LESON 30
Imole na Kera Mae Toto Keki Maruki La’u!
Maea e falea liodilaa fana imole ki, do na adea Baebol ka sorea maea nia te’e ma’alimae. (1 Corinthians 15:26) Uria na kulu to’oa la leson 27, Jehovah kai fa’asuia maea. Sui imole na kera mae sui na’a keki ufita? La leson ne’e, kuki to’oa Jehovah e alangania toto kai fa’amarukia imole na kera mae. Ufita, alanga’ia eri kai mamana? Ma imole na Jehovah kai fa’amaruki kera fei na keki to iei, heven mada fafona fanua ne iano?
1. Ta na Jehovah e thathamia kai ilifania ana imole na kera mae?
Jehovah thathamia kai fa’amarukia imole na kera mae sui na’a. Job e to ana fito’oa adelana nia ka fa’amamanea, God afeta’i ka liodora ani nia si manga nia e mae. Adelana nia ka sorea, “Nau kwai rongoa ba’elamu [si manga nau ku to la grev].”—Te’emania Job 14:13-15.
2. Uria ta kuka fa’amamanea imole na kera mae toto keki maruki la’u?
God e falea sukwa’ia fana tha Jesus si manga na nia e to fafona fanua ne iano uria kai fa’amarukia imole na kera mae. Jesus e fa’amarukia te’e kali thaari na 12 years bia kaluwane te’e oru. (Mark 5:41, 42; Luke 7:12-15) Sui buira, Jesus ka fa’amarukia la’u tha Lazarus, do anta nia ka mae mena sulia faifa thato sui na’a. Buira Jesus e fo’a sui, nia ka sorea: “Lazarus, tata’e mai!” “Si manga eri Lazarus ka tata’e bona mai.” (John 11:43, 44) Manto’ona fesi se’ethathala la na famili tha Lazarus bia imole kwaimani nia ki kera fulato’ona, si manga na kera rikia Lazarus e maruki la’u.
3. Ta manto’ongadoa e to fana imole kulu ki na kera mae?
Baebol e alangania: “Imole na kera mae toto keki maruki la’u.” (Acts 24:15) Imole na Jesus e fa’amaruki kera la si manga na sui a’i kesi ta’e bo’o ura heven. (John 3:13) Kera se’ethathala asia na’a si manga na kera maruki la’u fafona fanua ne iano. Kwaikarangi na’a Jesus kai fa’amarukia imole oro na kera mae uria keki todaa la’u marukia le’a na toto si sui la paradise fafona fanua ne iano. Nia e sorea, “imole ki na kera to la grev toto keki maruki la’u.”—John 5:28, 29.
TO’OA LA’U TEI SI DO
Kuki to’oa la’u u’unua la Baebol na adea kuka fa’amamanea imole kulu ki na kera mae toto keki maruki la’u. Bia alanga’ia eri sula’ania toto imole keki maruki la’u e adomi ufita ani kulu.
4. Jesus e tala’ana uria kai fa’amarukia imole na kera mae
Rikia si do na Jesus e ilifania ana wane kwaimani nia tha Lazarus. Te’emania John 11:14, 38-44, sui u’unu kalia soeto’ona la ki:
Ta na adea kuka thaito’omana tha Lazarus e mae? —Rikia verse 39.
Masa Lazarus e mae ka ta’e ura heven, ufita e tala’ana uria Jesus kai asunga’i nia la’u mai fasia ka to fafona fanua ne iano?
5. Imole oro na kera mae keki maruki la’u
Te’emania Psalm 37:29, sui u’unu kalia soeto’ona la:
Imole oro na keki tata’e fasia maea keki to fei?
Jesus kai fa’amarukia imole na a’i kesi kokota bia imole na kera kokota. Te’emania Acts 24:15, sui u’unu kalia soeto’ona la:
Si manga na Jesus kai fa’amarukia imole ki fasia maea, tei bo’o na o thathamia oki rikia?
Jesus kai fa’amarukia imole ki, uria te’e maka na e fa’atharasia wela nia si manga e biinga
6. Alanga’ia eri sula’ania toto imole keki maruki la’u e falea manto’ongadoa bia ka fa’ainamarukia imole ki
U’unua sulia thaari tha Jairus na to la Baebol e fa’ainamarukia imole na kera akwasia imole kwaimani kera ana maea. Te’emania u’unua eri la Luke 8:40-42, 49-56.
Sui fete’i Jesus ka fa’amarukia thaari tha Jairus, Jesus e fa’arongo ana Jairus: “A’i osi ma’u to ana fito’oa.” (Rikia verse 50.) Alanga’ia sulia toto imole keki maruki la’u e adomi ufita bo’o ani oe . . .
si manga na te’e imole o liothau ania e mae?
si manga na marukia oe e to la afeta’ia?
Fatania VIDEO, sui u’unu kalia soeto’ona la.
Alanga’ia sulia toto imole keki maruki la’u, e adomi ufita bo’o ana thainana Phelicity bia maka nia?
SI BA’EA TEI IMOLE KEKI SOREA: “Imole na kera mae keki maruki na’a i heven, a’i la’u fafona fanua ne iano.”
Mantaa oe ufita?
Scripture ta na fatania imole oro na kera mae keki maruki la’u fafona fanua ne iano?
SI DO NA KULU TO’OA
Baebol e alangania imole na kera mae toto keki maruki la’u. Jehovah e falea sukwa’ia fana tha Jesus uria kai fa’amarukia imole na kera mae.
Reviu
Ta na Jehovah bia Jesus keki ilifania ana imole na kera mae?
Imole oro na keki tata’e fasia maea fei na keki to iei, heven mada fafona fanua ne iano? Uria ta oko manta una’eri?
Ta na adea oko fa’amamanea imole na o liothau ania na kera mae toto keki maruki la’u?
TEI SI DO KI LA’U
Te’emai sulia si do na oki ilifania si manga na o akwasia te’e imole ana maea.
Ufita, Baebol principle thaito’omana kai adomia imole ki si manga na kera liodila?
Rikia si do na kai adomia wela na e akwasia te’e imole na e liothau ania ana maea?
Ufita, tei imole na kera tata’e fasia maea keki lae uria heven? Kwa’i imole ufita na keki tata’e fasia maea?