorea kera na “kaluwane tha God.” (Job 38:7) Ta na Baebol e sorea sula’ania angel ki? Ta na angel kera ilifania fana imole ki? Ufita angel ki sui bana kera to bia famili Jehovah?
1. Ta na Baebol e sorea sula’ania angel ki?
Sui fete’i Jehovah ka thaungania fanua ne iano, totolo na’o nia e thaungania angel ki. A’i si tala’ana uria kuki rikia angel ki, sulia kera te’e spirit na kera to i heven. (Hebrews 1:14) Angel oro na kera to i heven bia kera e’eta kwailiu. (Revelation 5:11) Kera “lae sulia si do na [Jehovah] e sorea bia keka adesulia ba’elana.” (Psalm 103:20) La si manga na sui, Jehovah e aruto’ona angel nia ki uria keki fa’arongo ana ba’elana bia keka adomia imole nia ki. Tara’ena, angel Jehovah kera tolea Christian ki sana imole na kera thathamia keki to’odo sula’ania Jehovah.
2. Ta na Baebol e sorea sula’ania Satan bia demon nia ki?
Tei angel a’i kesi mamana fana Jehovah. Angel totolo na’o na e adefasia Jehovah, Baebol alangia ana “Devil bia Satan, sulia nia e lolea imole ki fafona fanua ne iano.” (Revelation 12:9) Satan e thathamia kai kwaitalai, adelana nia ka lolea Adam bia Eve, sui buira nia ka lolea la’u bo’o tei angel fasia keka adefasia Jehovah. Angel eki na kera adefasia Jehovah bia keka lae bia Satan kera alangia ana demon ki. Jehovah e uumai ana angel eki fafona fanua ne iano bia nia kai fa’adanga kera.—Te’emania Revelation 12:9, 12.
3. Ta na Satan bia demon nia ki kera aruto’ona uria keki lolea imole ki?
Satan bia demon nia ki kera aruto’ona spiritisim uria keki lolea imole ki, spiritisim nia si biiranga ura u’unu la bia demon ki. Uria example, tei imole kera lae sana to’a na keki mato’o, fasia keka fa’arongo ania si do na kai fuli ani kera la si manga na ni u mai. Bia tei imole kera lae sana to’a na keki fale meracine ura akalo. Satan e lolea imole ki fasia keka fa’amamanea kera thaito’omana keki u’unu bada bia to’a na kera mae sui na’a. Sui Jehovah e sorea: “A’i musi lae sana to’a na keki u’unu bia imole na kera mae sui na’a, bia to’a na keki fa’arongo ania si do na kai fuli la si manga na ni u mai.” (Leviticus 19:31) Jehovah e fa’arongo kulu ana si do eri fasia ka beta kulu fasia Satan bia demon nia ki, sulia kera ma’alimae tha God bia kera thathamia uria keki labata’i kulu.
TO’OA LA’U TEI SI DO
Kuki to’oa si do le’a na angel kera ilifania, uria ta ka le’a kuki to fasia spiritisim, bia ta na kuki ilifania fasia kuka beta kulu fasia Satan bia demon nia ki.
4. Angel kera adomia imole ki fasia keka to’odo sula’ania Jehovah
Angel Jehovah ki a’i kesi preach sana imole ki, sui mena ana kera tolea imole na kera faarabaita ana God, sana imole na kera thathamia uria keki to’odo sula’ania Jehovah. Te’emania Revelation 14:6, 7, sui u’unu kalia soeto’ona la ki:
Uria ta kuka ato’ia kwai’adomia fasia angel ki si manga na kulu lae ura u’unuta’i lana fa’arongoa le’a?
Si manga na o thaito’omana angel kera tole oe sana imole na kera thathamia uria keki to’oa Baebol, si do eri fa’asukwa’i oe? Uria ta?
5. To fasia spiritism
Satan bia demon nia ki kera ma’alimae Jehovah. Bia kera ma’alimae kulu la’u bo’o. Te’emania Luke 9:38-42, sui u’unu kalia soeto’ona la:
Ta na demon kera ilifania ana imole ki?
A’i kusi thathamia demon ki uria keki labata’i kulu. Te’emania Deuteronomy 18:10-12, sui u’unu kalia soeto’ona la ki:
Ta na demon kera ilifania na adea imole ki keka ilifania si do na kera thathamia? Abula la ufita na o rikia imole kera ilifania la si kulu na o to iei?
An mantaa oe, tala’ana bana Jehovah kai lalakwatania spiritisim? Uria ta?
Fatania VIDEO, sui u’unu kalia soeto’ona la ki.
Ana mantaa oe, si do na Palesa e alua ana abana kaliwela nia e adomi nia? Uria ta?
Ta na Palesa e ato’ia uria kai ilifania fasia ka su’usia demon?
Christian mamana ki keki to fasia ilifa’i lana si do na demon e thathamia. Te’emania Acts 19:19 bia 1 Corinthians 10:21, sui u’unu kalia soeto’ona la:
Uria ta ka gwaunga’i kuki to fasia ilifa’i lana tesi do ana spiritisim?
6. Sitatha ana Satan bia demon nia ki
Satan na kwaitalai fana demon ki. Chief angel Michael na ruana thata nia tha Jesus nia ka kwaitalai fana angel ki na kera to mamana fana Jehovah. Ufita, Michael e to ana sukwa’ia baita? Te’emania Revelation 12:7-9, sui u’unu kalia soeto’ona la ki:
Tei na to ana sukwa’ia baita? Michael bia angel nia mada Satan bia demon nia ki?
An mantaa oe, disaepol Jesus kera tala’ana uria keki ma’u ana Satan bia demon nia ki?
Oe oki sitatha ana Satan bia demon nia ki. Te’emania James 4:7, sui u’unu kalia soeto’ona la:
Ta na oki ilifania fasia oko sitatha ana Satan bia demon nia ki?
SI BA’EA TEI IMOLE KEKI SOREA: “A’i si garo bo’o uria kuki lae sana to’a na keki mato’o, fasia keka fa’arongo ana si do na kai fuli ani kulu la si manga na ni u mai.”
Uria ta si mante’edo eri ka a’i si kokota?
SI DO NA KULU TO’OA
Angel Jehovah ki kera adomi kulu. Satan bia demon nia ki kera ma’alimae Jehovah, bia kera aruto’ona spiritism uria keki lolea imole ki.
Reviu
Ta na angel Jehovah kera ilifania ura adomi lana imole ki fasia keka thaito’omana Jehovah?
Ta na Baebol e sorea sula’ania Satan bia demon nia ki?
Uria ta ka le’a kuki to fasia spiritisim?
TEI SI DO KI LA’U
Te’emai sulia si do na fatania Jesus na Chief angel Michael.
Te’emai sulia si do na fatania Devil nia te’e angel na e to.
Te’emai sulia te’e kini na e to fasia ilifa’i lana si do ana spiritisim.
“She Found a Purpose in Life” (The Watchtower, July 1, 1993)
Te’emai sulia Satan e aruto’ona ufita ana spiritisim ura lole lana imole ki.
“The Truth About Magic, Sorcery, and Witchcraft” (The Road to Everlasting Life, part 5)